އއ.އުކުޅަހުގައި ޚާއްޞަ ބްރޭންޑެއްގެ ދަށުން ތިމާވެށްޓާއި ރައްޓެހި އުފެއްދުންތައް ތައްޔާރުކުރުމުގެ އެއްބަސްވުމުގައި ސޮއިކުރައްވައިފިއެވެ.
ޚާއްޞަ ބްރޭންޑެއްގެ ދަށުން ތިމާވެށްޓާއި ރައްޓެހި އުފެއްދުންތައް ތައްޔާރުކުރުމުގެ މަސައްކަތަކީ އުކުޅަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީން އިސްނަގައިގެން އެންވަޔަރަމަންޓް މިނިސްޓްރީއާއި އުކުޅަހު ޓުއަރިޒަމް ކޮމިޓީއާ ގުޅިގެން ކުރިއަށް ގެންދިއުމަށް ހަމަޖެހިފައިވާ މަސައްކަތެކެވެ.
ތިމާވެށީގެ ދުވަހުގެ ޚާއްޞަ ޖަލްސާގައި، މިކަމުގެ އެއްބަސްވުމުގައި އެންވަޔަރަމަންޓް މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ޑރ. އަބްދުﷲ ނަޞީރެވެ. އުކުޅަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީން ސޮއިކުރެއްވީ ރައީސާ ޒަހިއްޔާ މުޙައްމަދުއެވެ. އުކުޅަސް ޓުއަރިޒަމް ކޮމިޓީން ސޮއިކުރެއްވީ ކޮމިޓީގެ ރައީސް ޢަބްދުއްސަމީޢު ޢިމާދެވެ.
އުކުޅަހުގެ ޚާއްޞަ މިބްރޭންޑަކީ އުކާލާ ތަކެތި ތިމާވެށްޓާއި ރައްޓެހި ގޮތަށް ދެވަނަ ފަހަރަށް ބޭނުންކުރެވޭ ގޮތް ހެދުމުގެ ބޭނުމުގައި އުފައްދާ ބްރޭންޑެކެވެ.
ޕީއެސްއެމް ނިއުސްއަށް މައުލޫމާތު ދެމުން އއ.އުކުޅަހުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާ ޒަހިއްޔާ މުޙައްމަދު ވިދާޅުވީ މި ފަދަ ބްރޭންޑެއް އުފެއްދުމުގެ ބޭނުމަކީ އުކާލެވޭ ތަކެތި ދެވަނަ ފަހަރަށްވެސް ބޭނުންކުރެވޭކަން ނުވަތަ ބޭނުން ކުރެވިދާނެކަން މުޖްތަމައަށް އަންގައިދީ އެކަމަށް އާއްމުން ހޭލުންތެރިކުރުން ކަމަށެވެ. އަދި މި މަސައްކަތުގައި ގިނަ ބަޔަކު ޝާމިލް ކުރުވުމާއި އާމްދަނީ ލިބޭނެ މަގުފަހިކުރުން ކަމަށްވެސް އޭނާ ވިދާޅުވިއެވެ.
ޒަހިއްޔާ ވިދާޅުވީ މި ފަދަ ބްރޭންޑެއް ނުވަތަ މި މަސައްކަތުގެ ސަބަބުން ރަށުގެ ތަރައްގީއާއި އުކުޅަހުގެ ފަތުރުވެރިކަމަށް ބޮޑެތި ފައިދާތަކެއް ލިބޭނެ ކަމަށެވެ. އެގޮތުން ވެށްޓަށް އުކާލެވޭ ކުނި މަދުކުރެވޭނެކަން ޒާހިޔާ ފާހަގަކުރިއެވެ.
"ބޭނުން ނުކޮށް ގޭގައި ހުންނަ އެއްޗެތި މުޖްތަމައުގެ އާއްމު މާހައުލުން އަޅުގަނޑުމެންނަށް ފެންނަ އެއްޗިސް ދެވަނަ ފަހަރަށް ބޭނުން ކޮށްލާފަ އެއެއްޗިސް މާކެޓަށް ނެރެލާފައި ރަނގަޅު އާމްދަނީއެއް ލިބޭނެ." ޒަހިއްޔާ ބުންޏެއެވެ.
އުކުޅަހަށް ޚާއްޞަ ބްރޭންޑުގެ ދަށުން ތިމާވެށްޓާ ރަޙުމަތްތެރި އުފެއްދުންތައް ތައްޔާރުކުރުމަށްޓަކައި، އުކުޅަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި އެންވަޔަރަމަންޓް މިނިސްޓްރީން ވަނީ ފޮތިދަބަސް ފަހަން ދަސްކޮށްދޭ ތަމްރީން ޕްރޮގްރާމެއްވެސް އެ ރަށުގައި ހިންގައިފައެވެ. އަދި އެ ޕްރޮގްރާމްގެ ބައިވެރިންނަށް ރޭގެ ޖަލްސާގައި ވަނީ ސެޓްފިކެޓް ދެއްވައިފައެވެ.
މީގެ އިތުރުން އެ ޕްރޮގްރާމުގައި ބައިވެރިން ފަހާފައިވާ ދަބަސް ރަށުގެ ހުރިހާ ގޭބީސީއަކަށް ބެއްސެވުމަށް ވަނީ ކައުންސިލާއި ހަވާލުކުރައްވައިފައެވެ.
ރާއްޖެއަށް އެތެރެކުރާ ޕްލާސްޓިކް ނުވަތަ އެއްފަހަރު ބޭނުންކޮށްފައި އުކާލެވޭ ފަދަ ތަކެތި މަދު ކުރުމަށް ސަރުކާރުން ގެންދަވަނީ ގިނަ މަސައްކަތް ތަކެއް ކުރައްވަމުންނެވެ. އެގޮތުން ސަރުކާރުގެ އަމާޒަކީ 2030ގެ ނިޔަލަށް ރާއްޖެއަކީ ކަރބަން ނެޓް ޒީރޯ ގައުމަށް ހެއްދެވުމެވެ.