އެމްއެންޔޫއިން ޤައުމުގެ އިޤްތިޞާދު ބިނާކުރުމަށް ކުރައްވަނީ މުހިންމު މަސައްކަތްތަކެއް: މިނިސްޓަރ
އެކައުންޓިންއާއި، އިންޖިނިއަރިންg ހޮސްޕިޓާލިޓީ އަދި ޓޫރިޒަމްގެ ދާއިރާއަށް ޚާއްޞަކޮށްގެން ޤައުމީ ޔުނިވަރސިޓިން ކުރައްވާ މަސައްކަތަކީ ޤައުމުގެ އިޤްތިޞާދަށް މުހިންމު މަސައްކަތަކެއް ކަމަށް ހަޔަރ އެޑިއުކޭޝަން މިނިސްޓަރ ޑރ.އިބްރާހީމް ޙަސަން ވިދާޅުވެއްޖެއެވެ. މިނިސްޓަރ މިހެން ވިދާޅުވީ ޤައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ހަޔަރ އެޑިއުކޭޝަން މިނިސްޓަރ ވިދާޅުވީ އެކައުންޓިން، ޓޫރިޒަމް އަދި ހޮސްޕިޓަލިޓީ، އިންޖިނިއަރީންގ ދާއިރާއަކީ ރާއްޖޭގެ އިޤްތިޞާދުގައި މުހިންމު ދައުރެއް އަދާކުރާ ދާއިރާތަކެއް ކަމަށެވެ. އެ ދާއިރާތަކުން ފަންނީ ޤާބިލް މީހުން ބިނާކުރުމަށް އެޔުނިވަރސިޓީގެ ފެކަލްޓީތަކުން ކުރައްވާ މަސައްކަތްތައް މިނިސްޓަރ ފާހަގަކުރެއްވިއެވެ.
އެ ދާއިރާތަކަކީ ބިދޭސީން ގިނަ ދާއިރާތަކެއް ކަމަށާއި، އޭގެ ސަބަބުން ވަރަށް ގިނަ ޢަދަދަކަށް ބޭރުފައިސާ ރާއްޖެއިން ބޭރުވެގެންދާކަން ވެސް ފާހަގަކުރެއްވިއެވެ.
ހަޔަރ އެޑިއުކޭޝަން މިނިސްޓަރ ވިދާޅުވީ ރާއްޖޭގެ މަތީ ތަޢުލީމްގެ ދާއިރާއިން ދަސްވެނިވާ ކުދިންނާމެދު ސަރުކާރުގެ މުހިންމު ތަސައްވުރެއް އެބައޮތްކަމަށެވެ. އަދި ޤައުމު ބިނާކުރުމާއި، އާރާސްތުކުރުމުގައި ދަރިވަރުންގެ ކިބައިގައި މުހިންމު މަސްއޫލިއްޔަތެއް އޮތްކަން މިނިސްޓަރ ދަރިވަރުންނަށް ހަނދާންކޮށްދެއްވިއެވެ.
