ރާއްޖޭގެ އިޤްތިޞާދުގައި ހިމެނޭ މައިގަނޑު ހުރިހާ ސިނާއަތެއްވެސް މިދިޔަ އަހަރު ކުރިއަރާފައިވާ ކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ރިޕޯޓުން ދައްކައިފިއެވެ.
ކޮންމެ އަހަރަކުވެސް އެއަހަރެއްގެ ރާއްޖޭގެ އިޤްތިޞާދީ ހާލަތު ބަޔާންކޮށްދީ އަހަރީ ރިޕޯޓެއް ނެރެއެވެ. އެމްއެމްއޭއިން ނެރެފައިވާ 2022 ވަނަ އަހަރު އަހަރީ ރިޕޯޓުން ދައްކާގޮތުން މިދިޔަ އަހަރު ރާއްޖޭގެ އިޤްތިޞާދުގައި ހިމެނޭ މައިގަނޑު ހުރިހާ ސިނާއަތްތަކެއްވެސް ވަނީ ކުރިއަރާފައެވެ. އޭގެތެރޭގައި ފަތުރުވެރިކަމާއި، މަސްވެރިކަމާއި އަދި އިމާރާތްކުރުމުގެ ސިނާއަތް ހިމެނެއެވެ. އެގޮތުން 2022 ވަނަ އަހަރު ނިމުނުއިރު މުޅި އިޤްތިޞާދުވަނީ %13.9 އަށް ކުރިއަރާފައި ކަމަށް މިރިޕޯޓުން ދައްކައެވެ.
އެމްއެމްއޭގެ ރިޕޯޓުން ދައްކާގޮތުން މިދިޔަ އަހަރު އެންމެ ބޮޑަށް ކުރިއަރާފައިވަނީ ފަތުރުވެރިކަމުގެ ސިނާއަތެވެ. އެގޮތުން މިދިޔަ އަހަރު ރާއްޖޭގެ ފަތުރުވެރިކަމުގެ ސިނާއަތްވަނީ %27 އަށް ކުރިއަރާފައެވެ. ރިޕޯޓްގައިވާ ގޮތުން ކޯވިޑްގެ ކުރިން ރާއްޖެއަށް ފަތުރުވެރިން އައި އަދަދަށް މިދިޔަ އަހަރު ރާއްޖޭގެ ފަތުރުވެރިކަންވަނީ ކުރިއަރާފައެވެ. ރާއްޖެއަށް އަބަދުވެސް އެންމެ ގިނައިން ފަތުރުވެރިން އަންނަ މާކެޓް ކަމަށްވާ ޔޫރަޕާއި އޭޝިއާ މާކެޓުން ރަނގަޅު ކާމިޔާބީއެއް މިދިޔަ އަހަރު ފަތުރުވެރިކަމުން ހޯދާފައިވާ ކަމަށް އެމްއެމްއޭގެ ރިޕޯޓްގައިވެއެވެ.
މިދިޔަ އަހަރު ނިމުނުއިރު ރާއްޖެއަށް 1،675،303 ފަތުރުވެރިން ވަނީ އައިސްފައެވެ. މިދިޔަ އަހަރު ރާއްޖޭގެ ފަތުރުވެރިކަން ކުރިއެރި ސަބަބެއްކަމަށް އެމްއެމްއޭއިން ހާމަކުރައްވަފައިވަނީ ދުނިޔޭގެ ބޯޑަރުތައް ބައިނަލްއަޤްވާމީ ދަތުރުތަކަށް ހުޅުވާލުމެވެ. އަދި އައު ރަންވޭ ހުޅުވުމާއިއެކު ރާއްޖެ އަންނަ އެއަރލައިންތަކުގެ އަދަދު އިތުރުވެގެން ދިއުންވެސް މިއީ ފަތުރުވެރިން އައި ނަންބަރުތައް އިތުރުވުމުގެ ސަބަބެއްކަމަށް ރިޕޯޓްގައި ވަނީ ބުނެފައެވެ.
