އިންޑިއާގެ އެހީގައި ހިންގާ 9 މަޝްރޫޢެއްގެ އެއްބަސްވުމުގައި ސޮއިކޮށްފި

އިންޑިއާގެ އެހީގެ ދަށުން ރާއްޖޭގައި ކުރިއަށް ގެންދާ 9 މަޝްރޫޢުއެއްގެ އެއްބަސްވުމުގައި ސޮއިކުރައްވައިފިއެވެ. މި އެއްބަސްވުންތަކުގައި ސޮއިކުރައްވާފައިވަނީ ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. އެއްބަސްވުންތަކުގައި ސޮއިކުރެއްވުމަށް ބޭއްވި ރަސްމިއްޔާތުގައި އިންޑާގެ އެކްސްޓަރނަލް އެފެއަރޒް މިނިސްޓަރ ޑރ.އެސް.ޖައިޝަންކަރުވެސް ބައިވެރިވެވަޑައިގެންނެވިއެވެ.


ރާއްޖެއާއި އިންޑިއާއާއި ދެމެދު ޤާއިމްކުރި އެއްބަސްވުންތަކުގެ ތެރޭގައި ށ. ކަނޑިތީމުގައި ވޯލީ ކޯޓެއް ތަރައްގީކުރުމާއި، ށ. ފޯކައިދޫ އިޖުތިމާޢީ މަރުކަޒަށް ބޭނުންވާ ވަސީލަތްތައް ހޯދުމާއި، ރ. އުނގޫފާރުގައި ނަފްސާނީ ބަލިތަކަށް ޚާއްޞަ ޔުނިޓެއް ހެދުމާއި، މ. ދިއްގަރުގައި ގޭދޮށު މަސް ޕްލާންޓް ތަރައްޤީކުރުން ހިމެނެއެވެ. މީގެ އިތުރުން ތ. ވިލުފުށީ ސްކޫލް ޑިޖިޓަލައިޒްކުރުމާއި، ފ. ނިލަންދޫ ހޮސްޕިޓަލް ތަރައްގީކުރުމާއި، ސަރުކާރު ސްކޫލްތަކުގެ ކޮމްޕިއުޓަރު ލެބްތައް އަޕްގްރޭޑް ކުރުމާއި، އުތީމު ގަނޑުވަރުގެ ފުރާޅު ރައްކާތެރިކުރުމާއި، ގއ. ކޮނޑޭގެ މަގުބައްތި ޖެހުން ފަދަ މަޝްރޫޢުތައް ހިމެނެއެވެ.

މި އެއްބަސްވުންތަކުގައި ރާއްޖޭޣެ ފަރާތުން ސޮއިކުރެއްވީ، އިންޑިއާއަށް ކަނޑައަޅުއްވާފައި ހުންނަވާ ސަފީރު އިބްރާހީމް ޝަހީބެވެ. އަދި އިންޑިއާ ސަރުކާރުގެ ފަރާތުން ސޮއިކުރެއްވީ އިންޑިއާއިން ރާއްޖެއަށް ކަނޑައަޅަފައި ހުންނަވާ ސަފީރު މުނޫ މަހާވަރެވެ.

Today, #Maldives and #India exchanged 9 new MoUs under Phase II of the High Impact Community Development Projects Scheme. pic.twitter.com/D4eXnkcNnN

