55 ޤައިދީއަށް ޚާއްޞަކޮށްގެން ރިހިބިލިެޓޭޝަން ޕްރޮގްރާމެއް ފަށައިފި

މޯލްޑިވްސް ކަރެކްޝަނަލް ސަރވިސް (އެމްސީއެސް) އިން 55 ޤައިދީންނަށް ރިހިބިލިޓޭޝަން ޕްރޮގްރާމެއް ފަށްޓަވައިފިއެވެ.

މޯލްޑިވްސް ކަރެކްޝަނަލް ސަރވިސްއިން ވިދާޅުވީ ރިހެބިލިޓޭޝަން ފްރޭމްވަރކް ތަޢާރަފްކުރުމުގެ މަޤްޞަދަކީ ޤައިދީން އިސްލާހުކޮށް، އެމީހުންނަށް ތައުލީމާއި ހުނަރު އުނގަންނައިދީ، މުޖްތަމަޢަށް ނުކުންނައިރު އެފަރާތްތަކަކީ އާމްދަނީއެއް ލިބޭނޭފަދަ މަސައްކަތެއްކޮށްގެން ކުށުގެ ވެށިން ދުރުހެލިވެ އުޅުމަށްމަގުފަހިކޮށްދިނުމެވެ.

މޯލްޑިވްސް ކަރެކްޝަނަލް ސަރވިސްއިން ވިދާޅުވީ ރިހެބިލިޓޭޝަން ފްރޭމްވަރކް އެކުލެވިގެންވަނީ ހަތަރު ފޭސްއެއްގެ މައްޗައްކަމަށެއެވެ. އެއީ ޤައިދީންގެ ކިބާގައި “ޑިސިޕްލިން” ބިނާކުރުމާއި އެމީހުންނަށް “ސައިކޮލޮޖީ ޕްރޮގްރާމްތައް” ހިންގުމާއި “އެޑިއުކޭޝަން އަދި ވޮކޭޝަން” ދަސްކޮށްދިނުމުގެ އިތުރުން “ޕްރިޒަން ކޮމިއުނިޓީ ސަރވިސް”ކަމަށެއެވެ.

އެގޮތުން ފުރަތަމަ ފޭސްގައި ބޮޑަށް ކުރިއަށް ގެންދާނީ ލައިފްސްކިލްސް ކްލާސްތަކާއި ދީނީ ކްލާސްތަކުގެ އިތުރުން ފުޓްޑްރިލް އާއި ޕީޓީ ކްލާސްތައްކަމަށް މޯލްޑިވްސް ކަރެކްޝަނަލް ސަރވިސްއިން ވިދާޅުވެއެވެ.

ރިހެބިލިޓޭޝަން ފްރޭމްވަރކް ފޭސް 1 ގެ އަންހެން ޤައިދީންގެ 7 ވަނަ ބެޗް މާފުށީ ޖަލުގައި ފަށާފައިވަނީ މި އަހަރުގެ ފެބްރުއަރީ މަހު 1 ވަނަ ދުވަހުއެވެ. މި ޕްރޮގްރާމްގައި ޖުމްލަ 17 އަންހެން ގައިދީން ބައިވެރިވެފައިވެއެވެ.

ޖަލުތަކުގައި ކުރިއަށްގެންދިޔަ ފުރަތަމަ ރިހެބިލިޓޭޝަން ޕްރޮގްރާމް ފުރިހަމަކުރުމަށްފަހު ޖުމްލަ 32 މީހަކުވަނީ މުޖުތަމަޢަށްވަނީ ދޫކޮށްލާފައެވެ.

ރާއްޖޭގައި ޖަލުތަކުގައި ޙުކުމް ތަންފީޒުކުރާ ގިނަ މީހުންނަކީ މަސްތުވާތަކެތީގެ އެކި މައްސަލަތަކުގައި ހައްޔަރުކޮށްފައިވާ މީހުންކަމަށް ކަމާބެހޭ ފަރާތްތަކުން ވިދާޅުވެއެވެ. އެހެންކަމުން ޖަލުތަކުގައި ރަނގަޅު ނިޒާމެއްގެ ތެރެއިން ޑްރަގަށް ފަރުވާ ދެވޭނަމަ، ބަދަލެއް ގެނެވިދާނެކަމަށް ޤަބޫލުކޮށް ފުރަތަމަ ފަހަރަށް ރާއްޖޭގައި ޖަލުތަކުގައި، ޕްރިޒަން ބޭސްޑް ޑްރަގް ރިހިބިލިޓޭޝަން ޕްރޮގްރާމެއް ފަށާފައިވަނީ 2022 ވަނަ އަހަރުއެވެ.

މޯލްޑިވްސް ކަރެކްޝަނަލް ސަރވިސްގެ ތަފާސްހިސާބުތައް ދައްކާގޮތުން މިދިޔަ އަހަރުގެ ތެރޭގައި އެވްރެޖްކޮށް ކޮންމެ މަހަކު 64 މީހަކު މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށަށް ގެނެވިފައިވެއެވެ. އަދި ޤައިދީންގެ ތެރެއިން ކޮންމެ މަހަކުވެސް 40 މީހަކު ދޫކޮށްލާފައިވާ ކަމަށް އެސަރވިސްއިން ހާމަކުރައްވައެވެ. އަދި ވޭތުވެދިޔަ 5 އަހަރަށް ބަލާއިރު ކޮންމެ އަހަރަކުވެސް ގާތްގަނޑަކަށް 1489 ޤައިދީން ޖަލުތަކުގައި ބަލަހައްޓާ ކަމަށް ކަރެކްޝަނަލް ސަރވިސްއިން ވިދާޅުވެއެވެ.