ރާއްޖެއަށް ދަތިކުރުމުގެ ފިޔަވަޅު އެޅުމަށް، ކުރީގެ ރައީސް މުޙައްމަދު ނަޝީދުގެ ޤާނޫނީ ޓީމްގައި ހިމެނޭ ބޭރުގެ ފަރާތްތަކުން ގޮވާލާ ގޮވާލުމާމެދު ކަންބޮޑުވުން ފާޅުކުރައްވައި، އެކަމުގެ ޙަޤީގަތް ބޭރުގެ ފަރާތްތަކާ ޙިއްޞާ ކުރެއްވުމަށް ޕީޕީއެމްގެ ބިލެއްދޫ ދާއިރާގެ މެމްބަރު އަޙްމަދު މުބީން ނިންމަވައިފިއެވެ.
ޕީޕީއެމް އޮފީހުގައި މިއަދު ނޫސްވެރިންނާ ބައްދަލުކުރައްވައި ވާހަކަ ދައްކަވަމުން ބިލެއްދޫ ދާއިރާގެ މެމްބަރު އަޙްމަދު މުބީން ވިދާޅުވީ، ރައީސް ނަޝީދުގެ ޤާނޫނީ ޓީމުން ރާއްޖެއަށް ދަތިކުރުމަށް ގޮވާލާ ނެރެފައިވާ ބަޔާނަކީ އެއްވެސް އަސާސެއް އަދި އަސްލެއްގެ މައްޗަށް ބިނާކޮށް ނެރެފައިވާ ބަޔާނެއް ނޫންކަމަށެވެ. އެއީ ރާއްޖޭގެ އަގުވައްޓަލުމަށް ނެރެފައިވާ ބަޔާނެއްކަމަށް މުބީން ވިދާޅުވިއެވެ.
ރާއްޖޭގައި ޚިޔާލު ފާޅުކުރުމުގެ މިނިވަންކަން ނެތްކަމަށް ރައީސް މުޙައްމަދު ނަޝީދުގެ ޤާނޫނީ ޓީމުން ކުރައްވާފައިވާ ތުހުމަތުތަކަށް ރައްދުދެއްވަމުން މުބީން ވިދާޅުވީ، ރާއްޖޭގެ މީޑިއާއާ ގުޅުންހުރި ފަރާތްތަކާ ބައްދަލުކުރައްވައި ދިރާސާ ކުރައްވާފައިވާ ކަމަށާއި، އޭނާ ބެއްލެވި ބެއްލެވުމުން ފާހަގަކުރެއްވުނީ އެއީ އިދިކޮޅު ފަރާތްތަކުގެ ވާހަކަތަކާއި، އެފަރާތްތަކުން މީޑިއާގައި ދައްކަވާ ވާހަކަތަކުގެ އިތުރުން ސިޔާސީ އެއްވުންތަކުގައި ދައްކާފައިވާ ވާހަކަތަކަށް ބުރަވެ ވަކި ބަޔަކަށް މަންފާވާނެގޮތަށް އެއްފަރާތަކަށް ޖެހިގެން ނެރެފައިވާ ބަޔާނެއްގެ ގޮތުގައިކަމަށެވެ. އެހެންކަމުން ނަޝީދުގެ ޤާނޫނީ ޓީމުން ނެރުނު ބަޔާނަށް ރައްދުއްދެއްވާ މުބީން އިނގިރޭސި ބަހުން އެކުލަވާލައްވާފައިވާ ބަޔާނެއް ބޭރުގެ ފަރާތްތަކާ ޙިއްޞާކުރައްވާނެކަމަށް މުބީން ވިދާޅުވިއެވެ.