މޯލްޑިވިއަނުން މާފަރާއި މަޑިވަރަށް ކުރާ ދަތުރުތައް އިތުރުކުރަނީ

ޤައުމީ އެއަރލައިން މޯލްޑިވިއަނުން ނ. މަފަރާއި ޅ. މަޑިވަރަށް ކުރާ ދަތުރުތައް އިތުރުކުރުމަށް ނިންމައިފިއެވެ.

މޯލްޑިވިއަން ހިންގާ އައިލެންޑް އޭވިއޭޝަނުން ބުނީ މިމަހުގެ 20 ވަނަ ދުވަހުން ފެށިގެން މަޑިވަރާއި މާފަރަށް ކުރާ ދަތުރުތައް އިތުރުކުރާނެކަމަށެވެ.

ޕީއެސްއެމް ނިއުސްއަށް މައުލޫމާތުދެމުން އައިލެންޑް އޭވިއޭޝަނުން ބުނީ ދަތުރުތައް އިތުރުކުރަނީ މި މަންޒިލްތަކަށް އޮތް ޑިމާންޑް ބޮޑުވުމުންކަމަށެވެ.

މޯލްޑިވިއަނުން މި މަންޒިލްތަކަށް ކުރާ ދަތުރުތަކަށް މިމަހުގެ 20 ވަނަ ދުވަހުން ފެށިގެން އިތުރުކުރާއިރު، މާލެއިން ސީދާ މާފަރަށް އަދި މާފަރުން މާލެއަށް އާދެވޭގޮތަށް ޑައިރެކްޓްކޮށް ކޮންމެ ދުވަހަކުވެސް ދަތުރުކުރާނެއެވެ. އަދި މާލެއިން މަޑިވަރަށް، އަދި މަޑިވަރުން މާފަރަށްގޮސް މާލެ އާދެވޭގޮތަށްވެސް ދަތުރުތަކެއް ބާއްވާނެއެވެ. އެ އެއަރލައިނުން މިވަގުތު މި ދެ މަންޒިލަށްވެސް ކުރަނީ ދުވާލަކު 1 ދަތުރެވެ.

މޯލްޑިވިއަނުން އަބަދުވެސް ޑިމާންޑަށް ބެލުމަށްފަހު މަންޒިލްތަކަށް އިތުރު ފްލައިޓްތައް ބާއްވައެވެ. އެގޮތުން ޢީދާއި އަދި ޗުއްޓީ ބަންދާއި ދިމާކޮށްވެސް މޯލްޑިވިއަނުން ވަނީ ޑޮމެސްޓިކް އަދި އިންޓަރނޭޝަނަލް މަންޒިލްތަކަށް އިތުރު ފްލައިޓްތައް ބާއްވާފައެވެ.