ބެލްޖިއަމްގެ ތިން ސަރަޙައްދެއް ދިން ބޮމުގެ ޙަމަލާތަކެއްގައި އެތައް ބަޔަކު މަރުވެ، އެތައް ބަޔަކަށް އަނިޔާވުމާ ގުޅިގެން އެކަމުގެ ހިތާމައިގައި، ބެލްޖިއަމްގެ ބޮޑު ވަޒީރު، ޗާލްސް މިޝެލްއަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ހަމްދަރުދީގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، މި ޚަބަރު އެއްސެވީ ކުއްލި ހައިރާންކަމަކާއި، ފުން ހިތާމައާއެކު ކަމުގައި ވިދާޅުވެފައިވެއެވެ. އަދި ބެލްޖިއަމްގައި މިހިނގި ޓެރަރިޒަމްގެ ފިނޑި ޢަމަލު، ދިވެހި ރާއްޖޭގެ ފަރާތުން އެންމެ ހަރުކަށި އިބާރާތުން ކުށްވެރިކުރައްވާފައިވެއެވެ.
އެމަނިކުފާނުގެ މެސެޖުގައި އިތުރަށް ވިދާޅުވެފައިވަނީ ދުނިޔެއަށް ކުރިމަތިވެފައިވާ ޓެރަރިޒަމްގެ ނުރައްކަލާ ދެކޮޅަށް ކުރެވެމުންދާ މަސައްކަތުގައި ރާއްޖެއިން އަބަދުވެސް ސާބިތުކަންމަތީ ދެމިތިބޭނެ ކަމަށާއި، މިކަމުގައި ބެލްޖިއަމް ސަރުކާރާއި، ބައިނަލްއަޤްވާމީ ދުނިޔެއާއެކު ރާއްޖެއިން ކެނޑިނޭޅި މަސައްކަތް ކުރަމުން ގެންދާނެ ކަމުގައި ވިދާޅުވެފައިވެއެވެ.
ބެލްޖިއަމްގެ ޒަވެންޓެމް އެއަރޕޯޓާއި، ޝޫމަން އަދި މަލްބީކް މެޓްރޯ ސްޓޭޝަންސް އަށް ދިން ބޮމުގެ ހަމަލާގައި ވިއްސައްވުރެ ގިނަ މީހުން މަރުވެ އެތައްބަޔަކަށް އަނިޔާވެފައިވެއެވެ.