ރިވެލި ބީޗް ކްލަބް ރެސްޓޯރަންޓް ހުޅުވައިފި

ރިވެލި ބީޗް ކްލަބް ރެސްޓޯރަންޓް ހުޅުމާލޭގައި ހުޅުވައިފިއެވެ. މި ރެސްޓޯރަންޓް ހުޅުވާފައިވަނީ ރޭގައި މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި އެޗްޑީސީގެ މެނޭޖިންގ ޑިރެކްޓަރ އަޙްމަދު އާތިފްއެވެ.

މި ރެސްޓޯރަންޓް ހުންނާނީ ހުޅުމާލޭ ރުއްގަނޑު 1 ގައެވެ. މިތަން ހުޅުވާފައި ހުންނާނީ ހެނދުނު 6 އިން ދަންވަރު 1 އަށެވެ.

ޕީއެސްއެމް ނިއުސްއަށް މައުލޫމާތުދެއްވަމުން ރިވެލި ބީޗް ކްލަބް އެންޑް ރެސްޓޯރަންޓްގެ ޖެނެރަލް މެނޭޖަރ އާދަމް ޤާސިމް ވިދާޅުވީ، އެތަނުން އެއްފަހަރާ 340 މީހުންނަށް ހިދުމަތް ދެވޭނެކަމަށެވެ. 3 ފަންގިފިލާގެ މި ރެސްޓޯރަންޓުން، ޓޭކްއަވޭގެ ހިދުމަތާއި، ވިޔަފާރި ބައްދަލުވުންތަކާއި، ޕާޓީތަކާއި އަދި ޕްރައިވެޓް އެހެނިހެން އިވެންޓްތައް ބޭއްވޭނެ އިންތިޒާމް ވަނީ ހަމަޖައްސާފައެވެ.

އާދަމް ޤާސިމް ވިދާޅުވީ، ރެސްޓޯރަންޓް ފަރުމާކޮށްފައިވާގޮތުން، ޚިދުމަތްހޯދުމަށް އެތަނަށް ފުރަތަމަ ވަންނައިރު ފެންނަނީ އިހު ޒަމާނުގެ ގޮތަކަށްކަމަށެވެ. އަދި އެތެރެއަށް ވަންނައިރު ފެންނާނީ ޒަމާނީ ގޮތަކަށްކަމަށެވެ.

މިތަނުން އިންޓަނޭޝަނަލް ކްޒީންތަކުގެ ކެއުންތައް ލިބެންހުންނާނެއެވެ. އަދި ދިވެހި ބައެއް ކެއުންތައްވެސް ހުންނައިރު ކެއުންތައް ހުންނާނީ ދިވެހިންނަށް އެންމެ ކަމުދާނެފަދަ ގޮތަކަށްކަމަށް ރެސްޓޯރަންޓުން މައުލޫމާތުދެއެވެ.

މި ރެސްޓޯރަންޓް ހުޅުވުމާއި ގުޅިގެން މިއަދު ހަވީރު ކުޑަކުދިންގެ ހަވީރެއް އޮންނާނެއެވެ. މި ހަވީރުގައި ކުޑަކުދިން ޝައުގުވެރިވާނެފަދަ ގިނަ ހަރަކާތްތަކެއް ކުރިއަށްދާނެކަމަށް ރިވެލި ބީޗް ކްލަބް ރެސްޓޯރަންޓް މައުލޫމާތުދެއެވެ.

އޭގެތެރޭގައި ފޭސް ޕެއިންޓާއި، މެޖިކް ޝޯއާއި، އާރޓް ފަދަ ހަރަކާތްތައް ހިމެނެއެވެ. މި ހަރަކާތުގައި ކުޑަކުދިންނާއި އާއިލާތަކަށްވެސް ބައިވެރިވެވޭނެކަމަށް ރިވެލި ބީޗް ކްލަބް ރެސްޓޯރަންޓްއިން ވަނީ ބުނެފައެވެ.