ރާއްޖޭގައި ހުޅުވާ ފުރަތަމަ ”ސްމާރޓް ޝޮޕް“ ހުޅުވުމުގެ މަސައްކަތް އެސްޓީއޯއިން ވަނީ ފަށާފައެވެ. މިއީ ކޭޝިއަރެއް އަދި ސޭލްސް މީހެއް ނެތި ވިޔަފާރިކުރެވޭނެ ފިހާރައެކެވެ.
އެސްޓީއޯގެ ”ސްމާރޓް ސޮޕް“ ގެ މަސައްކަތް ބާރު ސްޕީޑްގައި ކުރިއަށްދާއިރު، މި ފިހާރަ އަންނަ ޖުލައި މަހުގެ ފަހުކޮޅު ހުޅުވޭނެކަމަށް އެ ކުންފުނިން ވަނީ ބުނެފައެވެ. މި ފިހާރައިގައި ނިއު އެމާޖިންގ 2 ޓެކްނޮލޮޖީއެއް ބޭނުންކުރާނެއެވެ. އެއީ އާޓިފިޝިއަލް އިންޓަލިޖެންސްގެ ވިޝަންއާއި، އައިއޯޓީ ބޭނުންކޮށްގެން ފިހާރައިގައި ކޭޝިއަރަކު ނެތި ކަސްޓަމަރު ވަދެ ޓްރާންސެކްޝަން ނިންމާފައި ނިކުމެގެންދާ ޕްރޮސެސްއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެސްޓީއޯގެ ޗީފް އިންފޮމޭޝަން އޮފިސަރ އިސްމާއިލް މިފްރާހް ވިދާޅުވީ، މި ފިހާރައާއިއެކު ކަސްޓަމަރުންނަށް ވަރަށް ބޮޑު ފަސޭހަތަކެއް ލިބިގެންދާނެކަމަށެވެ. އެގޮތުން މި ފިހާރައާއެކު ޒަމާނުއްސުރެ ދިވެހިން ވިޔަފަރިކުރަމުން އައި ވައްޓަފާޅި ބަދަލުކޮށްލާނެކަމަށް އޭނާ ވިދާޅުވިއެވެ.
އެސްޓީއޯއަކީ ޒަމާނުއްސުރެވެސް ރާއްޖޭގައި އެންމެ ވަރުގަދަ ވިޔަފާރި ކުންފުނީގެ ގޮތުގައި އޮޕަރޭޓްކުރަމުންދާ ކުންފުންޏަށްވާއިރު، އައު ޓެކްނޮލޮޖީ ތައާރަފްކޮށްގެން އައު ގޮތަކަށް ކަންކަން ކުރުމަށް އެ ކުންފުނިން އަބަދުވެސް މަސައްކަތް ކުރަމުންދާކަން އޭނާ ފާހަގަކުރެއްވިއެވެ.
”މިއީ ވަރަށް ފަސޭހަކަމާއިއެކު ވިޔަފާރި ކުރެވޭނެ މޮޑެލެއް އިނގޭތޯ. އަޅުގަނޑުމެން ތައާރަފްމިކުރަނީ މޯބައިލް އެޕްލިކޭޝަނެއް. އެ މޯބައިލް އެޕްލިކޭޝަންގައި އިންނަ މޯބައިލް ޑައުންލޯޑް ކޮލަމްއަށްފަހު އޭގަ މިއިންނަ ކިއުއާރު ކޯޑެއް މި ބޭނުންކުރަނީ ފިހާރައަށް ވަންނަން. ކިއުއާރު ކޯޑު ސްކޭންކޮށްލީމަ ގޭޓު ހުޅުވޭނެ. ގޭޓު ހުޅުވުމަށްފަހު ދެން ފިހާރައަށް ގޮއްސަ ބޭނުންވާ އައިޓަމެއް ޕިކްކޮށްލައިގެން ނިކުތީމަ އެހިސާބުން އެ ނިމުނީ. އެއްވެސް މުވައްޒަފެއް ނުހުންނާނެ ފިހާރަތެރެއަކު. އަޅުގަނޑުމެން މިކިޔަނީ ”ޕިކް އެންޑް ގޯ“ ކޮންސެޕްޓް.”އިސްމާޢީލް މިފްރާހް ވިދާޅުވިއެވެ.
