މަސްވެރިކަމަކީ ރާއްޖޭގެ އިޤްތިޞާދުގައި މުހިންމު ޙިއްޞާއެއް އަދާކުރާ ސިނާޢަތެކެވެ. ރާއްޖެއިން އެކްސްޕޯޓްކުރާ ބާވަތްތަކުގެ ތެރެއިންވެސް އެންމެ ބޮޑު ބައެއް ޙިއްޞާކުރަނީ މަހެވެ.
މަސްވެރިންގެ އެންމެ ބޮޑު އެއް ކަންބޮޑުވުމެއްގެ ގޮތުގައި އަބަދުވެސް އޮންނަނީ އައިސް ލިބުމުގައި ހުރި ދަތިތަކެވެ. މަސްވެރިން ބާނާ މަސް ތާޒާކަމާއެކު ރައްކާކޮށް، މަހުގެ ކޮލެޓީ ރަނގަޅަށް ހިފެހެއްޓެނީ އައިސް ބޭނުންކޮށްގެނެވެ. މި މަސައްކަތް ކުރުމަށް ރާއްޖޭގެ އެކި ހިސާބުތަކުގައި ސަރުކާރުން ވަނީ އައިސްޕްލާންޓްތައް ޤާއިމްކުރައްވައިފައެވެ. ނަމަވެސް މިއީ މިކަަމަށް އެންމެ އެދެވޭ ޙައްލެއް ނޫނެވެ.
އައިސް ހޯދަން ދޯނިފަހަރު ކުރަންޖެހޭ ދަތުރު ކުޑަކޮށް ނުވަތަ ފަސޭހަކަމާއެކު އައިސް ލިބޭނެ އިންތިޒާމް ހަމަޖެއްސެވުމަށް ސަރުކާރުން ގެންދަވަނީ މަސް ދޯނިފަހަރުގައި ލޮނުފެނުން މަސް ފިނިކުރާ ނިޒާމް ނުވަތަ އާރުއެސްޑަބްލިއު ސިސްޓަމް ޤާއިމްކުރެއްވުމުގެ މަސައްކަތް ކުރައްވަމުންނެވެ. އަދި މިހާރު ބައެެއް ދޯނި ފަހަރުގައި މި ނިޒާމް ވަނީ ޤާއިމްވެސް ކުރައްވައިފައެވެ.
ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ވިދާޅުވީ، މިހާރުވެސް 300 އުޅަނދުގައި ލޮނުފެނުން މަސް ފިނިކުރެވޭނެ ނިޒާމް ޤާއިމްކުރުމަށް ފައިސާ ލިބިފައިވާ ކަމަށެވެ. މިނިސްޓްރީން ބޭނުންވަނީ ވީހާވެސް ގިނަ މަސް ދޯނިފަހަރުގައި މި ނިޒާމް ޤާއިމްކުރައްވައި މަހުގެ ކޮލެޓީ ރަނގަޅު ކުރެވޭނެ މަގު ފަހިކޮށްދެއްވުމަށް ކަމަށް މިނިސްޓަރ ވިދާޅުވިއެވެ. އެހެންކަމުން މި ނިޒާމް ޤާއިމްކުރަން ބޭނުންވާ ދޯނިތަކުން އެކަމަށް އެދުމަށް މިނިސްޓަރ ވަނީ އެދުވަޑައިގަންނަވާފައެވެ.
“300 އުޅަނދުގައި އާރުއެސްޑަބްލިއު ސިސްޓަމް އަޅަން މިހާރުވެސް ލާރި އެބަހުރި އަޅުގަނޑުމެންގެ އަތުގައި. މިދައްކަނީ ލާރީ ހޯދާނެ ވާހަކައެއް ނޫން. ލާރި ހުރިވާހަކަ މިދައްކަނީ. އެހެންވީމަ މަސްވެރި ދޯނިފަހަރުގެ އޮޑިވެރިން އެދެންވީ އެ ލޯނު ހޯދަން. އޭގެ އިތުރަށް މިނިސްޓްރީގައި އެބަހުރި ލާރި އާރުއެސްޑަބްލިއު އަޅަން. އެގްރިމަންޓްވެސް މިހާރު އަޅުގަނޑުމެން ބަދަލުކޮށްފިން އެ ފައިސާ ބޭނުންވާ މީހުންނަށް އެހެން ބަޔަކު މެދުވެރިނުކޮށް އަމިއްލައަށް ގެނެސްގެންވެސް ދޯނީގައި އެ އެޅޭގޮތައް.” މިނިސްޓަރ ވިދާޅުވިއެވެ.
މިލޯން ޕްރޮގްރާމްގެ ދަށުން ލޯނުގެ ގޮތުގައި ދޫކުރާނެ އެންމެ ގިނަ އަދަދަކީ، 5 ލައްކަ ރުފިޔާއެވެ. މި ފައިސާ ބޭނުންކުރަން ޖެހޭނީ އާރް.އެސް.ޑަބްލިއު ސިސްޓަމް ގަނެ އިންސްޓޯލްކުރުމަށެވެ.
6 އިންސައްތަ އިންޓްރެސްޓު ރޭޓެއްގައި ދޫކުރާ މިލޯނު އަދާކުރަން ޖެހެނީ 6 އަހަރު ދުވަހުގެ ތެރޭގައެވެ. ލޯނުގެ ފައިސާ އަނބުރާ ދައްކަން ފަށަންޖެހޭ މުއްދަތަކީ ލޯނުގެ އެއްބަސްވުމުގައި ސޮއިކުރާ ތާރީޚުން ފެށިގެން 6 މަސްދުވަހެވެ. މި ލޯނަށް އެދޭ ފަރާތުން ލޯނު ހޯދުމަށް ރަހުނެއްގެ ގޮތުގައި އެއްވެސް އެއްޗެއް ބަހައްޓާކަށް ނުޖެހޭނެކަމަށް ފިޝަރީޒް މިނިސްޓްރީން ހާމަކުރެއެވެ.