އެމްއޭސީއެލް އިން އޭޓީސީ ރާޑާ ކޮންޓްރޯލް ޓްރެއިނިންއެއް ފަށައިފި

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލް އިން އޭޓީސީ ރާޑާ ކޮންޓްރޯލް ޓްރެއިނިން (އޭރިއާ ކޮންޓްރޯލް ސަވައިލަންސް ކޯސް - އައިކާއޯ 054) ކޯހެއް ފަށައިފިއެވެ. މިއީ ރާއްޖޭގައި މިފަދަ ކޯހެއް ކުރިއަށްގެންދާ ފުރަތަމަ ފަހަރެވެ.

އެމް.އޭ.ސީ.އެލްއިން މި ކޯސް ފަށާފައިވަނީ 6 ބައިވެރިންނާއެކުއެވެ. 8 ހަފުތާގެ މުއްދަތަކަށް ކުރިއަށްގެންދާގޮތަށް ފަރުމާކޮށްފައިވާ މި ކޯސް ނިމޭނީ އަންނަ މަހުގެ 21 ގައިކަމަށް އެމް.އޭ.ސީ.އެލްއިން ބުނެއެވެ.

މި ކޯހުގައި ކިޔަވައިދޭނީ ރާއްޖެއިން ބޭރުގެ މިކަމަށް ޤާބިލް ފަރާތްތަކެވެ. އެމް.އޭ.ސީ.އެލްއަކީ ރާއްޖޭގެ ހުރިހާ އެއަރޕޯޓަކަށް އެއަރ ނެވިގޭޝަންގެ ޚިދުމަތް ފޯރުކޮށްދޭ ކުންފުންޏަށްވުމާއެކު، މި ކޯހަކީ ކުންފުނީގެ ޚިދުމަތްތައް ހަރުދަނާކޮށް ފުޅާކުރުމަށް ކުރަމުންދާ މަސައްކަތުގެ ތެރެއިން މުހިންމު މަސައްކަތްތެއްކަމަށް އެމްއޭސީއެލްއިން ބުނެއެވެ.

އެމް.އޭ.ސީ.އެލް އިން ވަނީ 2023 ވަނަ އަހަރު އެއަރ ޓްރެފިކް ކޮންޓްރޯލް ސެންޓަރު ލައިސަންސްގެ 2 ކޯހެއްވެސް އިފްތިތާހުކޮށްފައެވެ. އެއީ އޭރިއާ ކޮންޓްރޯލް ޕްރޮސީޖަރަލް ކޯހާއި، އެޕްރޯޗް ކޮންޓްރޯލް ޕްރޮސީޖަރަލް ކޯހެވެ. މިއީ އެމް.އޭ.ސީ.އެލް އިން އެއްފަހަރާ ދެ އޭޓީސީ ރޭޓިން ޓްރެއިނިން ކުރިއަށް ގެންދިޔަ ފުރަތަމަ ފަހަރުކަމަށް އެކުންފުނިން ބުނެފައިވެއެވެ.

ވެލާނާ އިންޓަނޭޝަނަލް އެއަރޕޯޓުގައި ރާއްޖޭގެ ފުރަތަމަ އެއަރ ޓްރެފިކް ކޮންޓްރޯލް (އޭޓީސީ) ޓަވަރު ސިމިއުލޭޓަރު އެމް.އޭ.ސީ.އެލް އިން ހުޅުވީ 2021 ވަނަ އަހަރުއެވެ. މި ސިމިއުލޭޓަރަކީ އެއަރ ޓްރެފިކް ކޮންޓްރޯލް އޮފިސަރުން ތަމްރީނު ކުރުމުގައި މުހިންމު ދައުރެއް އަދާކުރާ ސިމިއުލޭޓަރެކެވެ.