މޮނިކޮން ޢަމުރުގެ ދަށުން ކުށްވެރިން ފައިގައި ޓެގް އަޅުވަން ފަށައިފި

ކޯޓު އަމުރުގެ ދަށުން ބައެއް ކުށްވެރިންގެ ފައިގައި ޓެގް އަޅުވަން ފަށައިފިއެވެ.

ހޯމް މިނިސްޓަރ ޢިމްރާން ޢަބްދުﷲ ވިދާޅުވީ، ޖިނާއީ ޢަދުލުގެ ބޭނުމަށްޓަކައި މީހުން މޮނިޓަރކޮށް ކޮންޓްރޯލްކުރުމުގެ ޤާބިލުކަން ފުލުހުންގެ ކިބާގައި ޤާއިމުކޮށް، ކޯޓު އަމުރެއްގެ ދަށުން އެންކަލް ބްރެސްލެޓް ނުވަތަ ޓެގު ބޭނުންކުރަން މިހާރު ފަށްޓަވާފައިވާކަމަށެވެ. މިނިސްޓަރ ވިދާޅުވީ، ކުރިން ދިމާވި އިދާރީ އަދި ތަންފީޒީ ދަތިތައް މިފަހަރު ދިމާނުވާނެކަމަށެވެ. މިނިސްޓަރ އެހެން މި ވިދާޅުވީ، ކުރީ ސަރުކާރުގައިވެސް ނުރައްކާތެރި ކުށްވެރިންގެ ފައިގައި ޓެގް އެޅުވިނަމަވެސް ފަހުން އެކަން ހުއްޓާލާފައިވާތީއެވެ.

ހޯމް މިނިސްޓަރ ވިދާޅުވީ، ޒަމާނީ ވަސީލަތްތަކާއެކު މިނިޒާމު ބޭނުންކުރެވޭނީ މައިގަނޑުގޮތެއްގައި ޓެރެރިޒަމް މަނާކުރުމުގެ ޤާނޫނުގެ ދަށުންކަމުގައި ވީނަމަވެސް، ސަރުކާރުގެ އަމާޒަކީ އަދުލުގެ ނިޒާމުގައި "މޮނިކޮން" ބޭނުންކުރެވޭނެ އިތުރު އިޖުރާއާތްތައް ތައާރަފުކޮށް، ޖަލުގައި މީހުން ބަންދުކުރެވޭ މިންވަރު މަދުކުރުންކަމަށެވެ.

ޓެރަރިޒަމް މަނާކުރުމުގެ ޤާނޫނުގެ ދަށުން ކުށްވެރިންގެ ފައިގައި ޓެގް އަޅުވަން ފަށާފައިވާކަމަށް ހޯމް މިނިސްޓަރ ވިދާޅުވެފައިވާއިރު، މިނިވަން ނޫހުގެ ނުސްވެރިޔާ އަޙްމަދު ރިޟްވާނާއި، ބްލޮގަރ ޔާމީން ރަޝީދުގެ މަރާއި ގުޅިގެން ދަޢުލަތުން ދައުވާކުރާ ތިން މީހުންގެ ތެރެއިން ބަންދުން ދޫކޮށްލި އަހްމަދު އިސްމާޢީލް ފައިގައި މިއަދު ވަނީ ޓެގް އަޅުވާފައެވެ. އަޙްމަދު އިސްމާޢީލްގެ މައްޗަށް ދައުލަތުން އުފުލަނީ ޓެރަރިޒަމްގެ ޢަމަލެއް ކުރަން ރޭވުމުގެ ދައުވާއާއި، ޓެރަރިޒަމްގެ ޢަމަލެއް ކުރުމަށް އެހީތެރިވުމުގެ ދަޢުވާއެވެ.

އެ ދަޢުވާތަކާއި ގުޅޭ ޝަރީޢަތް ކްރިމިނަލް ކޯޓުގައި ދަނީ ހިނގަމުންނެވެ.

މީގެ ކުރިންވެސް ބައެއް ކުށްވެރިންގެ ފައިގައި މޮނޮކޮން ޢަމުރުގެ ދަށުން ޓެގް އަޅުވައި، އެމީހުންގެ އުޅުން މޮނީޓަރކޮށްފައިވެއެވެ. މޮނިކޮން އަމުރަކީ ބޮޑެތި ކުށްކުރާ ކަމަށް ތުހުމަތުކުރޭވޭ މީހުން އުޅޭ ނުޅޭގޮތް ބެލުމަށް ހޯމް މިނިސްޓްރީން އެދުމުން ހައިކޯޓުން ނެރެދޭ އަމުރެކެވެ.

މި އަމުރާއެކު ކުށްވެރިންގެ ފައިގައި ޓެގް އަޅުވައި، އެމީހުން އުޅޭ ނޫޅޭގޮތް ފުލުހުން ބަލަމުންދާނެއެވެ. ކޯޓުން ނެރޭ އަމުރުގައި އެމީހަކަށް އުޅޭވެނެ ތަންތަނާއި ބޭރަށް ނުކުމެވޭނެ ވަގުތުތައް ކަނޑައަޅައެވެ. އަދި މި އަމުރާ އެމީހަކު ޚިލާފްވެއްޖެނަމަ ޖަލު ޙުކުމެއް އިއްވުމުގެ ބާރު ޓެރަރިޒަމް ހުއްޓުވުމާއި މަނާކުރުމުގެ ޤާނޫނުން ކޯޓަށް ދީފައިވެއެވެ.

އެއްފަހަރާ 100 ކުށްވެރިން މޮނިޓަރ ކުރެވޭގޮތަށް ނިޒާމް ބައްޓަންކުރުމަށް ބޭނުންވާ މޮނިކޮން ޓެގް މިދިޔަ އަހަރު ހޯމް މިނިސްޓަރީން ވަނީ ރާއްޖެ ގެނެސްފައެވެ.