— Abdulla Shahid (@abdulla_shahid) July 11, 2023

މިއ ސޮއިކުރެއްވި އެއްބަސްވުންތަކާއި ގުޅޭގޮތުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، މ.ދިއްގަރުގައި ޤާއިމްކުރާ ގޭދޮށު މަސް ޕްލާންޓަކީ ސަރުކާރުން އިސްކަންދޭ މަޝްރޫޢެއްކަމަށެވެ. މިކަމުގެ ސަބަބުން ދެމެހެއްޓެނިވި ގޮތެއްގައި ބާނާ މަސް އެކި ބާވަތުގެ ތައްޔާރީ ކާނާގެ ގޮތުގައި ބާޒާރަށް ނެރުމަށް ރައްޔިތުންނަށް ދިމާވާ ގިނަ މައްސަލަތަކެއް ހައްލުވެގެންދާނެކަމަށް މިނިސްޓަރ ވިދާޅުވިއެވެ. އަދި ފ.ނިލަންދޫ ހޮސްޕިޓަލް އަޕްގްރޭޑްކުރުމާ ގުޅޭގޮތުން އިންޑިއާ ސަރުކާރާއެކު އެކުލަވާލި އެއްބަސްވުމުގެ ދަށުން ކުރިއަށްގެންދާ މަޝްރޫޢަކީ ޑަޔަލިސިސްގެ ޚިދުމަތް މާލެ ދަތުރުނުކޮށް އެރަށުން ލިބޭނޭ މަގެއް ޤާއިމު ކުރެވިގެންދާނެ މަޝްރޫޢެއްކަމަށާއި، އިންޑިއާގެ ހިލޭ އެހީގެ ދަށުން ރ.އުނގޫފާރު ހޮސްޕިޓަލުގައި ޤާއިމްކުރާ އައު މެންޓަލް ހެލްތު ޔުނިޓުގެ ސަބަބުން ރައްޔިތުންގެ ނަފްސާނީ ދުޅަހެޔޮކަމަށް ފޯރުކޮށްދޭ ޚިދުމަތްތައް ފަހިވެގެންދާނެކަމަށް މިނިސްޓަރ ޝާހިދު ވިދާޅުވިއެވެ. ސްކޫލް ކޮމްޕިއުޓަރ ލެބް އަޕްގްރޭޑް ކުރުމާބެހޭ އެއްބަސްވުމުގެ ދަށުން ސަރުކާރުގެ ސްކޫލްތަކުގެ މިހާރު ހުރި ކޮމްޕިއުޓަރ ލެބްތަކުގެ ފެންވަރު ރަނގަޅު ކުރެވިގެންދާނެކަމަށާއި، އުތީމު ގަނޑުވަރުގެ ފުރާޅު ރައްކާތެރި ކުރުމަށާއި އެސަރަޙައްދު ތަރައްޤީ ކުރުމަށް އިންޑިއާ އާއެކު ސޮއިކުރެވުނު އެއްބަސްވުމުގެ ސަބަބުން ދިވެހި އާސާރީ ބިނާތައް ރައްކާތެރި ކުރެވޭނެކަމަށްވެސް މިނިސްޓަރ ޝާހިދު ވިދާޅުވިއެވެ. އަދި މި އެއްބަސްވުމުގައި ސޮއިކުރުމުން ދޭހަވަނީ ދެޤައުމުގެ ދެމެދުގައި އޮތް ސަޤާފީ ކަންކަން ދިރުވާ އާލާކުރުމުގެ ރޫހުކަމަށްވެސް މިނިސްޓަރ ޝާހިދު ވިދާޅުވިއެވެ.

Wonderful to meet my dear friend @DrSJaishankar again - this time in Delhi!

Had a constructive discussion focusing on strengthening #MaldivesIndiaPartnership

We discussed:
1. Ongoing Grant and Credit scheme projects, and ways to further intensify development cooperation.

2.… pic.twitter.com/C1yBaKVx9V

— Abdulla Shahid (@abdulla_shahid) July 11, 2023

ފޮރިން މިނިސްޓަރ ޢަބްދުﷲ ޝާހިދު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ވަނީ އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ. ޖައިޝަންކަރާވެސް ބައްދަލުކުރައްވާފައެވެ. މި ބައްދަލުކުރެއްވުމުގައި އިންޑިއާގެ އެހީގެ ދަށުން ރާއްޖޭގައި ކުރިއަށް ގެންދާ މަޝްރޫޢުތަކާ ގުޅޭގޮތުން މަޝްވަރާ ކުރެރެއްވިއެވެ. އަދި ރާއްޖެއާއި އިންޑިއާ އާއި ދެމެދު އޮންނަ ބަދަހި ގުޅުން އިތުރަށް ވަރުގަދަކުރުމާ ގުޅޭގޮތުންވެސް ދެބޭފުޅުން ވަނީ މަޝްވަރާކުރައްވާފައެވެ.