ރާއްޖޭގައި ފަތުރުވެރިކަން ފެށިގެން ކުރިއަށްދާތާ 50 އަހަރަށްވުރެ ގިނަދުވަސްވެއްޖެއެވެ. މިއަދު ފަތުރުވެރިކަމަކީ ރާއްޖޭގެ އިޤްތިޞާދު ބަރޯސާވާ ސިނާއަތެވެ. ތަފާސް ހިސާބުތައް ދައްކާގޮތުން 2019 ވަނަ އަހަރު ދައުލަތަށް ލިބުނު އާމްދަނީގެ %35.4 އަކީ ފަތުރުވެރިކަމުން ލިބުނު އާމްދަނީއެވެ. އަދި 2021 ވަނަ އަހަރު ދައުލަތަށް ލިބުނު އާމްދަނީގެ %42.9 އަކީ ފަތުރުވެރިކަމުން ލިބުނު އާމްދަނީއެވެ.
ކުރިއަށްއޮތް 5 އަހަރަށް ރާއްޖޭގެ ފަތުރުވެރިކަމުން ހާސިލްކުރަން ބޭނުންވާ މުހިންމު ބައެއް ކަންކަން ހިމަނައިގެން ޓޫރިޒަމް މިނިސްޓްރީން މިހާރު ވަނީ 5 ވަނަ ޓޫރިޒަމް މާސްޓަރ ޕްލޭން ލޯންޗްކޮށްފައެވެ. މިއީ ދިވެހިރާއްޖޭގެ ފަތުރުވެރިކަމުގެ ސިނާއަތު ދެމެހެއްޓެނިވި ގޮތެއްގައި ކުރިއަރުވައި ތަރައްޤީކުރުމަށް 2023އިން 2027 އަށް ޓޫރިޒަމް މިނިސްޓްރީން އެކުލަވާލާފައިވާ ސްޓްރެޓެޖިކް ޕްލޭންއެކެވެ.
ރާއްޖެއަކީ ފަތުރުވެރިން މަދުން އަންނަ ދުވަސްވަރާއި ގިނައިން އަންނަ ދުވަސްވަތައް އޮންނަ ޤައުމެއްނަމަވެސް، އެކަން ބަދަލުުކުރަން ކަމާއިބެހޭ ފަރާތްތަކުން ދަނީ ގިނަ މަސައްކަތްތަކެއްކުރަމުންނެވެ. މީގެކުރިން ފަތުރުވެރިކަމުގެ ލޯ ސީޒަންގައި ބައެއް ރިސޯޓްތަކުން މުވައްޒަފުންނަށް ޗުއްޓީދީ ރިސޯޓް ބަންދުވެސް ކުރެއެވެ. ނަމަވެސް ސަރުކާރުން މިހާރު އަމާޒުހިފާފައި ވަނީ ރާއްޖެއަކީ އަހަރުގެ ކޮންމެ ދުވަސްވަރަކީވެސް ފަތުރުވެރިން އަންނަ ހައި-ސީޒަނަކަށް ހެދުމެވެ. އަދި އެންމެ ފަހުން އިފްތިތާހުކުރި މާސްޓަރ ޕްލޭންގައިވެސް އެކަމަށް ވަނީ ޚާއްސަ އިސްކަމެއް ދެއްވާފައެވެ.
މާސްޓަރ ޕްލޭންގައި ކަނޑައަޅާފައިވާ ކަންކަން:
* ލޯސީޒަން ސޯސް މާކެޓްތައް ދެނެގަނެ އެ ޤައުމުތަކުން ފަތުރުވެރިން އަންނަ މިންވަރު އިތުރުކުރުމަށް މަސައްކަތް ކުރުން.
* ސަނީ ސަމަރ ސައިޑް އޮފް ލައިފް ކެންޕެއިންތަކާއި ހަރަކާތްތައް ހިންގުން
* ފަތުރުވެރިން ރާއްޖޭގައި ހޭދަކުރާ މުއްދަތު އިތުރުކުރުމަށް މަސައްކަތް ކުރުން.
ޕީއެސްއެމް ނިއުސްއަށް މައުލޫމާތުދެއްވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، ރާއްޖޭގެ ފަތުރުވެރިކަން މިހާރު ބައްޓަންވަމުން އަންނަގޮތުން ރާއްޖެ ވެގެންދާނީ އަހަރުގެ ހުރިހާ މަހެއްގައިވެސް ފަތުރުވެރިން އަންނަ ޤައުމަކަށްކަމަށެވެ.
ލޯ ސީޒަން ހައި ސީޒަން މީގެކުރިން ފާހަގަވެފައިވަނީ ރާއްޖޭގެ ފަތުރުވެރިކަން ހަމައެކަނި ޔޫރަޕް މާކެޓަށް ބަރޯސާވެފައި އޮތުމުންކަމަށް މިނިސްޓަރ ވިދާޅުވިއެވެ. އޭރު ޔޫރަޕްއަށް ހޫނު މޫސުމުގައި ރާއްޖެ އަންނަ ފަތުރުވެރިން ދަށްވުމުގެ ސަބަބުން ހޫނު މޫސުމަކީ ދިވެހިރާއްޖެއަށް ލޯސީޒަންއެއްގެ ގޮތުގައި ބެލެވެން ފެށުނެވެ. އެކަން ބަދަލުކުރުމަށް އެހެން މާކެޓްތަކުން އަންނަ ފަތުރުވެރިން އިތުރުކުރުމަށް މަސައްކަތްތަކެއް ކުރެވެމުންދާކަން މިނިސްޓަރ ފާހަގަކުރެއްވިއެވެ.
