ކޮމަންޑޫ ޖެޓީގެ ޝީޓް ޕައިލްއެއްގައި ޖެހި އެފްއެސްއެމްގެ ބޯޓެއް ފަޅައިގެން ގޮއްސި

ށ. ކޮމަންޑޫއަށް ތެޔޮ އަންލޯޑުކުރަމުން ދަނިކޮށް، އެ ރަށު ޖެޓީގެ ޝީޓް ޕައިލްއެއްގައި ޖެހި، އެފްއެސްއެމްގެ ތެޔޮ ބޯޓެއް ފަޅައިގެން ގޮސް ދިޔަވާން ފެށުމުން އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންއިން އެހީތެރިކަން ފޯރުކޮށްދީފިއެވެ.

މި ހާދިސާގެ މަޢުލޫމާތު އެމްއެންޑީއެފް ނޮދަން އޭރިއާ ކޯސްޓްގާޑް ފަސްޓް ސްކޮޑްރަންއަށް ލިބުމާއެކު، އެ ސަރަހައްދަށް ގޮސް އެހީތެރިކަން ފޯރުކޮށްދީފައިވާކަމަށް އެމްއެންޑީއެފްއިން ވިދާޅުވެއެވެ. އެއީ މިއަދު ހެނދުނު 10:00 ޖަހާއިރުއެވެ. އެމްއެންޑީއެފްއިން ބުނީ މި ހާދިސާގައި ނޮދަން އޭރިއާ ކޯސްޓްގާޑް ފަސްޓް ސްކޮޑްރަންގެ ޑައިވަރުންގެ ޓީމެއް އެ ސަރަހައްދަށްގޮސް ހަރަކާތްތެރިވެފައިވާކަމަށެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އެފްއެސްއެމްގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވީ، ބޯޓު ދިޔަވުން މިހާރު ކޮންޓްރޯލް ކުރެވިފައިވާކަމަށެވެ. ބައެއް ނޫސްތަކުގައި ބޯޓު އަޑިއަށްދާކަމަށް ރިޕޯޓްކޮށްފައިވީނަމަވެސް މިއީ ދޮގު މަޢުލޫމާތެއްކަމަށް ގަސަމް ވިދާޅުވިއެވެ.

ޝީޓް ޕައިލްގައި ޖެހި އެފްއެސްއެމްގެ ތެޔޮ ބޯޓުން 8 އިންޗި ވަރުގެ ތަނެއް ފަޅައިގެން ގޮސްފައިވާއިރު، ބޯޓު މިހާރު އޮތީ ށ. މަތިކޮމަންޑޫއަށް ބީއްސާލާފައެވެ.