އެގްރޯ ނޭޝަނަލް ކޯޕަރޭޝަން، އެގްރޯނެޓުން އަންނަނީ ރާއްޖޭގެ ދަނޑުވެރިކަމުގެ ސިނާއަތު ކުރިއަރުވައި ޒަމާނުއްސުރެ ދަނޑުވެރިންގެ ހުރި ކަންބޮޑުވުންތަކަށް ހައްލު ހޯދަވައިދެއްވުމަށް މަސައްކަތް ކުރައްވަމުންނެވެ. އެގޮތުން އެ ކުންފުނިން މިހާރުވެސް ދަނީ ކޮންޓްރެކްޓް ފާމިންގެ މަސައްކަތް ފަށައި ކާމިޔާބުކަމާއިއެކު ކުރިއަށްގެންދަމުންނެވެ. މިހާރު އެގްރޯނެޓުން ތައްޔާރުވަމުން އަންނަނީ ކޮމިއުނިޓީ ފާމިން ނުވަތަ ރަށްވެހި ދަނޑުވެރިކަން ފެށުމަށެވެ.
ރަށްވެހި ދަނޑުވެރިކަމަކީ އެގްރޯނެޓަށް މުޅިން އައު ކޮންސެޕްޓެކެވެ. މި ޕްރޮގްރާމް ކުރިއަށްގެންދަނީ ރާއްޖޭގެ ބިން ބޮޑެތި ރަށްތަކުގައެވެ. މި ޕްރޮގްރާމްގެ ދަށުން ރާއްޖޭގެ ބިންބޮޑު 5 ރަށެއްގައި 1 ލައްކަ އަކަފޫޓުގެ ބިން ހޯދުމަށްފަހު އެ ތަންތަނުގައި 6 ޕްލޮޓެއް އެގްރޯނެޓުގެ ޚަރަދުގައި ދަނޑުވެރިކަން ކުރުމަށް ތަރައްޤީކުރާނެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެގްރޯނެޓްގެ ޕްރޮޑަކްޝަން މެނޭޖަރ، ނާދިއާ އަބްދުﷲ ވިދާޅުވީ، މި އަހަރުގެ ތެރޭގައި ރަށްވެހި ދަނޑުވެރިކަން ރާއްޖޭގެ 5 ރަށެއްގައި ފަށާނެކަމަށެވެ. އަދި ޕްރޮގްރާމް ކުރިއަށްގެންދާނީ ނ. އަތޮޅުގެ 4 ރަށަކާއި ލ.އަތޮޅުގެ 1 ރަށުގައިކަމަށް އޭނާ ވިދާޅުވިއެވެ.
މިހާރު ކުރިއަށްދަނީ މިރަށްތަކުގެ ކައުންސިލްތަކާއި މަޝްވަރާކުރުމުގެ މަސައްކަތް ކަމަށް އޭނާ ވިދާޅުވިއެވެ. އަދި އެއްބަސްވުންތައް ހެދުމުގެ މަސައްކަތްވެސް ކުރަމުންދާކަން އޭނާ ފާހަގަކުރެއްވިއެވެ. މިމަސް ނިމުމުގެ ކުރިން މި 4 ރަށުގެ ކައުންސިލާއެކު އެއްބަސްވުންތައް ޤާއިމްކޮށް ނިންމައި، ކުރިއަށްއޮތް މަހު މިތަންތަނުގައި އަމަލީގޮތުން މަސައްކަތް ފަށާނެކަމަށް އޭނާ ވިދާޅުވިއެވެ.
ނާދިއާ ވިދާޅުވީ، މި ތަންތަނުގައި ދަނޑުވެރިކަން ކުރާނީ ޓެކްނޮލޮޖީއާއި ރަހުމަތްތެރި ގޮތަކަށްކަމަށެވެ. އެގޮތުން މިތަންތަނުގައި ހުންނާނީ އިރިގޭޝަން ސިސްޓަމް ޤާއިމްކޮށްފައިކަން އޭނާ ފާހަގަކުރެއްވިއެވެ.
