5 އަހަރުތެރޭ ރައްޔިތުންގެ އާމްދަނީ 5 ގުނަ އިތުރުކުރާނަން: އިލްޔާސް

ފަސް އަހަރު ދުވަހުގެތެރޭ ރައްޔިތުންގެ އާމްދަނީ ފަސް ގުނަ އިތުރުކުރައްވާނެކަމަށް، ދަ ޑިމޮކްރެޓްސް ގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވެއްޖެއެވެ. އިލްޔާސް މިހެން ވިދާޅުވީ ސަލްޓަން ޕާކުގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.

އިލްޔާސް ވިދާޅުވީ، ރާއްޖޭގެ ދައުލަތުގެ އާމްދަނީ މިދިޔަ 12 އަހަރުތެރޭ މަތިވެގެންދިޔަކަމުގައި ވީނަމަވެސް، ރައްޔިތުންގެ އާމްދަނީ އިތުރުނުވާކަމަށެވެ. އިލްޔާސް ވިދާޅުވީ، ޑިމޮކްރެޓްސްގެ ވެރިކަމެއްގެ 5 އަހަރުތެރޭ، ރައްޔިތުންގެ އާމްދަނީ ފަސްގުނަ އިތުރުކުރައްވާނެކަމަށެވެ.

"ދިވެހިރާއްޖޭގެ ދައުލަތުގެ އާމްދަނީ، މިދިޔަ 10، 12 އަހަރުތެރޭ 7 ބިލިޔަނުން، 30 ބިލިޔަނަށް އަރައިފި. މި 7 ބިލިއަން، 30 ބިލިއަނަސް އެރިއިރު، ދިވެހި އާއިލާތަކުގެ އާމްދަނީ، ފަރުދީ ތަނަވަސްކަމެއް ލިބުނީ ކިހާވަރަކަށްތޯ ނޫންތޯ އަމިއްލަ ނަފްސާ ސުވާލުކުރަން ޖެހިފަ މިއޮތީ. އަޅުގަންޑުމެންނަށް ސާފުކޮށް އެންގޭ ކަމަކީ، އެއްވެސް މީހެއްގެ، އެއްވެސް އާއިލާއެއްގެ ފަރުދީ ތަނަވަސްކަން އިތުރުނުވާކަން." އިލްޔާސް ވިދާޅުވިއެވެ.

އިލްޔާސް ވިދާޅުވީ، އެމަނިކުފާނުގެ 5 އަހަރގެ ވެރިކަން ނިމޭއިރު،، މިހާރު ރާއްޖޭގައިހުރި 911 ގެސްޓްހައުސް، 75،000 އަށް އިތުރުކުރާނެކަމަށާއި، ރާއްޖޭގެ ހުރިހާ ރައްޔިތުންނަށް އޭގެ މަންފާ ލިބިގެންދާނެކަމަށެވެ. ޑިމޮކްރެޓްސްގެ ވެރިކަމެއްގައި ވިޔަފާރިއެއް ފެށުމަށް ނުވަތަ ވޯކްޝޮޕެއްފަދަ ހަރަކާތެއް ހިންގުމަށް، ސަރުކާރައް ޕްރޮޕޯޒަލްއެއް ހުށަހެޅުމުން އެކަން ކުރަން ފައިސާއާއި ވަސީލަތްތައް ފޯރުކޮއްދޭނެކަމަށްވެސް އިލްޔާސް ވިދާޅުވިއެވެ.

އިލްޔާސް ވަނީ އެތެރޭގެ އުދުހުންތަކުގެ ޓިކެޓު އަގުހެޔޮކުރާނެ ކަމަށާއި، ޓްރެވަލް އޭޖެންޓުންނަށް ފުރުސަތުތަކާއި ވަސީލަތްތައް އިތުރުކުރާނެކަމަށްވެސް ވިދާޅުވެފައެވެ. އަދި ރިސޯޓުގައި މަސައްކަތްކުރާ މީހުންގެ އާއިލާތަކަށް، ކައިރި ރަށްތަކުން ބޯހިޔާވަހިކަން ފޯރުކޮށްދެއްވާނެކަމަށްވެސް އިލްޔާސް ވިދާޅުވިއެވެ.

މަހުގެ އަގު 25 ރުފިޔާއަށް މަތިކުރާނެކަމަށާއި، މަސް ކައްކައި ވިއްކާ މީހުންނަށް އެކަންކުރަން ވަސީލަތްތައް ފޯރުކޮއްދޭނެކަމަށްވެސް އިލްޔާސް ވިދާޅުވިއެވެ. އަދި އަމިއްލަ މަސައްކަތްކުރާ މީހުންގެ އާމްދަނީ އިތުރުކުރެވޭނެ ނިޒާމެއް ގާއިމްކޮށް، ރަސްމީ އާމްދަނީއެއް ގޮތުގައި ކަނޑައަޅައި، އަމިއްލަ މަސައްކަތްތެރިންނަށް ވަކި ބޭންކިންގ ސެކްޓާއެއް ގާއިމްކުރައްވާނެ ކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު ވިދާޅުވިއެވެ.