ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯގެ މިއަހަރުގެ އަހަރީ އާންމު ޖަލްސާގައި ހިއްސާދާރުންނަށް ރަޖިސްޓްރީކުރުމަށް ފަސޭހަ ގޮތްތަކެއް ހަމަޖައްސާފައިވާކަމަށް އެ ކުންފުނިން ބުނެފިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެސްޓީއޯގެ ޗީފް އިންފޮމޭޝަން އޮފިސަރ އިސްމާއިލް މިފްރާހް ވިދާޅުވީ، އެސްޓީއޯގެ އަހަރީ އާންމު ޖަލްސާ މިމަހުގެ 31ގައި އޮންނާނެކަމަށެވެ. މިއަހަރުގެ އަހަރީ އާންމު ޖަލްސާގައި ހިއްސާދާރުން ރަޖިސްޓްރީކުރުމާއި އަދި ބަދަލުގައި އެހެން މީހަކު ފޮނުވާނަމަ އެކަން ހަމަޖެއްސުމަށް ފަސޭހަކުރުމަށް ޙާއްސަ ޕޯޓަލްއެއް ޤާއިމްކޮށްފައިވާކަމަށް އޭނާ ވިދާޅުވިއެވެ.
ކުރިން އޮންނަ ގޮތުން ހިއްސާދާރުގެ ބަދަލުގައި އެހެންމީހަކު ފޮނުވާނަމަ އެސްޓީއޯއަށް ސިޓީއަކާއިއެކު ބަދަލުގައި ފޮނުވާ ފަރާތުގެ އައިޑީކާޑު ކޮޕީއެއް މެއިލްކުރަންޖެހެއެވެ. މެއިލްކުރުމުން އެސްޓީއޯއިން ހިއްސާދާރަށް ގުޅައި އެކަން ޔަޤީންކުރާނެއެވެ. ނަމަވެސް އަލަށް ތައާރަފްކުރި ޕޯޓަލްއާއިއެކު މި މަސައްކަތް ފަސޭހަވެގެންދާނެކަމަށް މިފްރާހް ވިދާޅުވިއެވެ.
"އަހަރީ އާންމު ޖަލްސާގައި ހިއްސާދާރުންނަށް މިފަހަރު އަޅުގަނޑުމެން ރަޖިސްޓަރ ކުރުމަށާއި ޕްރޮކްސީ އެސައިން ކުރުމަށް ކްރިއޭޓްކޮށްފައި އިންނާނެ ޕޯޓަލްއެއް. ކުރީގައި ވެއްޖިއްޔާ އަހަރީ އާންމު ޖަލްސާއަށް ފިޒިކަލީ އެޓެންޑް ނުކުރެވޭ ހިއްސާދާރުން ޕްރޮކްސީ މި އެސައިން ކުރަނީ އެހެންބޭފުޅަކު ދެއްތޯ. އެ މަސައްކަތް ކުރިން ވެއްޖިއްޔާ ދާނީ ވަރަށް މެނުއަލް ގޮތެއްގައި ނަމަވެސް މިހާރު އަޅުގަނޑުމެން މި ޑިވެލޮޕްކުރި ޕޯޓަލް ތެރެއިން ހިއްސާދާރަށް އެމީހަކު އެ ބޭނުންވާ ފަރާތަކަށް ޕްރޮކްސީ އެސައިންކުރުމުގެ ފަސޭހަ ލިބިގެންދާނެ." އިސްމާއިލް މިފްރާހް ވިދާޅުވިއެވެ.
ހިއްސާދާރުން ރަޖިސްޓްރީކުރުމަށް އެސްޓީއޯއިން ތަރައްޤީކޮށްފައިވާ ޕޯޓަލް އިންނާނީ ސަރުކާރުގެ އީފާސް ލޮގިން ސިސްޓަމާއި ގުޅާލާފައިކަމަށް އެ ކުންފުނިން ބުނެއެވެ. އެހެންކަމުން އީފާސް މެދުވެރިކޮށް ވަރަށް ފަސޭހަކަމާއިއެކު ލޮގިންކޮށްގެން އަހަރީ އާންމު ޖަލްސާގައި ބައިވެރިވުމުގެ ކަންކަން ކުރިއަށްގެންދެވޭނެކަމަށް އެސްޓީއޯއިން ބުނެއެވެ.
އެސްޓީއޯގެ މިދިޔަ އަހަރުގެ ވިޔަފާރީގެ ފައިދާއިން ޙިއްޞާއަކަށް 77 ރުފިޔާ ބެހުމަށް އެ ކުންފުނީގެ ޑިރެކްޓަރުންގެ ބޯޑުން ރުހުންދެއްވައިފިއެވެ.
މިދިޔަ އަހަރު އެސްޓީއޯއިން ބަހާފައިވަނީ ޙިއްޞާއަކަށް 65 ރުފިޔާއެވެ. އެހެންކަމުން މިއަހަރުގެ އަދަދަކީ މިދިޔަ އަހަރާއި އަޅާބަލާއިރު 12 ރުފިޔާގެ އިތުރުވުމެކެވެ. 2020 ވަނަ އަހަރު އެސްޓީއޯއިން ޙިއްޞާއަކަށް ބަހާފައިވަނީ 58 ރުފިޔާއެވެ.