މޯލްޑިވިއަން އައިޑަލް ގާލާ ރައުންޑުގެ 3 ވަނަ ޝޯވގައި ވާދަކުރި ގަދަ 10 ބައިވެރިންގެ ތެރެއިން ގާލާ ރައުންޑުގެ 4 ވަނަ ޝޯވއަށް ދަތުރުކުރި ބައިވެރިން މިރޭ އިޢުލާން ކޮށްފައިއެވެ. ގާލާ ރައުންޑުގެ ރޭގެ ޝޯވގައި 10 ބައިވެރިންގެ ހުށައެޅުން ފެނިގެންގޮސްފައިވާއިރު، 4 ވަނަ ޝޯވއަށް ނުދެވި، މި މުބާރާތުން ވަކިވާން ޖެހުނު ބައިވެރިޔާއަކީ އަހުމަދު ނަޒީޙުއެވެ.މޯލްޑިވިއަން އައިޑަލް ގާލާ ރައުންޑުގެ 3 ވަނަ ޝޯވ "މޫވީ ނައިޓް" މި ތީމަށް ޚާއްސަކޮށްފައިވާއިރު، ރޭގެ ޝޯވގައި ބައިވެރިން ވަނީ ދިވެހި ފިލްމުތަކުން ފާހަގަކޮށްލެވުނު ހިތްގައިމު ރީތި ލަވަތަކެއް ހުށައަޅާދީފައެވެ. އަދި މިރޭވެސް ބައިވެރިންގެ ފަރާތުން ފޯރިގަދަ ހުށައެޅުންތަކެއް ފެނިގެންގޮސްފައިވެއެވެ. މި ޝޯވއަށް ބެލުންތެރިން ފޮނުވާ ވޯޓަކީ ޞައްޙަ ވޯޓެއްކަން ޔަޤީންކުރުމަށާއި، ވޯޓު ގުނުން ކުރިއަށް ދަނީ އެންމެ އިންސާފުވެރިކޮށްތޯ ބެލުމުގެ މަސައްކަތް ކުރައްވަނީ އޭ.އެޗް އެސޯސިއޭޓްސް، އެލް.އެލް.ޕީ ނަމަކަށް ކިޔާ މިނިވަން އޮޑިޓް ފާމެއްގެ ފަރާތުންނެވެ. 12 ބައިވެރިންނާއެކު ފެށުނު މޯލްޑިވިއަން އައިޑަލް ގާލާ ރައުންޑުގެ މިހާތަނަށް އައިއިރު، ނަޒީޙުގެ އިތުރުން، 2 ބައިވެރިޔަކު ވަނީ މި މުބާރާތުން ވަކިވެފައެވެ. އެ ދެ ބައިވެރިންނަކީ މުހައްމަދު އިފްހާމް އަޝްފާޤް އަދި ފާތުމަތު ނައްބަތެވެ. ފްރެންޗައިޒް އުސޫލުން ރާއްޖޭގައި ބާއްވާ އެންމެ އަގުބޮޑު ރިއަލިޓީ ޝޯވ "މޯލްޑިވިއަން އައިޑަލް"ގެ ޝޯވތަކަށް ބެލުންތެރިންގެ ފަރާތުން ވަރަށް ބޮޑު ތަރުޙީބެއް ލިބެމުން އަންނަކަމަށާއި، ސޯޝަލް މީޑިއާއާއި އެހެނިހެން ގޮތްގޮތުން މިޝޯވއަށް ބެލުންތެރިންގެ ފަރާތުން ރަނގަޅު ކޮމެންޓުތަކެއް ލިބެމުންދާކަން އައިޑަލްގެ ޕްރޮޖެކްޓް ޓީމުން ފާހަގަކުރެއެވެ. މޯލްޑިވިއަން އައިޑަލްގެ ޓައިޓަލް ހޯދާ ފަރާތަކަށް ގްރޭންޑް ޕްރައިޒެއްގެ ގޮތުގައި 250،000 ރުފިޔާގެ ފައިސާގެ އިނާމެއް ވަނީ ކަނޑައަޅާފައެވެ. މިހާރު ތާވަލްކުރެވިފައިވާގޮތުންނަމަ މޯލްޑިވިއަން އައިޑަލްގެ ގަދަ 3 ބައިވެރިންނާއެކު، މި ޝޯވގެ ގްރޭންޑް ފިނާލޭ ދެއްކުމަށް ހަމަޖެހިފައިވަނީ އަންނަ އޭޕްރީލްމަހުގެ 30 ވަނަ ދުވަހުއެވެ.