ސީރިއަސްވި ދެ ޙައްޖާޖީންގެ ޙާލު އަދިވެސް ރަނގަޅެއް ނޫން: މިނިސްޓްރީ

ހާލު ސީރިއަސްވި ދެ ހައްޖުވެރިންގެ ޙާލު އަދިވެސް ރަނގަޅު ނޫންކަމަށް އިސްލާމިކް މިނިސްޓްރީން ވިދާޅުވެއްޖެއެވެ. ޙާއްލު ސީރިއަސްވެ އައިސީޔޫގައި ފަރުވާދެމުން އަންނަނީ ޢުމުރުން 85 އަހަރުގެ ފިރިހެނަކާއި، 58 އަހަރުގެ އަންހެނެކަށެވެ.

އިސްލާމިކް މިނިސްޓްރީގެ ސްޓޭޓް މިނިސްޓަރ މުޙައްމަދު އަނީލް ވިދާޅުވީ އެ ހައްޖުވެރިންގެ ހާލު އެންމެ ރަނގަޅު ނޫންކަމަށެއެވެ. އެހެންނަމަވެސް މަޑުމަޑުން ކުރިއެރުންތަކެއް ލިބެމުން އަންނަކަން އަނީލް ފާހަގަކުރެއްވިއެވެ.

ހާލު ސީރިއަސްވެ އައި.ސީ.ޔޫގައި ފަރުވާދެމުން އަންނަ އެ ދެހައްޖުވެރިން، ޢަރަފާތު ދުވަހު، ޢަރަފާތު ބިމަށް ގެންދެވޭތޯ ސައްކަތްކުރިނަމަވެސް، ސައުދީގެ ހެލްތް މިނިސްޓްރީން އެދެމީހުންގެ ހާލަތަށްބަލައި ނިންމީ ޢަރަފާތު ބިމަށް ނުގެންދިއުމަށްކަމަށްވެސް އަނީލް ވިދާޅުވިއެވެ.

މީގެ އިތުރުން އިތުރު ޙައްޖުވެރިއަކުވެސް މިހާރު ވަނީ އެޑްމިޓްކޮށްފައެވެ. ޙައްޖު ކޯޕަރޭޝަންގެ ހަވާލުގައި ޙައްޖަށް ދިޔަ އެމީހާ އެޑްމިޓްކޮށްފައިވަނީ ހޫނު ގަދަވުމުގެ ސަބަބުން ޑީހައިޑްރޭޓް ވުމުގެ ސަބަބުން ކަމަށް އަނީލް ވިދާޅުވިއެވެ.. އެހެންނަމަވެސް އޭނާގެ ހާލު މިހާރު ރަނގަޅުމަށް އަނީލް ވިދާޅުވިއެވެ.

ރާއްޖެއަށް ލިބުނު 1000 ކޯޓާގެ ތެރެއިން ޙައްޖު ކޯރޕަރޭޝަންގެ ޙަވާލުގައި އެކަނިވެސް 881 މީހުން ޙައްޖުގެ އަޅުކަމަށް ގޮސްފައިވެއެވެ. ޙައްޖު ކޯރޕަރޭޝަންގެ ޙަވާލުގައި ދިޔަ ޙައްޖުވެރިންގެ އެންމެހާ ކަންކަން ބެލެހެއްޓުމަށްޓަކާ 70 މީހުންގެ ޓީމެއް އެހީތެރިންގެ ގޮތުގައި އަންނަނީ ހަރަކާތްތެރިވަމުންނެވެ. މީގެ ތެރޭގައި ޞިއްޙީ ފަރުވާގެ ކަންކަމަށް ޚާއްސަ ސްޕެޝަލިސްޓް ޑޮކްޓަރަކާއި، 4 ނަރުހުންނާއި، ކައްކާއިންނާއި، ދީނީ ޢިލްމުވެރިންނާއި، އެހީތެރިން ހިމެނެއެވެ.