ސްޓޭޓް ޓްރޭޑިންގ އޮގަނައިޒޭޝަން އެސްޓީއޯއިން އަލަށް ގެނައި ބާޖާއިއެކު މާފަރު އިންޓަނޭޝަނަލް އެއަރޕޯޓަށް އެކުންފުނިން ފޯރުކޮށްދޭ ޖެޓް ފިއުލްގެ އަގު ހެޔޮވެފައިވާ ކަމަށް އެސްޓީއޯއިން ވިދާޅުވެއްޖެއެވެ.
ޖެޓް ފިއުލްއަށް ޚާއްސަ ބާޖެއް އެސްޓީއޯގެ އަތުގައި ނެތުމުން މީގެކުރިން އެއަރޕޯޓަށް ޖެޓް ފިއުލް ފޯރުކޮށްދެމުން ދިޔައީ ވަރަށް އުނދަގުލުގައެވެ. އެސްޓީއޯއިން ވިދާޅުވީ، ޖެޓް ފިއުލްއަކީ ވަކި ކޮލެޓީއެއްގައި ބަހައްޓަންޖެހޭ އެއްޗަކަށް ވުމުގެ ސަބަބުން އެ ކުންފުނިން ވިއްކާ އެހެން ތެލާއި ޚިލާފަށް ޖެޓް ފިއުލް އެއްތަނުން އަނެއްތަނަށް އުފުލުމުގައިވެސް ވިސްނަންޖެހޭކަމަށެވެ. އެހެންކަމުން ޖެޓް ފިއުލް އުފުލަން ބޭނުންކުރަންޖެހެނީ ވަކި ޚާއްސަ އާލާތްތަކާއި އުޅަނދުތަކެކެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެސްޓީއޯގެ އެނަރޖީ ޑިޕާޓްމަންޓްގެ ޓަރމިނަލް މެނޭޖަރ މުޙައްމަދު ޝުއައިބް އަޙްމަދު ވިދާޅުވީ، ޖެޓް ފިއުލްއަށް ޚާއްސަ ބާޖެއް ކުރިން އެސްޓީއޯގެ އަތުގައި ނެތުމުން އެއަރޕޯޓަށް ޖެޓް ފިއުލް ފޯރުކޮށްދެމުން އައީ ފީފާތަކަށް އަޅައިގެން އެ ފީފާތައް ބޯޓަކަށް އަރުވައިގެންނެވެ. މިއީ ވަރަށް އުނދަގޫ ބުރަބޮޑު އޮޕަރޭޝަނެއްކަން ފާހަގަކުރައްވައި އޭނާ ވިދާޅުވީ، މިހާރު ބާޖު އޮޕަރޭޝަނަށް ގެނެވުމުން އޮޕަރޭޝަން ވަރަށް ބޮޑަށް ފަސޭހަވެފައިވާކަމަށެވެ. މިހާރު ސީދާ ބާޖަށް ތެޔޮ އަޅައި އެއަރޕޯޓަށް ގެންދެވެއެވެ.
ޖެޓް ފިއުލްއަށް ޚާއްސަ ”ލަގަނާ“ ބާޖު އެސްޓީއޯއިން ގެނެސްފައިވަނީ އޭޕްރީލް މަހުގެ 30 ވަނަ ދުވަހުއެވެ. އަދި މިހާރު މި ބާޖު ވަނީ މާފަރު އެއަރޕޯޓަށް ޖެޓް ފިއުލް އުފުލުމުގައި ބޭނުންކުރަންފަށާފައެވެ.
މާފަރު އެއަރޕޯޓާއި އެސްޓީއޯއާއި ދެމެދު ވަނީ ޖެޓް ފިއުލް ފޯރުކޮށްދިނުމުގެ އެއްބަސްވުމެއްގައި ސޮއިވެސްކޮށްފައެވެ. އެސްޓީއޯއިން ވިދާޅުވީ، މި އެއްބަސްވުމާއިއެކު ކުރިން މާފަރަށް ޖެޓް ފިއުލް ލިބޭ އަގަށްވުރެ ހެޔޮ އަގެއްގައި މިހާރު ޖެޓް ފިއުލް ލިބޭނެކަމަށެވެ.
މާފަރު އިންޓަނޭޝަނަލް އެއަރޕޯޓަކީ ގިނަ އަދަދެއްގެ ޕްރައިވެޓް ޖެޓް ޖައްސާ އެއަރޕޯޓެކެވެ. ޝުއައިބް ވިދާޅުވީ، މި ބާޖު ބޭނުންކޮށްގެން މާފަރު އެއަރޕޯޓަށް ބޭނުންވާ ތެޔޮ 3 ދަތުރުން ފޯރުކޮށްދެވޭނެކަމަށެވެ.
“މިއީ ދެލައްކަ ތިރީސްހާސް ލީޓަރު އެޅޭ ބާޖެއް. ބާޖު އަޅުގަނޑުމެން މި ތައްޔާރުކުރީ މާފަރު އެއަރޕޯޓަށް ތެޔޮ އެޅުމަށްޓަކައި. މާފަރު އެއަރޕޯޓްގެ ރިކުއަޔަރމަންޓަކީ ގާތްގަނޑަކަށް މަހަކު 7 ލައްކަ ލީޓަރު ވަރު. އެހެންވީމަ އަޅުގަނޑުމެންނަށް ގާތްގަނޑަކަށް 3 ދަތުރު ކޮށްލައިގެން އެއަރޕޯޓަށް ބޭނުންވާ ތެޔޮ ސަޕްލައިކޮށްލެވޭނެ.” ޝުއައިބް ވިދާޅުވިއެވެ.
މާފަރު އިންޓަނޭޝަނަލް އެއަރޕޯޓްގެ އިތުރުން ވެލާނާ އިންޓަނޭޝަނަލް އެއަރޕޯޓަށްވެސް އެސްޓީއޯއިން ދަނީ ޖެޓް ފިއުލް ފޯރުކޮށްދެމުންނެވެ. އެސްޓީއޯއިން ވިދާޅުވީ، ގާތްގަނޑަކަށް ހަފްތާއެއްގެ މައްޗަށް އެ ކުންފުނިން 25000 އާއި 30000 ފީފާގެ ޖެޓް ފިއުލް ފޯރުކޮށްދޭކަމަށެވެ.
އެސްޓީއޯ އިން ވަނީ ބާޖާ އެކީ، އިންޑަސްޓްރީގެ ބެސްޓް ޕެރެކްޓިސްއާ އެއްގޮތަށް، ޖެޓް އޭ-1 ތެޔޮ ރިފައިނަރީން ފެށިގެން ފްލައިޓްއާ ހަމައަށް ޓްރޭސް ކުރެވޭނެ ކުއަލިޓީ އެޝުއަރެންސް ނިޒާމެއް ގާއިމު ކޮށްފެއެވެ. އެގޮތުން ކޮންމެ ޓްރާންސްފާ ޕޮއިންޓެއްގައި ތެލުގެ ސާމްޕަލް ނަގައި އެސްޓީއޯ އިން މާލޭގައި ގާއިމުކުރި ލެބޯޓްރީގައި ޓެސްޓްކުރާނެއެވެ.