ފިހާރައަށް ވަންނަން ކިއުއާރު ކޮންސެޕްޓް ބޭނުންކުރިނަމަވެސް ފޭޝިއަލް ރިކޮގްނިޝަން ބޭނުންކުރަން ބޭނުންވާ ކަސްޓަމަރުންނަށް އެ ފުރުޞަތުވެސް ފަހިކޮށްދެއްވާނެކަމަށް މިފްރާހް ވިދާޅުވިއެވެ. ފޭޝިއަލް ރިކޮގްނިޝަން ބޭނުންކުރަން ބޭނުންވާ ފަރާތްތަކަށް ކިއުއާރު ސްކޭންކުރާކަށް ނުޖެހޭނެއެވެ. ފިހާރައަށް ވަނުމާއިއެކު ފިހާރައަށް އެއީ ރެޖިސްޓާރޑް ކަސްޓަމަރެއްކަން އެނގޭނެއެވެ.
މިފްރާހް ވިދާޅުވީ، ވިޔަފާރިކުރާ މީހާގެ ކާޑުގެ މަޢުލޫމާތު އެޕްލިކޭޝަނަށް ހުންނާނީ ސޭވްވެފައިކަމަށެވެ. އެހެންކަމުން ބޭނުންވާ ޕްރޮޑަކްޓެއް ހިފައިގެން ނިކުންނަތާ މަދުވެގެން 10 ނުވަތަ 15 ސިކުންތުގެ ތެރޭގައި ފައިސާ ރަސީދު ލިބޭނެކަމަށެވެ.
މި ފިހާރައިގައި ހުންނާނީ ރައްކާތެރިކަމުގެ ގިނަ ފިޔަވަޅުތަކެއްވެސް އަޅާފައެވެ. އެގޮތުން ފިހާރައިގައި ހުންނާނީ ކެމެރާ ހަރުކޮށްފައެވެ. ކެމެރާތަކުން ކަސްޓަމަރުންގެ ހަރަކާތްތައް، ފެޓާން އަދި ކަސްޓަމަރ ނަގާ އައިޓަމް ދެނެގަންނާނެއެވެ. އަދި ޝެލްފް ތަކުގައިވެސް ހުންނާނީ ވެއިޓް ސެންސާރސް ހަރުކޮށްފައެވެ. އެހެންކަމުން ކަސްޓަމަރު އައިޓަމްތައް ނަގާ ޢަދަދު ސިސްޓަމަށް އިނގޭނެއެވެ.
އެސްޓީއޯއިން ބުނީ ފިހާރައިގައި ހުރިހައި ޕްރޮޑަކްޓެއްގައިވެސް ހުންނާނީ އަގު ފެންނަގޮތައް ޖަހާފައިކަމަށެވެ. ކޮންޕިއުޓަރ ވިޝަންއިން %99 އެކިއުރޭޓްވީކަމުގައިވިއަސް %1 ޕްރޮޑަކްޓް މިސްރީޑް ވުމުގެ ފުރުޞަތު އޮތުމާއިއެކު އެ ޙާލަތުގައި އެޕް މެދުވެރިކޮށް ރިފަންޑް ކުރުމުގެ ފުރުޞަތު ނުވަތަ ސަޕޯޓަރ ކޮންޓެކްޓް ކުރުމުގެ ފުރުޞަތު ކަސްޓަމަރުންނަށް ލިބިގެންދާނެކަމަށް މިފްރާހް ވިދާޅުވިއެވެ.
ސްމާރޓް ސްޓޯރ ހަދަނީ ހުޅުމާލޭގައި އެސްޓީއޯގެ ފިހާރަ ކުރިން ހުރި ތަނުގައެވެ. ރާއްޖޭގެ އިތުރުން ދުނިޔޭގެ ކުރިއަރާފައިވާ ބައެއް ޤައުމުތަކުގައިވެސް މި ކޮންސެޕްޓް ދަނީ ބޭނުންކުރަމުންނެވެ. އެގޮތުން ރާއްޖެއާއި ކައިރި ބައެއް ޤައުމުތަކަށް ބަލާއިރު ސިންގަޕޫރު، މެލޭޝިއާ، ދުބާއީ ފަދަ ޤައުމުތައް ހިމެނެއެވެ.