ރޯނުދަމައި، ބިންކަނޑައި، ގޯތީގެ ފަތް ދިނުމަށް ވެވަޑައިގެންނެވި ވަޢުދު ފުއްދެވުމާ ގާތަށް

ރާއްޖޭގެ އާބާދީގެ ބޮޑު ބައެއް ދިރިއުޅެނީ މާލެ ސަރަޙައްދުގައިކަމަށްވެފައި، ބޯހިޔާވަހިކަމަށް އެކަށީގެންވާ ހައްލެއް ނުހޯދި ގިނަ ޒަމާންތަކެއްވުމުގެ ނަތީޖާއަކަށްވީ، އިޖްތިމާޢީ ބޮޑެތި މައްސަލަތަކާ ކުރިމަތިލާން ޖެހުމެވެ.

ވެރިރަށް މާލޭގެ މައްސަލަތައް ވަކިންބޮޑެވެ. ގޯތިގެދޮރު ދަރީންގެ ދަރީންނަށް ފޮތިކުރަމުން ކުރަމުންގޮސް، ސަތޭކަ އަކަފޫޓުވެސް ހަމަނުވާ ކުދިކުދި ގޮޅިތަކުގައި ދިރިއުޅޭ މީހުން މިއަދު މާލޭގައި މަދެއް ނޫންނެވެ. މަދު ގޯއްޗެއް ފިޔަވައި ކޮންމެ ގޯއްޗެއްވެސް ފެންނަނީ ފޮތިކޮށް ބައިކޮށްފައިވާތަނެވެ. މިއާއެކު މާލޭ ސިޓީއަކީ ބޯހާސްވުމުގެ ތަނެއްގެ ގޮތުގައި ގިނަ ބަޔަކު ސިފަކުރެއެވެ. މިކަމަށް ހައްލެއް ގެނެއުމަށްޓަކައި ކުރީގެ ސަރުކާރުތަކުންވެސް ތަފާތު ނަންނަމުގައި އެކި މަޝްރޫޢުތައް ހިންގާފައިވެއެވެ. އެހެންނަމަވެސް އެކަށީގެންވާ ނަތީޖާއެއް ފެނިފައެއްނުވެއެވެ. މިހާތަނަށްވެސް ހައްލެއް ގެނެވިފައެއް ނުވެއެވެ.

ނަމަވެސް މިއިން ޒަމާނަކު ބޯހިޔާވަހިކަމުގެ މައްސަލައަށް އަޅާނުލެވި އޮތް އޮތުން ނިމުމަކަށް ގެނެސް މިހާރު މިވަނީ ޙައްލަކާ ހަމައަށް އައިސްފައެވެ. މާލޭގެ ރައްޔިތުންނަށް އިން ކަނޑާ ގޯތިދީ، މި ދައުރުގެ ތެރޭގައި އެ ގޯތިތައް ރަޖިސްޓްރީކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ދެއްވާފައެވެ. އެގޮތުން މި ފެށޭ ހަފްތާގައި ގޯތި ލިބޭ މީހުންގެ ލިސްޓް ޢާންމުކުރައްވާނެކަމަށް ސަރުކާރުން ވަނީ ވިދާޅުވެފައެވެ.

ރައީސްގެ ވަޢުދުފުޅު ހަޤީގަތަކަށް

"އިރާދަކުރެއްވިއްޔާ އަޅުގަނޑުގެ ރިޔާސީ މި ދައުރު ނިންމާނީ އެންމެ ބޭނުން ޖެހިފައިވާ މާލޭގެ ރައްޔިތުންނަށް އިންވަކިކޮށް، ރޯނުދަމާ، ބިންކަނޑާ، ގޯތީގެ ފަތް ދިނުމަށްފަހު. ދިވެހި ދަޢުލަތުގެ ހިޔާވަހިކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލީހްގެ ތަޞައްވުރަކީ މާލޭ ސަރަހައްދުގެ ބޯހިޔާވަހިކަމަށް ހައްލު ގެނެސްދެއްވާ، މާލޭ ސަރަޙައްދުގެ ތޮއްޖެހުން ކުޑަކޮށް، ތަހްޒީބު މުޖުތަމަޢުއެއްގެ ސިފަތައް ގެނެސްދެއްވުމެވެ.

މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވެވި ޖަލްސާގައި އިއްވެވި ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، ޒާމާނުއްސުރެ މާލެ ސަރަޙައްދަށް އޮތް ބޯހިޔާވަހިކަމުގެ ބޮޑު މައްސަލައާއި، އަތޮޅުތަކުގައި އާބާދީ އިތުރުވަމުން އަންނަ ރަށްތަކަށް އޮތް ބޯހިޔާވަހިކަމުގެ މައްސަލައަށް ޙައްލު ހޯދައިދިނުމަށް ގިނަ މަސައްކަތްތަކެއް ފައްޓަވާ، އޭގެ ކާމިޔާބު ރައްޔިތުންނާއި ހަމައަށް ފެންނަމުންދާކަމަށެވެ.

