ދިވެހިރާއްޖޭގެ ޤައުމީ ޔުނިވަރސިޓީގެ ލަރނިން ސެންޓަރެއް ނިލަންދެ އަތޮޅު ނިލަންދޫގައި ހުޅުވައިފިއެވެ.
ނިލަންދޫގެ ލަރނިން ސެންޓަރު ހުޅުވައިދެއްވީ، ޤައުމީ ޔުނިވާސިޓީގެ ވައިސް ޗާންސެލަރ ޑރ.ޢަލީ ފަވާޒެވެ. ނިލަންދޫ ލަރނިންގ ސެންޓަރުގައި 5 ޕްރޮގްރާމެއް ކުރިއަށް ގެންދިއުމަށް ވަނީ ނިންމަވާފައެވެ. އެއީ ސެންޓާރ ފޮރ އޯޕަންލާނިގެ ފަރާތުން ހިންގަވާ 2 ކޯހަކާއި ފެކަލްޓީ އޮފް އެޑިއުކޭޝަންގެ 3 ކޯހެކެވެ.
އެ ކޯސްތަކަކީ ސެންޓަރ ފޮރ އޯޕަން ލާނިންގ ސެންޓަރުގެ ފަރާތުން ހިންގަވާ އެޑްވާންސް ސެޓްފިކެޓް އިން ހިއުމަން ރިސޯސް މެނޭޖްމަންޓް ޕްރޮގްރާމަކާއި، އިންގްލިޝް ފޮރ ފަރދަރ ސްޓަޑީޒް ޕްރޮގްރާމެވެ. ފެކަލްޓީ އޮފް އެޑިއުކޭޝަންގެ ފަރާތުން ހިންގަވާ 3 ކޯހަކީ، ދިވެހި ބަހުގެ ޑިގްރީ ޕްރޮގްރާމަކާއި، ބެޗްލަރސް އޮފް އެޑިއުކޭޝަން ޕްރައިމަރީ ޓީޗިންގ އަދި މާސްޓަރސް އޮފް އެޑިއުކޭޝަން ޕްރޮގްރާމެވެ.
މި ސެންޓަރުން މިވަގުތު 63 ދަރިވަރުން ތަޢުލީމް ހާސިލްކުރެއެވެ. މި ސެންޓަރު ހުޅުއްވާދެއްވާ ވާހަކަ ދައްކަވަމުން ޤައުމީ ޔުނިވާސިޓީގެ ވައިސް ޗާންސެލަރ ޑރ.ޢަލީ ފަވާޒް ޝަރީފް ވިދާޅުވީ، ކޮންމެ ދަރިވަރަކަށް ވެސް އެ ދަރިވަރަކު ބޭނުންވާ ތަޢުުލީމެއް އެ ދަރިވަރަކު ދިރިއުޅޭ ހިސާބަށް ގެންދިޔުމަށް މަސައްކަތް ކުރާ ކަމަށެވެ. އެހެންކަމުން މި ލިބުނު ފުރުޞަތުގެ ބޭނުންހިފުމަށް ދަރިވަރުންނަށް އިލްތިމާސްކުރެއްވިއެވެ.
މި ރަސްމިއްޔާތުގައި ވާހަކަ ދައްކަވަމުން ނިލަންދޫ ދާއިރާގެ މެމްބަރު އަބްދުﷲ ޚަލީލް ވިދާޅުވީ، ޤައުމީ ޔުނިވާސިޓީ އަކީ މުޅިރާއްޖޭގެ ޔުނިވާސިޓީގެ ގޮތުގައި މިހާރު ސިފަވަމުންދާކަމަށެވެ. ނިލަންދޫ ކައުންސިލްގެ ރައީސް މުޙައްމަދު ޚަލީލް ދެއްކެވި ވާހަކާގައި، މިއީ ނިލަންދޫގެ ތަޢުލީމީ ހަޔާތުގައި އެންމެ އުފާވެރި އެއްދުވަސްކަމަށް ވިދާޅުވެ، މި ސެންޓަރުން ފ.އަތޮޅުގެ އިތުރުން ދ.އަތޮޅުގެ ރައްޔިތުންނަށްވެސް ތަޢުލީމް ހާޞިލްކުރުމަށް ލުއިފަސޭކަން ލިބިގެންދާނެކަމަށް ވިދާޅުވިއެވެ.
ނިލަންދޫ އޯޕަން ސެންޓަރުގެ ކޯސްތައް މިވަގުތު ކުރިއަށްދާނީ ފ. އަތޮޅު ތައުލީމީ ސެންޓަރުގެ ކްލާސްރޫމް ތަކުގައެވެ. ނިލަންދޫ ލަރނިންގ ސެންޓަރަށް މިހާރު އިމާރާތެއް ހަމަޖެހިފައިވާއިރު ވަރަށް އަވަހަށް އެ އިމާރާތުގައި 2 ކްލާސްރޫމާއި ހޯލެއް ޤާއިމުކުރަން ވަނީ ނިންމާފައެވެ. ފ.އަތޮޅު ތައުލީމީ މަރުކަޒުގެ ޕްރިންސިޕަލް ޢަބްދުﷲ އަޙްމަދު ވިދާޅުވީ، މިފެށިގެންދިޔަ 5 ޕްރޮގްރާމްގެ އިތުރުން، ޤައުމީ ޔުނިވަރސިޓީގެ އިތުރު ކޯސްތައް އަވަސް މުސްތަޤުބަލެއްގައިފެށި، ޔުނިވާސިޓީގެ ކެމްޕަހަކަށް އެ ސެންޓަރު ހެދުމަށް މަސައްކަތް ކުރައްވާނެކަމަށް ވިދާޅުވިއެވެ.
ޤައުމީ ޔުނިވަރސިޓީގެ މާލޭގެ ކެމްޕަސްތަކާއި މަރުކަޒުތަކުގެ އިތުރުން، ރާއްޖޭގެ 4 ސަރަޙައްދެއްގައި ޔުނިވަރސިޓީގެ ކެމްޕަސްތަކުގައި ކިޔަވައިދެމުން ގެންދެއެވެ. ދިވެހިރާއްޖޭގެ ޤައުމީ ޔުނިވަރސިޓީގައި މިވަގުތު ނުވަހާސް އަށްސަތޭކައަށްވުރެ ގިނަ ދަރިވަރުން މަތީ ތަޢުލީމު ޙާޞިލުކުރަމުން ގެންދެއެވެ.