“މިހާރު އަޅުގަނޑުމެންގެ އެހެން މާކެޓްތަކުން ޙާއްސަކޮށް ޔޫރަޕިއަން ލޯ ސީޒަންގައި ސައުތު އީސްޓް އޭޝިއާ، އޮސްޓްެރޭލިއާ، ނިއުޒިލޭންޑް، ޖަޕާން، ކޮރެއާ، ޗައިނާ، މިތަންތަނުން އަންނަ ފަތުރުވެރިން އަންނަން ފެށީމައި އަޅުގަނޑުމެންނަށް އެކަންތައް ހަމަޖެހޭނެ. އިންޑޮނޭޝިއާ، މެލޭޝިއާ، ވިއެޓްނާމް މާކެޓަކީވެސް މިހާރު އަރަމުން އަންނަ މާކެޓްތަކެއް. ދުނިޔޭގެ ވާދަވެރިކަމުގައި ވާދަކުރެވޭނެ ފަދަ ޕްރޮޑަކްޓްތައް ރާއްޖޭގެ ފަތުރުވެރިކަމުގައި ތަރައްޤީކުރުމަށް އަމިއްލަ ފަރާތްތަކަށް އެކަން ފަހިކޮށްދެމުންދާކަމަށް. ޓޫރިޒަމް ޕްރޮޑަކްޓް ޑިވެލޮޕްވަމުން އަންނަގޮތުން ހުރިހައި ގައުމެއްގެ ހުރިހައި ފަންތިއެއްގެ ފަރާތްކަށް އާދެވޭނެ ޤައުމަކަށް ރާއްޖެ ވެގެންދާނެ. އެހެންކަމުން މުސްތަޤްބަލުގައި ދިވެހިރާއްޖެއަކީ ލޯ ސީޒަންއެއް އޮންނަ ޤައުމެއްގެ އޮތުން މުޅިން ބަދަލުވެގެންދާނެ.” މިނިސްޓަރ ވިދާޅުވިއެވެ.
5 ވަނަ ޓޫރިޒަމް މާސްޓަރ ޕްލޭންގައި ރާއްޖޭގެ ފަތުރުވެރިކަން ތަރައްޤީކޮށް ފަތުރުވެރިކަމުން ލިބޭ އާންދަނީ އިތުރުކުރުމަށް ވަނީ އަމާޒުހިފާފައެވެ. އެގޮތުން 2027 ވަނަ އަހަރާއި ހަމައަށް ދާއިރު ފަތުރުވެރިކަމުން ރާއްޖެއަށް ލިބޭ އާމްދަނީ އަހަރަކު 6 ބިލިއަން ޑޮލަރަށް އިތުރުކުރުމަށް ޕްލޭންތަކެއް އެކަށައަޅާއި، ވަނީ އަމާޒު ކަނޑައަޅާފައެވެ.
5 ވަނަ މާސްޓަރ ޕްލޭންގައި ހާސިލްކުރަން ކަނޑައަޅާފައިވާ ބައެއް ކަންތައްތަކުގެ ތެރޭގައި ފަތުރުވެރިކަމުން ލިބޭ މަންފާ ރާއްޖޭގެ ހުރިހާ ސަރަހައްދެއްގެ ރައްޔިތުންނަށް އިތުރުކުރުމާއި، ރާއްޖޭގެ ފަތުރުވެރިކަމުގެ ދާއިރާއިން ތަފާތު، އާ އުފެއްދުންތައް އަދި ތަޖުރިބާތައް އެ ދާއިރާ އަށް ތައާރަފްކުރުމާއި، ފަތުރުވެރިކަމުގެ ދާއިރާގައި ޝާމިލުވާ ހުރިހާ ފަރާތްތަކުން މޫސުމަށް އަންނަ ބަދަލުތަކަށް ރައްކާތެރިވެ، ރާއްޖޭގެ ގުދުރަތީ ހަޒާނާތައް ހިމާޔަތް ކުރަން މަސައްކަތް ކުރުން ހިމެނެއެވެ.
މީގެއިތުރުން ރާއްޖެ އަންނަ ހުރިހާ ފަތުރުވެރިންނަށް ޒަމާނީ ފެންވަރުގެ ދަތުރުފަތުރުގެ ނިޒާމެއް ކަށަވަރުކޮށްދިނުމާއި، ފަތުރުވެރިކަމުގެ ދާއިރާގައި މަސައްކަތްތެރިން ދަމަހައްޓާ، މަސައްކަތްތެރިން އެ ސިނާއަތަށް ޝައުގުވެރި ކުރުވުންވެސް ވަނީ ހިމަނާފައެވެ.