މަސްވެރިކަމުގެ ސިނާއަތައް ބަލާލާއިރު 2021 ވަަނަ އަހަރު މި ސިނާއަތް %2.4 ދަށައް ދިޔަނަމަވެސް މިދިޔަ އަހަރު މި ސިނާއަތުންވެސް %3.1 ގެ ކުރިއެރުމެއް ހޯދާފައިވާކަމަށް އެމްއެމްއޭގެ ރިޕޯޓުގައިވެއެވެ. މިދިޔަ އަހަރު މަސްވެރިކަމުގެ ސިނާއަތް ކުރިއަރާފައިވާ އެއް ސަބަބެއްގެ ގޮތުގައި ރިޕޯޓްގައި ބުނެފައިވަނީ ބޭނި މަހުގެ އަދަދު އިތުރުވުމެވެ.
މިފްކޯގެ ތަފާސްހިސާބުތައް ދައްކާގޮތުންވެސް މިދިޔަ އަހަރަކީ އެ ކުންފުނީގެ 12 އަހަރުގެ ތާރީޚުގައިވެސް އެންމެ ގިނަ މަސް ކިރި އަދި މަސްވެރިންނަށް އެންމެ ގިނަ އަދަދަކަށް ފައިސާ ދޫކުރި އަހަރެވެ. މިފްކޯގެ ތަފާސް ހިސާބުތައް ދައްކާގޮތުން ނިމިދިޔަ 2022 ވަނަ އަހަރުގެ ތެރޭގައި މިފްކޯއިން ވަނީ މަސްވެރިންގެ އަތުން 63،579 މެޓްރިކް ޓަނުގެ މަސް ގަނެފައެވެ. އަދި މަސްވެރިންނަށް މުޅި ޖުމްލަ 1،039،406،705 (އެއްބިލިއަން ތިރީސް ނުވަ މިލިއަން ހަތަރުލައްކަ ހަހާސް ހަތްސަތޭކަ ފަހެއް) ރުފިޔާ ވަނީ ދޫކޮށްފައެވެ.
އިމާރާތްކުރުމުގެ ސިނާއަތައް ބަލާއިރު ކޯވިޑަށްފަހު މިދިޔަ އަހަރުގެ ފަހުކޮޅު އިމާރާތްކުރުމުގެ މަސައްކަތްތައް ރަނގަޅަށް ފަށައިގަންނަން ފެށުމުގެ ސަބަބުން މި ސިނާއަތް އަންނަނީ ކުރިއަރަމުންނެވެ. އެގޮތުން މިދިޔަ އަހަރު އިމާރާތްކުރުމަށް ބޭނުންކުރާ ސާމާނު ރާއްޖެއަށް އެތެރެކުރި މިންވަރު ވަނީ %47 އިތުރުވެފައި ކަމަށް އެމްއެމްއޭގެ ރިޕޯޓުގައި ހާމަކޮށްފައިވެއެވެ. އިމާރާތްކުރުމުގެ ސިނާއަތައް ބޭނުންވާ ތަކެތި ރާއްޖެ އެތެރެކުރި މިންވަރު އިތުރުވި ނަމަވެސް ކޯވިޑް19 ގެ ކުރިން މި ސިނާއަތް ހުރި މިންވަރަށް އަދި އިއާދަވެފައި ނުވާކަމަށް މިރިޕޯޓްގައިވެއެވެ.
މިއަހަރުވެސް ރާއްޖޭގެ އިޤްތިޞާދު ކުރިއަރާނެކަމަށް ވޯލްޑް ބޭންކާއި އަދި ފިނޭންސް މިނިސްޓްރީންވެސް ވަނީ ލަފާކޮށްފައެވެ. މިދިޔަ އަހަރާއި އަޅާބަލާއިރު ރާއްޖޭގެ ފަތުރުވެރިކަންވެސް މިހާރު އަންނަނީ ބާރަށް ކުރިއަރަމުންނެވެ.