ސިފްކޯ ފްލެޓް ލިބުނު 68 ފަރާތަކާއެކު އެއްބަސްވުން ހަދައިފި
-
ސިފްކޯ ހިޔާ ލިބުނު 10 ފަރާތަކަށް ތަޅުދަނޑި ހަވާލުކުރެވިއްޖެ
-
22 ފަރާތަކަށް މިއަދު ތަޅުދަނޑި ހަވާލުކުރާނެ
ސިފައިންނަށް ބޯހިޔާވަހިކަން ފޯރުކޮށްދިނުމަށް އިމާރާތްކޮށްފައިވާ ސިފްކޯ ހިޔާ ފްލެޓްގެ އެއްބަސްވުން މިހާތަނަށް 68 ފަރާތަކާއެކު ޤާއިމްކޮށްފައިވާ ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފުން ވިދާޅުވީ، ސިފްކޯ ހިޔާގެ ރެސިޑެންޝަލް މަސައްކަތްތައް ނިމުމާއެކު ސިފްކޯ ފްލެޓްލިބިފައިވާ ފަރާތްތަކަށް ތަން ހަވާލުކުރުމަށް ގުރުއަތުލުން ބާއްވައި ލިބޭތަން ކަނޑައެޅުމުގެ ކަންކަން ކުރިއަށް ގެންދަވާފައިވާކަމަށެވެ. އަދި އެގްރިމެންޓްތައް ހެދުމުގެ ކުރިން، އެޕާޓްމަންޓްތައް ބަދަލުކުރަން ބޭނުންވާ ފަރާތްތަކަށް އެފުރުޞަތުދެއްވުމަށްފަހު އެއްބަސްވުން ޤާއިމްކޮށް ތަން ޙަވާލުކުރަން ފަށާފައިވާ ކަމަށް އެމްއެންޑީއެފުންވަނީ ވިދާޅުވެފައެވެ.
އެގޮތުން މިހާތަނަށް 68 ފަރާތަކާއިއެކު އެއްބަސްވުން ޤާއިމްކޮށްފައިވާކަމަށް އެމްއެންޑީއެފުން ވިދާޅުވެއެވެ. އަދި 10ފަރާތަކަށް މިހާރު ތަޅުދަނޑި ޙަވާލުކޮށްފައިވާއިރު އިތުރު 22 ފަރާތަކަށް މިއަދުގެ ވަގުތެއްގައި ތަޅުދަނޑި ޙަވާލުކުރެވޭނެ ކަމަށް އެމްއެންޑީއެފުންވަނީ ވިދާޅުވެފައެވެ.
އެމްއެންޑީއެފުން ވިދާޅުވީ ސިފްކޯ ހިޔާގެ ފްލެޓްތައް ލިބިފައިވާ ފަރާތްތަކާއި ތަން ޙަވާލުކުރުމުގެ މަސައްކަތުގެ ދަށުން ޚިދުމަތުގައި މިވަގުތު ތިބި ސިފައިންނާއިއެކު އެގްރިމެންޓްކޮށް ނިމުމުން ޚިދުމަތުން ވަކިވެފައިވާ ފަރާތްތަކާއި އެގްރިމެންޓްކޮށް ތަން ޙަވާލުކުރަން ފެށޭނެކަމަށެވެ.
ސިފްކޯ ހިޔާ ފްލެޓްލިބުނު ފަރާތްތަކާއެކު އެއްބަސްވުން ޤާއިމްކުރުމުގެ މަސައްކަތް ކޮންމެދުވަހަކުވެސް ކުރިއަށްދާ ކަމަށާއި، އެގްރިމެންޓްތަކުގައި ސޮއިކޮށް ތަން ޙަވާލުކުރުމުގައި ސިފްކޯގެ މުވައްޒަފުން މަސައްކަތް ކުރަމުންދާކަމަށް އެމްއެންއެންޑީއެފުން ވިދާޅުވެއެވެ.
"ސިފްކޯ ހިޔާ"ގައި ހިމެނެނީ 330 ފްލެޓެވެ. މިއީ މުޅިން 3 ކޮޓަރީގެ އެޕާޓްމަންޓްތަކެވެ.