ކޯނީ ރިޕޯޓު ގެއްލިއްޖެ، އެ މައްސަލަ ފުލުހަށް ހުށައަޅައިފިން: ރައީސް

އެމްޑީޕީގެ ފުރަތަމަ ވެރިކަން ނިމިގެންދިޔަ ގޮތް ތަޙްޤީގުކުރުމަށް އުފެއްދި ކޮމިޝަން އޮފް ނެޝަނަލް އިންކުއަރީ ކޯނީ ރިޕޯޓު މިހާރު ނެތްކަމަށާއި، އެ ރިޕޯޓް ހޯދުމަށް ފުލުހަށް ހުށައަޅާފައިވާކަމަށް، އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހދ. ނޭކުރެންދޫގައި އެމްޑީޕީން ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. މި ޖަލްސާގައި ރައީސް ވިދާޅުވީ ކުރީގެ ރައީސް މުހައްމަދު ނަޝީދުގެ ވެރިކަން ނިމިގެން ދިޔަ ގޮތް ތަހުގީގު ކުރަން އެކުލަވާލީ ރިޕޯޓް މިހާރު ނެތްކަމަށެވެ. އެ ރިޕޯޓު ހޯދަން ފުލުހަށް ހުށައަލާފައިވާކަމަށާއި، އެއީ ދައުލަތުގެ ބޮޑު ސިއްރެއް ކަމަށް ރައީސް ވިދާޅުވިއެވެ. އެކަން ބަލާ ތަހުގީގުކުރުމުން އޭގެ ޒިންމާވާ މީހުން އެނގޭނެކަމަށް ރައީސް ވިދާޅުވިއެވެ.

"ކޯނި ރިޕޯޓް އޮތްތޯ ބައްލަވާ. އެ ވީތަނެއް ނޭގެ. އެ މައްސަލަ ބަލައްވަން މިހާރު ފުލުހަށް ވާނީ ހުށައަޅާފައި. އެއީ ދަޢުލަތުގެ ކިހާ ބޮޑު ސިއްރެއްތޯ. މިއަދަކު އެއެއް ނެތް. އެކަން ބަލާ ތަޙްޤީގުކުރީމަ އެނގޭނެ އެގައި ޒިންމާ ވާމީހުން. މިއީ އަޅުގަނޑުމެން ފުންކޮށް ވިސްނަންޖެހޭކަމެއް."އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިހް ވިދާޅުވިއެވެ.

ކޮމިޝަން އޮފް ނެޝަނަލް އިންކުއަރީ އުފެއްދީ ފެބްރުއަރީ 7 ގައި ހިންގި ކަންތައްތަކަށްފަހު ކުރީގެ ރައީސް މުޙައްމަދު ނަޝީދު އިސްތިއުފާ ދެއްވީ މަޖުބޫރީ ހާލަތެއްގައި ކަމަށާއި އެއީ ބަޣާވާތެއް ކަމަށް އެމްޑީޕީން ތުހުމަތުކުރުމުން އެ މައްސަލަ ބެލުމަށް އުފެއްދެވި މިނިވަން ކޮމިޝަނެކެވެ. އެ ކޮމިޝަނުން އެކުލަވާލި ރިޕޯޓްގައި ވާގޮތުން ރައީސް ނަޝީދުގެ ވެރިކަން ނިމުނީ ގާނޫނުއަސާސީއާއި ގާނޫނާ އެއްގޮތްވާ ގޮތުގެ މަތިންނެވެ.