މާލީގޮތުން ކުރިމަތިވި ތަފާތު ގޮންޖެހުންތަކާއެކުވެސް، ފާއިތުވި 2 އަހަރުތެރޭ ޞިއްޙީ ދާއިރާއިންނާއި، ތަޢުލީމީ ދާއިރާއިން ފާހަގަކޮށްލެވޭ ފަދަ ޚިދުމަތްތަކެއް ސަރުކާރުގެ ފަރާތުން ރައްޔިތުންނަށް ފޯރުކޮށްދެވިފައިވާކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ."ރައީސް ޔާމީން 2018" އަށް ކެމްޕެއިން ލީޑަރުން ތައްޔާރުކުރުމަށް ބޭއްވި 3 ވަނަ މަހާސިންތާ ނިންމާލުމުގެ ގޮތުން ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރާއްޖޭގެ ޞިއްޙީ ދާއިރާއާއި ތަޢުލީމީ ދާއިރާ ކުރިއެރުވުމަށް ފާއިތުވި އަހަރުތަކުގެ ތެރޭ އެންމެ އެދެވޭގޮތުގައި މަސައްކަތް ކުރެވިފައިނެތުމުގެ ސަބަބުން، މި 2 ދާއިރާއަށްވެސް ރައްޔިތުންގެ އިތުބާރު ގެއްލި، ވަރަށް ގިނަ ފާޑުކިޔުންތަކެއް އަމާޒުވެގެންދިޔަކަމަށެވެ. އެހެންނަމަވެސް ރާއްޖެއަކީ މާލީގޮތުން އެހާ ތަނަވަސް ޤައުމަކަށް ނުވިނަމަވެސް، ރާއްޖޭގައިވެސް ލިބެންހުރި ވަސީލަތްތަކުގެ ބޭނުންކޮށްގެން، ފާއިތުވި 2 އަހަރުތެރޭ ޞިއްޙީ ދާއިރާއާއި ތަޢުލީމީ ދާއިރާ ކުރިއެރުވުމަށް ތަފާތު ގިނަ މަސައްކަތްތަކެއް ސަރުކާރުން ކުރައްވާފައިވާކަމަށް އެމަނިކުފާނު ވިދާޅުވިއެވެ.ރައީސް ޔާމީން ވިދާޅުވީ، ރާއްޖޭގައި މީހުން ދިރިއުޅޭ ހުރިހާ ރަށެއްގައި ތަޢުލީމާއި، ޞިއްޙީ ޚިދުމަތްތައް އެއް ފެންވަރެއްގައި ފޯރުކޮށްދިނުމަކީ ކޮންމެ ސަރުކާރަކަށްވެސް ދިމާވާނެ ވަރަށް ބޮޑު ގޮންޖެހުމެއްކަމަށެވެ. މި 2 ދާއިރާ ކުރިއެރުވުމަށް ސަރުކާރުން ކުރައްވަމުންދާ މަސައްކަތްތަކަށް އަލިއަޅުއްވާލައްވަވާ ވާހަކަފުޅު ދައްކަވަމުން ރައީސް ޔާމިން ވިދާޅުވީ، ބޭރުގެ ސުޕަރ ސްޕެޝަލިސްޓުން ރާއްޖެ ގެނެސް، 6000 އަށް ވުރެގިނަ ބަލިމީހުންގެ މެޑިކަލް ޓެސްޓުތައް ހަދާފައިވާކަމަށެވެ. އަދި ރާއްޖޭގެ ހުރިހާ އަތޮޅެއްގައި ސީ އެމްބިއުލާންސްގެ ޚިދުމަތް ފެށުމާއި، މީހުން ދިރިއުޅޭ ކޮންމެ ރަށެއްގައި އާސަންދައިގެ ޚިދުމަތްދޭ ބޭސްފިހާރައެއް ހުޅުވުން އަދި، ސަރުކާރުގެ ޚަރަދުގައި ކިޑްނީ ޓްރާންސްޕްލާންޓް ކުރުން ފަދަ ޚިދުމަތްތައް ތަޢާރަފުކުރެވިފައިވާކަމަށް ރައީސް ޔާމީން ވިދާޅުވިއެވެ.ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، ރާއްޖޭގެ ތަޢުލީމީ ދާއިރާ ކުރިއެރުވުމަށްވެސް މާލީގޮތުންނާއި، އުމްރާނީގޮތުންވެސް ގިނަ ގުނަ މަސައްކަތްތަކެއް ފާއިތުވި 2 އަހަރު ތެރޭ ސަރުކާރުން ކުރައްވާފައިވާކަމަށެވެ. އެގޮތުން 400 އަށްވުރެ ގިނަ ކްލާސްރޫމް އަދި 19 ހޯލް އިމާރާތްކޮށް، ކޮމްޕިއުޓަރު ލެބާއި، ސައިންސް ލެބްތައް އިތުރުކުރުން ފަދަ މަސައްކަތްތައް ސަރުކާރުން ކުރައްވާފައިވާކަމަށް އެމަނިކުފާނު ވިދާޅުވިއެވެ. އަދި ސްކޫލްތަކުގައި މަސައްކަތްކުރާ ޓީޗަރުންނަކީ އެންމެ ދަށްވެގެން ޑިޕްލޮމާ ފެންވަރަށް ކިޔަވާފައިތިބި ބަޔަކަށް ހައްދަވާފައިވާކަންވެސް އެމަނިކުފާނު ފާހަގަކުރެއްވިއެވެ. މީގެ އިތުރުން އިސްލާމީ ތަޢުލީމު ކުރިއެރުވުމަށް ރާއްޖޭގައި ފުރަތަމަ ފަހަރަށް އިސްލާމިކް ޔުނިވަރސިޓީއެއް ޤާއިމުކުރައްވާ، މުހިއްމު މަސައްކަތްތަކެއް ކުރައްވަމުންގެންދަވާކަމަށްވެސް ރައީސް ވިދާޅުވިއެވެ.