މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީގެ އަހަރީ އާންމު ޖަލްސާ ޖޫންމަހުގެ 15 ވަނަ ދުވަހު ބާއްވަން އެކުންފުނިން ނިންމައިފިއެވެ.
މި ޖަލްސާ އޮންނާނީ ކުރުނބާ މޯލްޑިވްސްގެ ބޯގަންވިލާ މާލަމުގައި އެރޭ 20:30 ގައެވެ. މިޖަލްސާގައި ޙިއްޞާދާރުންނަށް މޯލްޑިވްސް ސެކިއުރިޓީޒް ޑިޕޮސިޓަރީގެ އޮންލައިން ވެބް އެޕްލިކޭޝަން "ފަހިވޯޓް" މެދުވެރިކޮށް ނުވަތަ ޖަލްސާއަށް ޙާޟިރުވެ، ބައިވެރިވުމުގެ ފުރުޞަތު އޮންނާނެކަމަށް އެމްޓީސީސީއިން ބުންޏެވެ.
އެމްޓީސީސީގެ 2022 ވަނަ އަހަރުގެ އަހަރީ ޢާންމު ޖަލްސާގައި ބައިވެރިވެވޭނީ 12 އޭޕްރީލް 2023ގެ ނިޔަލަށް އެކުންފުނީގެ ޙިއްޞާދާރުންގެ ދަފްތަރުގައި ރަޖިސްޓްރީކޮށްފައިވާ ފަރާތްތަކަށެވެ.
މި ޖަލްސާގައި 2022 ވަނަ އަހަރުގެ ފައިދާއިން ޙިއްޞާދާރުންނަށް ބެހުމަށް ޑިރެކްޓަރުންގެ ބޯޑުން ހުށަހަޅާފައިވާ ޢަދަދު ފާސްކުރުން އޮންނާނެއެވެ. އަދި 2023 ވަނަ އަހަރަށް ކުންފުނީގެ އޮޑިޓަރުން ހޮވައި، އެފަރާތުގެ އުޖޫރަ ކަނޑައެޅުމާއި، ކުންފުނީގެ ޑިރެކްޓަރުންގެ ބޯޑުގައި ތިއްބެވި މެމްބަރުން އިއުލާނު ކުރުންވެސް އޮންނާނެއެވެ.
އެމްޓީސީސީން ބުނީ އަހަރީ އާންމު ޖަލްސާގައި ބައިވެރިވާން ބޭނުންވާ އެންމެހާ ޙިއްޞާދާރުން 13 ޖޫން ވާ އަންގާރަ ދުވަހުގެ 20:30ގެ ކުރިން ރަޖިސްޓްރީ ކުރަންވާނެކަމަށެވެ. ޙިއްޞާދާރުން މިޖަލްސާގައި ބައިވެރިވުމަށް، މޯލްޑިވްސް ސެކިއުރިޓީސް ޑިޕޮޒިޓަރީގެ އިންފިނިޓީ ޕޯރޓަލް (infinity.mv) މެދުވެރިކޮށް، ނުވަތަ އެމް.ޓީ.ސީ.ސީގެ ޝެއަރހޯލްޑަރސް އޮންލައިން ޕޯރޓަލް (sop.mtcc.com.mv) މެދުވެރިކޮށް ރަޖިސްޓްރީ ކުރެވޭނެއެވެ.
މިއަހަރަކީ އެމްޓީސީސީގެ ތާރީޚުގައި ވެސް ލިބުނު އެންމެ ބޮޑު އާމްދަނީއާއެކު ކުންފުނީގެ ޙިއްޞާދާރުންނަށް ރެކޯޑް ޢަދަދެއްގެ އާމްދަނީއެއް ބަހަން ކަނޑައަޅާފައިވާ އަހަރެވެ. 2022 ވަނަ އަހަރު ޙާޞިލްކުރި މާލީ ނަތީޖާއާއިއެކު -/5 ރުފިޔާގެ މޫނުމަތީ އަގުގެ ހިއްސާއަކަށް -/4 ރުފިޔާގެ މަގުން ޖުމުލަ ޙިއްޞާގެ ފައިދާގެ ގޮތުގައި 32.15 މިލިއަން ރުފިޔާ ބެހުމަށް އެ ކުންފުނިން ވަނީ ނިންމާފައެވެ. މިއީ ކުންފުނީގެ 42 އަހަރުގެ ދިގު ތާރީޚުގައި ޙިއްޞާގެ ފައިދާގެ ގޮތުގައި ޙިއްޞާދާރުންނަށް ބެހުމަށް ހުށަހަޅާ އެންމެ ބޮޑު ޢަދަދުކަމަށް އެމްޓީސީސީން ބުނެއެވެ.
މިދިޔަ އަހަރު އެމްޓީސީސީއަށް އާމްދަނީގެ ގޮތުގައި 2.47 ބިލިއަން ރުފިޔާ ވަނީ ލިބިފައެވެ. އަދި ސާފު ފައިދާ އުޅެނީ 196 މިލިއަން ރުފިޔާގައިކަމަށް އެ ކުންފުނީގެ މާލީ ހިސާބުތަކުން ދައްކައެވެ.