"މި ދާއިރާއަކީ ބިދޭސީއިން ވަރަށް ގިން ދާއިރާތަކެއް. އެހެންވުމުގެ ސަބަބުން ގިނަ ފައިސާތަކެއް އެބަ ގެއްލިގެންދޭ. އެހެންވިމަ ސަރުކާރުވެސް އަދި ޔުނިވާސިޓީން ވަރަށް ފޮނި އުންމީދެއް އެބަކުރޭ ތި ދަރިވަރުއްނާމެދު. އެހެންވީމަ ތި ދަސްވެނިގެ ކޮނޑުގައި އެޅިފައި އޮތް ބޮޑު މަސްއޫލިއްޔަތު އަބަދުވެސް އަދާކުރަން ޖެހޭ." ހަޔަރ އެޑިއުކޭޝަން މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަފުޅުދއްކަވަމުން މިނިސްޓަރ އިބްރާހީމް ޙަސަން ވަނީ ދަރިވަރުއްނަށް 3 ކަމަކަށް ނަސޭޙަތްތެރިވެވަޑައިގެންފައެވެ. އެގޮތުން ވަޒީފާގެ މާޙައުލައް ނިކުންނައިރު މަސައްކަތުގައި އަޚްލާޤު ހިފެހެއްޓުމުގެ މުހިންމުކަމާއި، ވަޒީފާގެ މާޙައުލުގައި ވާހަކަ ދެއްކުމުގެ އަދަބު ބަހައްޓާނެ ގޮތަށާއި، ވަޒީފާގެ މާޙައުލުގައި ތިމާގެ އަޚްލާޤް ބަހައްޓަންވީ ރަނގަޅު ގޮތްތަކަށް މިނިސްޓަރ އަލިއަޅުއްވައިލެއްވިއެވެ.
އެގޮތުން ކޮންމެ ދަރިވަރަކުވެސް ވަޒީފާގެ މާޙައުލުގައި ރަނގަޅު އަޚްލާޤެއްގެ ގެވެރިއަކަށްވެ، އެހެން މީހުންނަށް ނަމޫނާ މުވައްޒަފަކަށް ވުމަކީ މުހިންމު ކަމެއްކަމަށް މިނިސްޓަރ ވިދާޅުވިއެވެ.
ކޮންމެ މީހެއްވެސް ތަޢުލީމު ޙާޞިލްކޮށްގެން ނިކުންނައިރު، އެ ލިބުނު ތަޢުލީމާއެކު، ތެދުވެރިކަމާއި އަމާނައްތެރިކަމާއެކު މަސައްކަތްކުރުމަށް ވެސް މިނިސްޓަރ ނަސޭހަތްތެރިވެވަޑައިގަތެވެ. މީގެ ތެރެއިން ކޮންމެ ދަރިވަރަކު ވެސް ހިފަހައްޓަންޖެހޭ ހަމަތަކެއް ވާކަން ފާހަގަކުރައްވަމުން މިނިސްޓަރ މިދާޅުވީ ވަޒީފާގެ މައިދާނުގައިވެސް އަދި އެނޫންވެސް ކަންކަމުގައި އެ އުޞޫލުތަކާއި ހަމަތައް ހިފެހެއްޓުމަކީ ވަރައް މުހިންމު ކަމެއްކަމަށެއެވެ.
އަދި ކޮންމެ ދަރިވަރަކީވެސް ހެޔޮލަފާ، އަނެކާއައް އިޙްތިރާމްކުރާ އަދި މަސައްކަތުގައި ނަމޫނާ މުވައްޒަފުންތަކަކަށްވެ ނަމޫނާ މަސައްކަތްތަކެއް އެ ދަރިވަރުންގެ ކިބައިން ފެންނާނެކަމަށް އުންމީދު ކުރާކަމަށް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވަނީ ބަދަލުވަމުންދާ ދުނިޔޭގައި ދިރިއުޅުމުގެ ކޮންމެ ކަމަކީ ފައިސާއިން މިނާ ކަމެއްކަމުގައި ނުހެދުމަަށް އިލްތިމާސްކުރައްވާފައެވެ. އަދި ލިބޭ އާމްދަނީން ދިރިއުޅުމުގެ ކަންކަން ރަނގަޅުގޮތުގައި ހަމަޖެއްސުމަށް ނަސޭހަތްތެރިވެވަޑައިގަންނަވަމުން މިނިސްޓަރ ވަނީ، ކޮންމެ ދަރިވަރަކުވެސް އާއިލީ ގުޅުމަށް އިސްކަންދީ މުޖްތަމަޢުގެ ހެވާ ލާބަޔަށް ވިސްނާ ދަރިވަރަކަށްވުމަށް އިލްތިމާސްކުރައްވާފައެވެ.