ސޯޝަލް ވޯކަރުންގެ އެންމެ ދަށް ރޭންކުގެ މުއައްޒަފުންގެ މުސާރަވެސް 13000ރުފިޔާއިން މަތި

ސަރުކާރުގެ އިދާރާތަކުގެ މުސާރަ އެއްހަމަކުރުމަށް ސަރުކާރުން ކުރައްވާ މަސައްކަތުގެ ދަށުން އިޖްތިމާއީ ޚިދުމަތްތެރިން ނުވަތަ ސޯޝަލް ވޯކަރުންގެ ތެރެއިން އެންމެ ދަށް ރޭންކުގެ މުވައްޒަފުންނަށްވެސް އެންމެ މަދުވެގެން 13000 ރުފިލާ މިހާރު ލިބޭނެ ކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސާރވިސަސްއިން ވިދާޅުވެއްޖެއެވެ.

ސަރުކާރުގެ އިދާރާތަކުގެ މުސާރަތަށް އެއްހަމަ ކުރުމަށް ސަރުކާރުން ކުރައްވާ މަސައްކަތުގެ ދަށުން، ރައީސުލްޖުމްހޫރިއްޔާ ވަނީ އިޖްތިމާޢީ ޚިދުމަތްތެރިންގެ މުސާރައަށްވެސް ހެޔޮ ބަދަލެއް ގެންނަވާފައެވެ.

މުޖްތަމައުގައި ދިރިއުޅޭ އެކި ފަންތީގެ މީހުންގެ ރައްކާތެރިކަމަށް މަސައްކަތްކުރާ މީހުން ނުވަތަ ސޯޝަލް ވޯކަރުންގެ ދާއިރާއަކީ މީގެ ފަނަރަ ވަރަކަށް އަހަރު ކުރިއަށް ބަލައިފިނަމަ ޕްރޮފެޝަނަލް ދާއިރާއެއް ނޫނެވެ. ނަމަވެސް އިޖްތިމާއީ ޚިދުމަތްތެރިންގެ ދާއިރާ މިހާރު ވަނީ ޕްރޮފެޝަނަލް ދާއިރާއަކަށް ބަދަލުކޮށްފައެވެ.

ޕްރޮފެޝަނަލްކޮށް ރާއްޖޭގައި އިޖްތިމާޢީ ޚިދުމަތްތެރިންގެ ގޮތުގައި މަސައްކަތް ކުރާ މުވައްޒަފުންގެ އަދަދު 170 އަށްވުރެ އިތުރެވެ. އިޖްތިމާޢީ ޚިދުމަތްތެރިންގެ މުސާރައަށް ސަރުކާރުން ގެންނެވި ބަދަލުގެ ދަށުން އެންމެ ދަށް ރޭންކުގެ މުއައްޒަފުންނަށްވެސް އެންމެ މަދުވެގެން ލިބޭ އުޖޫރަ 13000 ރުފިޔާއަށްވުރެ މިހާރު ބޮޑުވާނެ ކަމަށް މިނިސްޓްރީ އޮފް ޖެންޑާރ ފެމިލީ އެންޑް ސޯޝަލް ސާރވިސަސްއިން ވިދާޅުވެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ޖެންޑަރ މިނިސްޓްރީގެ ލީޑް ސޯޝަލް ސާވިސް ވޯކަރ، ފާތިމަތު ލީނާ ވަނީ ދައުލަތުގެ ޕޭހާމަނައިޒޭޝަންގެ ދަށުން ސޯޝަލް ވޯކަރުންގެ މުސާރައަށް އެވްރެޖްކޮށް 67 އިންސައްތައިގެ ކުރިއެރުމެއް އައިސްފައިވާކަމަށެވެ. އަދި މިދާއިރާގެ އެންމެ މަތީ ރޭންކުގެ މުވައްޒަފުންގެ މުސާރައަށް 6000 ރުފިޔާ އަށްވުރެ ބޮޑު ޢަދަދެއް އިތުރުވިކަންވެސް ލީނާ ފާހަގަކުރެއްވިއެވެ.

މުއައްޒަފުންގެ މުސާރައަށް ބަލާއިރު ޑިރެކްޓަރ ޖެނެރަލްގެ މަގާމަށް މީގެކުރިން ލިބިވަޑައިގަންނަވާނީ 26340.26 ރުފިޔާއެވެ. ނަމަވެސް މިފަހުން ގެނެވުނު ބަދަލާއެކު 33265 ރުފިޔާ ލިބިވަޑައިގަންނަވާނެއެވެ. ޑިރެކްޓަރުންނަށް ކުރިން ލިބުނީ 18801 ރުފިޔާއެވެ. ނަމަވެސް މިހާރު 25168 ރުފިޔާ ލިބޭނެއެވެ. އެސިސްޓެންޑް ޑިރެކްޓަރުންނަށް ކުރިން 15167 ރުފިޔާ ލިބުނުއިރު މިހާރު 25168 ރުފިޔާ ލިބޭނެއެވެ. އަދި 12182 ރުފިޔާ ލިބުނު އެންމެ ދަށް ރޭންކް ޖީއެސް 4 އެސިސްޓެންޑް ސޯޝަލް ޕްރޮޓެކްޝަން އޮފިޝަލުންނަށް މިހާރުގެ ބަދަލާއި އެކު 13324 ރުފިޔާ ލިބޭނެއެވެ.

"އަޅުގަނޑު ފާހަގަކޮށްލާނަން ސޯޝަލް ވޯކަކީ ހަމަ ވަރަށް ޓެކްނިކަލް މަސައްކަތެއް. މިހެން މިދަންނަވަނީ މުޖްތަމައުގަ ތިބި އެންމެ ނާޒުކު ފަރާތްތަކާއެކު މަސައްކަތް ކުރަން މިޖެހެނީ. އެފަރާތްތަކުގެ ހައްގުތައް ރައްކާތެރި ކުރުމާ، ދިމާވާ ކޮންމެ ކަމެއްގަވެސް ދަތިތަކެއް އުޅޭކަމުގަ ވާނަމަ އެތަނަކަށް އަޅުގަނޑުމެން ދާން އެބަޖެހޭ. އެހެންވީމަ މިކަމަކީ ވަކި ޚާއްސަ ތަމްރީން ތަކެއް ލިބިގެން ވަކި ޚާއްސަ ދާއިރާ ތަކަކުން ކިޔަވައިގެން ނޫނީ ކުރެވޭނެ ކަމެއް ކަމަކަށް އަޅުގަނޑުމެން ނުދެކެން". ލީނާ ވިދާޅުވިއެވެ.

މީގެކުރިން އޮތް އެންމެ ބޮޑު ގޮންޖެހުމަކީ މުވައްޒަފުން ލިބުމުގެ ދަތިކަންކަން ފާހަގަކުރައްވަމުން މިނިސްޓްރީން ވިދާޅުވީ މުސާރައަށް ގެންނެވި ހެޔޮބަދަލާއެކު މުވައްޒަފުން ލިބުމުގައި ހުރި ދަތިތައް ހައްލުވެގެންދާނެ ކަމަށެވެ. އަދި އަމާޒަކީ ކުރިއަށް އޮތް ތަނުގައި ސޯޝަލް ވޯކަރުންވެސް ޝިފްޓް ޑިއުޓީތަކަށް ބަހާލައިގެން އޮފީހުގައި ތިބެގެން ޚިދުމަތް ދެވޭނެ އިންތިޒާމެއް ހަމަޖެއްސުން ކަމަށް މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސާރވިސަސް އިން ވިދާޅުވެއެވެ.