"

"މިއަހަރުގެ ޖޫން ނިމުމުގެ ކުރިން ބޯހިޔާވަހިކަން ލިބޭ ފަރާތްތަކަށް އެކަމުގެ ލިޔުން އިރާދަކުރެއްވިއްޔާ ހަވާލުކުރާނަން. މިއަދު ދަންނަވަން އޮތް އާ ވާހަކައަކީ، ކުރިން ދޭނެކަމަށް ދެންނެވި އަދަދަށްވުރެ، މާލެ ސަރަހައްދުން ދޭ ގޯތީގެ އަދަދު، އިތުރުކުރުމަށް އަޅުގަނޑު ނިންމި ވާހަކަ."

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.

ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު އިޢުލާނުކުރެއްވީ މާލޭ ރައްޔިތުން 5000 ގޯތި ދޫކުރުމާއި، މާލެ ސަރަޙައްދުގައި ދިރިއުޅޭ ރައްޔިތުންނަށް 4000 ފްލެޓް ދޫކުރުމަށެވެ.

ސަރުކާރުން މާލެ ސަރަޙައްދުން ދިނުމަށް ނިންމި 5000 ގޯތީގެ ތެރެއިން 3000 ގޯއްޗަށް މިދިޔަ އަހަރު ޖޫން މަހުގައި ހުޅުވާލިއެވެ. އޭގެތެރޭގައި ހިމެނެނީ ހުޅުމާލެއިން ދޫކުރާ 1000 ގޯއްޗާއި، ގުޅީފަޅުން ދޫކުރާ 2000 ގޯއްޗެވެ. ދެން ހިމެނެނީ މާލެ އަތޮޅު ގިރާވަރު ފަޅު ހިއްކާ އެތަނުން ދޫކުރުމަށް ނިންމާފައިވާ 2000 ގޯއްޗެވެ.

މި ޕްރޮގްރާމްގެ ދަށުން ހުޅުމާލެ ފޭސް 2 ގެ އެކި ސަރަޙައްދުތައް ހިމެނޭހެން 1000 ގޯތި ދޫކުރުމަށް ހަމަޖެހިފައިވާ ސަރަޙައްދު ސާފުކޮށް އެ ސަރަހައްދު މިހާރު ވަނީ ކަނޑައަޅާފައެވެ. އެތަނުގައި މިހާރު ކުރަމުންދަނީ ގޯތި ދިނުމަށްވާންޖެހޭ އެންމެ ފަހުގެ ތައްޔާރީތަކެވެ. އެ ސަރަހައްދަށް ބޭނުންވާ ކަރަންޓާއި، ފެންފަދަ ޔުޓިލިޓީގެ ޚިދުމަތް ޤާއިމުކުރުމުގެ މަސައްކަތްވެސް އެޗް.ޑީ.ސީން އަންނަނީ ކުރަމުންނެވެ.

ހުޅުމާލެއިން ގޯތި ދޫކުރަން ހަމަޖެހިފައިވާ ބްލޮކްތައް ނުވަތަ ސަރަހައްދުތައް 1250 އަކަފޫޓަށްވުރެ ކުޑަ ނުވާނެކަމަށް އެޗްޑީސީން ބުނެފައިވެއެވެ.

ޕްލޭނިންގ މިނިސްޓްރީން ވިދާޅުވެފައިވަނީ، ބޯހިޔާވަހިކަމުގެ މަޝްރޫޢުއަށް ހުޅުމާލެއިން 60 ސަރަހައްދަކުން ޖުމްލަ 1250000 އަކަފުޓޫގެ ބިން އެޗް.ޑީ.ސީން ދޫކޮށްފައިވާކަމަށެވެ.

ގޯތީގެ ބޮޑުމިން ކަނޑައަޅާނެ އުޞޫލު:

■ ގޯތީގެ އެންމެ ކުޑަ ސައިޒަކީ 1250 އަކަފޫޓު
■ އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރުކުރެވޭ
■ 7 މީހުންނަށްވުރެ ގިނަ މީހުން ބައިވެރިވާނަމަ 4000 އަކަފޫޓުގެ ގޯއްޗެއް

ފްލެޓުތަކުގައި އޯގަސްޓް މަސްތެރޭ މީހުން ދިރިއުޅެން ފަށާނެ

ރައީސްގެ ވަޢުދުފުޅާއި އެއްގޮތަށް މާލޭގައި ތޮއްޖެހުން ކުޑަކޮށް، އެންމެ ބޭނުންވެފައިވާ އާއިލާތަކަށް، އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަށްޓަކައި ރައީސް އިޢުލާންކުރެއްވި 4000 ހައުސިންގ ޔުނިޓު ތަރައްޤީކުރުމުގެ މަސައްކަތް ހުޅުމާލެ ދެވަނަ ފިޔަވަހީގައި ސަރުކާރުން ދަނީ ކުރަމުންނެވެ.

