މިއަހަރުގެ ޖުލައި މަހު ރާއްޖެއަށް 145000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
މެއި އަދި ޖޫން މަހު ރާއްޖެ ޒިޔާރަތްކުރި ފަތުރުވެރިންގެ އަދަދު ދަށްވި ނަމަވެސް ޖުލައި މަހު ވަނީ ފަތުރުވެރިން އަންނަ އަދަދު ވަނީ އިތުރުވާންފަށާފައެވެ.
ޓޫރިޒަމް މިނިސްޓްރީން އެންމެ ފަހުން ނެރެފައިވާ ތަފާސްހިސާބުތައް ދައްކާގޮތުން ޖުލައި މަހު ރާއްޖެއަށް މުޅި ޖުމްލަ 145،629 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ ޖުލައި މަހާއި އަޅާބަލާއިރު 9 އިންސައްތައިގެ ކުރިއެރުމެކެވެ. މިދިޔަ އަހަރުގެ ޖުލައި މަހު ރާއްޖެއަށް އައިސްފައިވަނީ 133،561 ފަތުރުވެރިންނެވެ.
މިމަހުގެ 2 ވަނަ ދުވަހާއި ހަމައަށް ރާއްޖެއަށް މުޅި ޖުމްލަ 1،086،074 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 13.7 އިންސައްތައިގެ އިތުރުވުމެކެވެ.
އަހަރުގެ މިހާތަނަށް އެންމެ ގިނަ ފަތުރުވެރިން އައި 5 ޤައުމު:
* ރަޝިއާ - 128،404 ފަތުރުވެރިން
* އިންޑިއާ - 123،151 ފަތުރުވެރިން
* ޗައިނާ - 94،476 ފަތުރުވެރިން
* އިނގިރޭސިވިލާތް - 90،897 ފަތުރުވެރިން
* ޖަރުމަނުވިލާތް - 73،318 ފަތުރުވެރިން
ސަރުކާރުން މިހާރު އަމާޒުހިފާފައިވަނީ މިއަހަރު ރާއްޖެއަށް 1.9 މިލިއަން ފަތުރުވެރިން ގެނައުމަށެވެ. މިހާރު އެވްރެޖްކޮށް ދުވާލެއްގެ މައްޗަށް ރާއްޖެއަށް އަންނަނީ 5419 ފަތުރުވެރިންނެވެ.
ތަފާސްހިސާބުތައް ދައްކާގޮތުން ރާއްޖޭގައި މިވަގުތު ފަތުރުވެރިންނަށް ހިދުމަތް ދިނުމަށް 1257 ތަނެއް ވަނީ ހުޅުވާފައެވެ. އެއީ މުޅި ޖުމްލަ 61،564 އެނދެވެ.