ރ.އިންނަމާދޫ ބަނދަރު ތަރައްޤީ ކުރުމުގެ މަސައްކަތް އެމްޓީސީސީއާ ހަވާލުކުރައްވައިފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ބޭއްވި ޚާއްސަ ރަސްމިއްޔާތެއްގައި މި މަޝްރޫޢު އެމް.ޓީ.ސީ.ސީއާއި ޙަވާލުކުރުމުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤުއެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ ފަރާތުން ސޮއިކުރެއްވީ ޗީފް އޮޕަރޭޓިންގ އޮފިސަރ ޝާހިދު ހުސެއިން މޫސާ އެވެ.
އިންނަމާދޫ ބަނދަރު ތަރައްޤީކުރުމުގެ މަޝްރޫޢުގެ ދަށުން ބަނދަރަށް އިތުރުކުރެވޭ 32310 ކިއުބިކް މީޓަރު ފުންކުރުމާއި، 14417 ކިއުބިކް މީޓަރުގެ ބަނދަރު ފުން ކުރުމާއި، 204 މީޓަރުގެ ބޮޑު ހިލައިގެ ބޭރުތޮށި ޖެހުމާއި 400 މީޓަރު ބޮޑުހިލައިގެ ރިވެޓްމެންޓް ޖެހުމާއި 8 މީޓަރުގެ ބޮޑުހިލައިގެ ގްރޮއިން ޤާއިމްކުރުން ހިމެނެއެވެ. އަދި 478 މީޓަރ އެއްގަމު ތޮށި ޖެހުމާއި މީޓަރ ސްކޯރިންގ އެޕްރޮން ޖެހުމުގެ އިތުރުން 2 ނެވިގޭޝަނަލް އެއިޑް ޤާއިމްކުރުމާއި 2 މޫރިންގ ރިންގް ހަރުކުރުމާއި 16 މޫރިންގ ބޮއި ހަރުކުރުން ހިމެނެއެވެ.
މީގެ އިތުރުން 20 މަގު ބައްތި ހަރުކުރުމާއި 2716 އަކަ މީޓަރު ޕޭވްމަންޓް ހެދުމާއި ކޮންކްރިޓް ޖެޓީއެއްގެ އިތުރުން ރޭމްޕެއް ހެދުމުގެ މަސައްކަތްވެސް މި މަޝްރޫޢުގެ ދަށުން ކުރުމަށްވަނީ ހަމަޖެހިފައެވެ.
އިންނަމާދޫ ބަނދަރު ތަރައްޤީކުރުމުގެ މަޝްރޫޢު އެމް.ޓީ.ސީ.ސީއާއި ހަވާލުކުރައްވާފައިވަނީ 390 ދުވަހުން މަސައްކަތް އެއްކޮށް ނިންމާގޮތަށެވެ.
މި މަޝްރޫޢު 72.58 މިލިއަން ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.