އެ 4000 ހައުސިންގ ޔުނިޓުގެ މަސައްކަތް ކުރަމުންދަނީ އިންޑިއާގެ 2 ކުންފުނިކަމަށްވާ ޖޭ.އެމް.ސީ ޕްރޮޖެކްޓްސް ލިމިޓެޑާއި، އެން.ބީ.ސީ.ސީ ލިމިޓެޑާއި ޙަވާލުކޮށްގެންނެވެ. މި މަޝްރޫޢުގެ ދަށުން މިއިން ކޮންމެ ކުންފުންޏަކުންވެސް 2000 ހައުސިންގ ޔުނިޓް އަންނަނީ ތަރައްޤީކުރަމުންނެވެ.

މި މަޝްރޫޢުގެ ދަށުން ތަރައްޤީކުރާ 4000 ހައުސިންގ ޔުނިޓްގައި ޖުމްލަ 32 ޓަވަރު ހިމެނެއެވެ. މިއީ 17 ނުވަތަ 18 ފަންގިފިލާ ޓަވަރުތަކެކެވެ. މީގެތެރެއިން 13 ޓަވަރެއްގެ މަސައްކަތް އަންނަ އޯގަސްޓް މަހަށް ނިންމައި މީހުން ދިރިއުޅޭވަރު ކުރުމަށް އަންނަނީ މަސައްކަތްކުރަމުންނެވެ.

މި ފެލްޓަތަކުގައި ހިމެނެނީ 3 ކޮޓަރީގެ އެޕާޓްމަންޓާއި 2 ކޮޓަރީގެ އެޕާޓްމަންޓެވެ. ކޮނެމް އެޕާޓްމަންޓެއްވެސް ތަރައްޤީކޮށްފައިވަނީ ރައްޔިތުންނަށް ލުއިފަސޭހަ ވާނެގޮތަށް، ޖާގަ ތަނަވަސް އަދި ޒަމާނީ ފެންވަރަށެވެ. މި 4000 ހައުސިން ޔުނިޓްގެ ޑިޒައިން މަރުހަލާގައިވެސް އެންމެ ބޮޑަށް އިސްކަން ދީފައިވަނީ، އެންމެ ފުރިހަމަ އަދި ހުރިހާ ގޮތަކުންވެސް ތަނަވަސް ތަނެއް ތަރައްޤީކުރުމަށްކަމަށެވެ.

މިދިޔަ އަހަރުގެ ރިޔާސީ ބަޔާނުގައި ބޯހިޔާވަހިކަމާއި ގުޅޭގޮތުން ރައީސް ވިދާޅުވީ، ވާހަކަތަކުގެ ޙަޤީޤީ މަންޒަރު މިއަދު ދަނީ ފެންނަމުންނެވެ.

"އެ ދުވަހު ދެންނެވިގޮތަށް އެ މަސައްކަތް ނިންމުމަށް ސަރުކާރުން ހިފި އަމާޒުގާ އެއްވެސް ކަސިޔާރު ކަމެއް ނެތް. ދައުރެއްގެ ތެރޭގައި ބިންގަލުން ފެށި ފްލެޓް އިމާރާތް ނިންމާ، ރައްޔިތުން ބޯހިޔާވަހިކުރާ ފުރަތަމަ އަހަރަށް މި އަހަރު ވެގެންދާނެ" ރައީސް ވިދާޅުވެފައިވެއެވެ.

ކޮންމެއަކަސް މާލޭގެ ރައްޔިތުންނަށް ޚާއްޞަކޮށްގެން ދޫކުރާ ގޯއްޗާއި ފްލެޓްތަކާއެކު މާލެ ސަރަހައްދުގެ އިޖްތިމަޢީ މައްސަލަތަކަށް ބޮޑު ލުޔެއް އަންނާނެއެވެ. އެތައް ޒަމާނެއް ވަންދެން އަމިއްލަ ގެދޮރެއް ނެތް އެތައް ރައްޔިތަކަށް އަމިއްލަ ބޯހިޔާވަހިކަން ކަށަވަރުވެގެންދާނެއެވެ. މިކަން ކުރެއްވުމުގައި ސަރުކާރުން ވެސް ދެއްވާ ޔަޤީންކަމަކީ ވަކި ސިޔާސީ ފިކުރަކަށް ބެލުމެއް ނެތި ހަމަހަމަކަމާއި އިންސާފުވެރިކަމާއެކު މިކަން ކޮށްދެއްވާނެކަމުގެ ޔަޤީންކަމެވެ.