ހުޅުމާލޭގައި ޢިމާރާތްކުރަމުންދާ ކޭ-ޕާރކް ރެސިޑެންސްއިން އެޕާޓްމަންޓް ގަނެފައިވާ ފަރާތްތަކުން އެއްވެސް ޝަކުވާއެއް އޮތްނަމަ އެކަން ވީ އެންމެ އަވަހަކަށް ފުލުހުންނާ ހިއްސާކުރެއްވުމަށް ފުލުހުން އެދިވަޑައިގެންފިއެވެ.
ފުލުހުން މިކަމަށް އެދިވަޑައިގެންފައި މިވަނީ، ހަންބޯ ކުންފުންޏާއި އެޗްޑީސީއާއިއެކު ހަދާފައިވާ އެއްބަސްވުމުގެ ދަށުން ހުޅުމާލޭގައި ޢިމާރާތްކޮށްކުރަމުންދާ ކޭ-ޕާކް ރެސިޑެންސްގެ އެޕާޓްމަންޓްތައް ހަންބޯ ކުންފުނީގެ ނަމުގައި ހަދާފައިވާ ފޯޖު ލިޔުންތައް ބޭނުންކޮށްގެން އެޕާޓްމަންޓްތައް އާންމުނަށް ވިއްކަމުންދާކަމަށް ތުހުމަތުކުރެވޭ މައްސަލަ ތަހްޤީޤްކުރައްވަމުން އަންނަކަން ހާމަކުރައްވާ ނެރުއްވި ބަޔާނުގައެވެ.
ފުލުހުން ވަނީ މި މައްސަލައާއި ގުޅިގެން ކޭ-ޕާރކް ރެސިޑެންސްއިން އެޕާޓްމަންޓް ގަނެފައިވާ ފަރާތްތަކުން އެއްވެސް ޝަކުވާއެއް އޮތްނަމަ އެކަން ވީ އެންމެ އަވަހަކަށް ފުލުހުންނާ ހިއްސާކުރުމަށް އެދިވަޑައިގެންފައެވެ.
ކޭ-ޕާރކް ޕާޓްމެންޓްތަކެއް ވިއްކުމުގެ ނަމުގައި މަކަރާއި ހީލަތްހަދައި، ބޮޑެތި ޢަދަދުތަކުން ގިނަ ބައެއްގެ އަތުން ފައިސާ ނަގާ މައްސަލަ ފުލުހަށް ހުށައެޅީ އެޗްޑީސީންނެވެ.
ކޭ ޕާކް ރެސިޑެންސް ރަސްމީކޮށް ލޯންޗްކޮށްފައިވަނީ 2016 ވަނަ އަހަރުގެ ނޮވެމްބަރ މަހުގެ ތެރޭގައެވެ. ކޭ-ޕާކް ރެސިޑެންސަކީ ކޮރެއާގެ ހަންބޯ ކުންފުނިން ކުރިއަށްގެންދާ 14 ބުރީގެ 110 އެޕާޓްމަންޓް ތަރައްޤީކުރުމުގެ މަޝްރޫޢުއެކެވެ.