އައްޑޫ ސިޓީގެ ހިތަދޫގައި މަރާލުމަށްފަހު އެއްލާލާފައި އޮއްވާ ފެނުނު ވިޔަފާރިވެރިޔާގެ މަރުގެ މައްސަލައިގައި އިތުރު ދެމީހަކު ހައްޔަރު ކޮށްފިއެވެ.
މި މައްސަލައާއި ގުޅިގެން ފުލުހުން މިރޭ ހައްޔަރުކުރައްވާފައި ވަނީ 20 އަހަރުގެ ފިރިހެނަކާއި، 25 އަހަރުގެ ފިރިހެނެކެވެ.
ހިތަދޫ ބުރުނީގޭ އުމުރުން 47 އަހަރުގެ ޢަލީ އަބްދުﷲގެ މަރާ ގުޅިގެން މީގެ ކުރިން އުމުރުން 29 އަހަރުގެ މީހަކާއި 39 އަހަރުގެ މީހަކު ހައްޔަރުކޮށްފައިވެއެވެ. މި 4 މީހުންގެ ތެރެއިން އުމުރުން 39 އަހަރުގެ މީހަކީ ޢަލީ އަބްދުﷲ އާއި އާއިލީ ގޮތުން ގުޅުން އޮންނަ މީހެއްކަމަށް މަޢުލޫމާތުލިބެއެވެ.
މަރުވެފައި އޮއްވާ ފެނުނު، ޢަލީ އަބްދުﷲގެ ފިހާރައިން ވަގަށް ނަގާފައިވާކަމަށް ބެލެވޭ ފައިސާތަކެއްވެސް ވަޅުލާފައި ހުއްޓާ ރޭ ފުލުހުން ވަނީ ހޯދާފައެވެ. ނަމަވެސް ފުލުހުން ހޯދާފައިވަނީ ކިހާ އަދަދެއްގެ ފައިސާއެއްކަމެއް ފުލުހުން ހާމަކޮށްފައެއް ނުވެއެވެ. އެހެންނަމަވެސް ގިނަ އަދަދެއްގެ ފައިސާ ފެނިފައިވާކަމަށް ފުލުހުން ވިދާޅުވެއެވެ.
އައްޑޫ ސިޓީ، ހިތަދޫ، ބުރުނީގެ، ޢަލީ ޢަބްދުﷲ މަރުވެފައި އޮއްވާ ފެނިފައިވަނީ މި މަހުގެ ދެވަނަ ދުވަހުގައެވެ. މި މަރާއި ގުޅިގެން އަލީ އަބްދުﷲ އެއްލާފައި އޮއްވާ ފެނުނު އަލަ އޮޅުވެސް ކޮނެ ތަޙްޤީގަށް ބޭނުންވާ ބައެއް ތަކެތި ފުލުހުން ހޯދާފައިވެއެވެ. އަދި ޙާދިސާ ތަޙުޤީޤު ކުރެއްވުމަށް މޯލްޑިވްސް ޕޮލިސް ސާވިސްގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ޚާއްޞަ ތަޙުޤީޤު ޓީމެއް އައްޑޫ ސިޓީގައި ދަނީ ޙަރަކާތްތެރި ވަމުންނެވެ.