މޯލްޑިވްސް ސްޓޭޓް ޝިޕިން، އެމްއެސްއެސްއިން އައްޑުއާއި ކުޅުދުއްފުށްޓަށް ދަތުރުތައް ފަށަން ތައްޔާރުވަމުން އަންނަކަމަށް އެ ކުންފުނިން ބުނެފިއެވެ. މި ދަތުރުތައް ފެށުމަށް ބޯޓެއް ހޯދުމުގެ މަސައްކަތް މިހާރު އެ ކުންފުނިން އަންނަނީ ކުރަމުންނެވެ.
އެމްއެސްއެސްއިން 2020 ވަނަ އަހަރުގެ އޮކްޓޯބަރ މަހުވެސް ވަނީ އިންޑިއާގެ ޓުޓްކޮރިންއިން އައްޑޫ ސިޓީއަށް ދަތުރު ކޮށްފައެވެ. ނަމަވެސް މިދިޔަ އަހަރުގެ މާރޗް މަހުގެ ތެރޭގައި އެ ކުންފުނިން ވަނީ މި ދަތުރުތައް ހުއްޓާލައިފައެވެ. ސަބަބެއްކަމަށް އެއިރު ބުނީ އައްޑޫން އެކަށީގެންވާ ތަރުޙީބެއް ނުލިބުމެވެ.
މި ދަތުރުތަކުގައި އެއިރު ބޭނުންކުރަމުންދިޔައީ 4000 ޓަނުގެ ބޯޓެކެވެ. ނަމަވެސް އައްޑޫ ވިޔަފާރިވެރިންގެ މުދާ ޙިއްޞާކުރަނީ އެންމެ 300 ޓަނުކަމަށް އެމްއެސްއެސްއިން ބުނެއެވެ. ދެން ބާކީ އެ ކުންފުނިން އެއިރު ގެންނަމުންދިޔައީ އެސްޓީއޯގެ މުދަލާއި އަދި އައްޑޫގައި ހިނގަމުންދިޔަ ބައެއް މަޝްރޫއުތައް ހިންގާ ކުންފުނިތަކުގެ މުދަލެވެ. ނަމަވެސް މަޝްރޫއުތައް ނިމުމާއެކު ޑިމާންޑް ވަރަށް ބޮޑަށް ދައްވިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެމްއެސްއެސްގެ އެގްޒެކެޓިވް ޑިރެކްޓަރ ކެޕްޓަން މުޙައްމަދު ނާޒިމް ވިދާޅުވީ، ކުޅުދުއްފުށި އަދި އައްޑުއަށް ދަތުރު ފެށުމަށް އެ ކުންފުނިން މީގެ މަހެއްހާ ދުވަސް ކުރިން ބޯޓެއް ހޯދުމުގެ މަސައްކަތް ފަށާފައިވާކަމަށެވެ.
މި ބޯޓަކީ ކުރިން ބޭނުންކުރި ބޯޓަށްވުރެ ކުޑަ އަދި އެ ސަރަޙައްދުގައި އޮޕަރޭޓްކުރުމަށް އެންމެ އެކަށީގެންވާ ބޯޓަކަށް ވާނެކަަމަށް އޭނާ ވިދާޅުވިއެވެ. އަދި މިފަހަރު ދަތުރު ފެށުމުގެ ކުރިން އެ ކުންފުނިން މިހާރު ހިސާބުޖަހާފައިވާ ކަމަށާއި މިފަހަރު ދެމެހެއްޓެނިވި ގޮތެއްގައި މި ޕްރޮޖެކްޓް ކުރިއަށްދާނެކަމުގެ އުންމީދު ބޮޑުކަމަށް އޭނާ ވިދާޅުވިއެވެ. އަދި މިއީ 2 ރަށުގެ ރައްޔިތުންނަށް ވެސް އޭގެ ސަބަބުން ފައިދާ ކުރާނެ ޕްރޮކެޖްޓަކަށް ވެގެންދާނެކަން މުހައްމަދު ނާޒިމް ފާހަގަކުރެއްވިއެވެ.
”ކުރީގައި އައްޑޫއަށް އަޅުގަނޑުމެންގެ ޚިދުމަތް ދިނިން. އެ އޮޕަރޭޝަން ހުއްޓާލީ އެތަނުން އެވަރަށް މުދާ ނުލިބޭތީ ފީޒިބަލް ނޫންވެގެން. މިހާރު އަޅުގަނޑުމެން މި ބަލަނީ އެ އޮޕަރޭޝަން އެހެން މޮޑެލްއެއްގައި، ވަޔަބަލް މޮޑެލްއެއްގައި ފެށޭތޯ. އެ އޮޕަރޭޝަން ފަށަންވެގެން އައްޑޫއާއި ކުޅުދުއްފުއްޓާއި 2 ބަނދަރަށް ކޭޓަރ ކުރެވޭނެކަހަލަ އެހެން ބިޒްނަސް މޮޑެލްއެއްގައި ފެށުމަށް އަޅުގަނޑުމެން މިހާރު މަސައްކަތްތަކެއް ކުރަމުން މިދަނީ.” މުހައްމަދު ނާޒިމް ވިދާޅުވިއެވެ.
މި ދަތުރުތައް ފެށުމަށް ރާއްޖެ ގެންނަ ބޯޓު ކުރިއަށް އޮތް ދެތިން މަސްދުވަހުގެ ތެރޭގައި ރާއްޖެ އަންނާނެކަމަށް އޭނާ ވިދާޅުވިއެވެ. މި ދަތުރުތައް ފެށުމާއެކު ދުނިޔޭގެ ކޮންމެ ތަނަކުންވެސް އައްޑުއަށް ނުވަތަ ކުޅުދުއްފުށްޓަށް މުދާ ބުކްކުރެވޭނެއެވެ. އެހެންކަމުން މާލެއިން ކުޅުދުއްފުށްޓަށް ނުވަތަ އައްޑުއަށް މުދާ އުފުލުމުގައި ދިމާވެފައިވާ ގޮންޖެހުންތަކަށް ޙައްލު ލިބޭނެކަމަށް އެމްއެސްއެސްއިން ބުނެއެވެ.
އެމްއެސްއެސްއިން ބުނީ ވިޔަފާރިވެރިން ބޭނުންވާ ކޮންމެ ޤައުމަކުންވެސް މިހާރު އެ ކުންފުންޏާ ގުޅިގެން މުދާ ގެނެވޭނެކަމަށެވެ. އެ ކުންފުނިން އާންމު ގޮތެއްގައި މިހާރު މުދާ ގެންނަ ޤައުމުތަކުގެ ތެރޭގައި ހިމެނެނީ ދުބާއީ، ބެންކޮކް، ސިންގަޕޯރ، މެލޭޝިއާ، ތައިލޭންޑް، ކުވެއިތު، އިންޑޮނޭޝިއާ އަދި ޗައިނާ އެވެ.