“އަޅުގަނޑުމެން ޒަމާނީ ޓެކްނޮލޮޖީ ބޭނުންކޮށްގެން ދަނޑުވެރިކަން ކުރެވޭނެ މަގުތައް ފަހިކޮށްދޭނަން. އަޅުގަނޑުމެން ދަނޑުވެރިޔާއާއި އެތަން ހަވާލު ކުރާއިރުގައި ހުރިހާ ކަމެއް ފުލީ ފަންކްޝަނިންކޮށް އެތަނަށްް ބޭނުންވާ ހުރިހައިކަމެއް ޤާއިމްކޮށްދީފައި ދަނޑުވެރިޔާ ޓްރެއިން ކޮށްފައި އަޅުގަނޑުމެން މި ހަވާލުކުރަނީ. އެތަނުގައި އަޅުގަނޑުމެން މިއަޅަނީ އިރިގޭޝަން ސިސްޓަމް. އިރިގޭޝަން ސިސްޓަމް އަޅާއިރުގައި ކުންފުނީގެ ޓާގެޓަކީ އަބަދުވެސް ތިމާވެއްޓާއި ރަށްޓެހި ގޮތަކަށް ގެންދިއުން ކަމަށްވާތީ އިރުގެ ހަކަތަ ބޭނުންކޮށްގެން މިތަން ރަންކުރާނީ” ނާދިއާ ވިދާޅުވިއެވެ.
ނާދިއާ ވިދާޅުވީ، މި ތަންތަނުގައި ދަނޑުވެރިކަން ކުރަން ފަށާނީ އެކަން ކުރަން ބޭނުންވާ ކާނާއާއި މުޑުވައްވެސް ދިނުމަށްފަހުގައިކަމަށެވެ. އަދި މި ޕްލޮޓްތަކުގައި މޫސުމީ ޑޭޓާ ކަލެކްޓް ކުރެވޭނެ ގޮތްތަކާއި ކެމެރާ ސިސްޓަމުން އެތަން އަވަރލީ އަދި ޑެއިލީ ބޭސިސްކޮށް މޮނިޓަރ ކުރަމުންދާނެކަމަށެވެ.
މި ޕްރޮޖެކްޓާއެކު އެގްރޯނެޓުން މަސައްކަތް ކުރަމުންދަނީ ރާއްޖޭގައި ކުރީއްސުރެ ކުރަމުން އަންނަ ދަނޑުވެރިކަމާއި ދުރަށް ޖެހި ތިމާވެއްޓާއި ރަހުމަތްތެރި ދަނޑުވެރިކަމަކަށް ދިއުމަށްކަމަށް އެގްރޯނެޓުން ވިދާޅުވެއެވެ. މި ދަނޑުތަކުގައި ގަސްތަކަށް ކާނާވެސް އަޅާނީ އެ ގަހަށް އެ ބޭނުންވާ ވަރަށް ވީހާވެސް މަދުންނެވެ. ނާދިއާ ވިދާޅުވީ، ރަށްވެހި ދަނޑުވެރިކަމުގެ ޕްރޮގްރާމުން ބޮޑަށް ފުރުސަތު ހުޅުވާލާނީ ޒުވާނުންނާއި އަންހެނުންނަށްކަމަށެވެ.
“ރަށްވެރި ދަނޑުވެރިކަމުގެ ޕްރޮގްރާމްގެ ދަށުން އަޅުގަނޑުމެން މި ހުޅުވާލާ ފުރުސަތުގައި އަޅުގަނޑުމެން އެންމެ ބޮޑު އިސްކަމެއް މިދެނީ ޒުވާނުންނަށް އަދި އެރަށުގެ މަސައްކަތްތެރި އަންހެނުންނަށް. އަޅުގަނޑުމެން ބޭނުންވަނީ 1 ލައްކަ އަކަފޫޓުގެ 6 ޕްލޮޓްގައި މިކުރާ ދަނޑުވެރިކަމުން ދަނޑުވެރިކަމށް އަހުލުވެރި މިކަން ކުރަން އިނގޭ ޒުވާނުންތަކެއް ބިނާކުރުން.” ނާދިއާ ވިދާޅުވިއެވެ.
މިއީ ޖަޕާން ސަރުކާރުގެ އެހީއާއި ޔޫއެންޑީޕީގެ 2 ޕްރޮޖެކްޓެއްގެ އެހީގެ ދަށުން އެގްރޯނެޓުން ކުރިއަށްގެންދާ މަސައްކަތެކެވެ.