އާންމު ގޮތެއްގައި މަގުމަތީގައި ނުވަތަ ބްރިޖް ހައިވޭގައި ދުއްވާފައިދާއިރު ފުލުހުން ހިފަހައްޓުވައިފިނަމަ ހީވާނީ އެއްގަމު އުޅަނދު ދުއްވުމުގެ ޤަވާއިދާ ޚިލާފު ކޮންމެވެސް ކަމެއް ކުރެވުނީ ކަމަށެވެ. އެހެންނަމަވެސް ކޮންމެ ފަހަރަކީ މިފަދަ މިފަހަރަކަށް ނުވެދާނެއެވެ. މިފަހަރު ފުލުހުންގެ ފަރާތުން މުޅިން ތަފާތު ކަމެކެވެ. މިފަހަރު އުޅަނދުތައް މަޑުކުރުވުމަށްފަހު އެ އުޅަނދުގައި ޤާނޫނާއި ގަވާއިދުގައި ލާޒިމްވާ ކަންކަން ފުރިހަމަވާނަމަ ދިއްކޮށްލަނީ ޚާއްސަ ހަދިޔާއެކެވެ.
މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ދަނީ ރައްކާގެ ނަމުގައި ކެންޕެއިނެއް ކުރިއަށްގެންދަމުންނެވެ. ރައްކާ ކެންޕެއިންގެ ދަށުން މިރޯދަމަހަށް ޚާއްސަކޮށްގެން ފުލުހުން ވަނީ ފަހި ރާސްތާގެ ނަމުގައި ކެންޕެއިނެއް ފަށާފައެވެ. މި ކެންޕެއިން ކުރިއަށްގެންދަނީ މާލެ ސަރަހައްދުގައި ދުއްވާ އުޅަދުތަކަށް ޚާއްސަކޮށްގެންނެވެ.
ފަހިރާސްތާ ކެންޕެއިނާއި ގުޅޭގޮތުން ޕީއެސްއެމް ނިއުސްއަށް މައުލޫމާތު ދެއްވަމުން ސަބް އިންސްޕެކްޓަރ އޮފް ޕޮލިސް އިބްރާހިމް ޒާހިދު ވިދާޅުވީ، މިއީ ރޯދަމަހަށް ޚާއްސަކޮށްގެން މާލެ ސަރަހައްދުގައި ވަކިން ޚާއްސަކޮށް ބްރިޖް ހައިވޭގައި ދުއްވާ ފަރާތްތަކުގެ އުޅަނދުތައް ހުރީ ޤާނޫނާއި ގަވައިދާ އެއްގޮތަށްތޯ ބެލުމަށް ކުރިއަށްގެންދާ ކެންޕެއިނެއްކަމަށެވެ.
މި ކެންޕެއިންގެ ދަށުން ރޯޑްވާދިނަސް، އިންޝުއަރެންސް، އަހަރީފީ، އަދި އުޅަނދެއް ދުއްވުމުގެ ލައިސަންސް އޮތްނަމަ އެ ފަރާތަކަށް ހިލޭ ޕެޓްރޯލް ނުވަތަ އުޅަނދު ދޮވުމަށް ވައުޗަރއެއް ދޭނެއެވެ. އަދި މި ކެންޕެއިންގެ ތެރެއިން ބްރިޖް ހައިވޭ ބޭނުންކުރާ ފަރާތްތަކުގެ ހެލްމެޓްގައި މައްސަލައެއް އުޅޭނަމަ ނޫނީ ޤަވާއިދަށް ނުފެތޭ ހެލްމެޓް ބޭނުންކުރާނަމަ އެކަހަލަ ފަރާތްތަކަށް ފުލުހުން ދަނީ ހެލްމެޓްވެސް ބަދަލުކޮށްދެމުންނެވެ.
“ފަހި ރާސްތާ މިހާރަށް މި ކުރިއަށްގެންދާ ޕްރޮގްރާމަކީ މާލެ ސަރަހައްދުގައި ޚާއްސަކޮށް ބްރިޖް ހައިވޭގައި ދުއްވާ ފަރާތްތަކުގެ އުޅަނދުތައް ރަނގަޅަށް ޤާނޫނާއި ގަވައިދުގެ ތެރެއިން ލާޒިކުރާ ކަންތައްތައް ފުރިހަމައަށް ހުރި ފަރާތްތަކަށް އަޅުގަނޑުމެން މި ދޫކުރަނީ ވައުޗަރއެއް. މީގެތެރޭގައި ވޮޝް ވައުޗަރއާއި ޕެޓްރޯލް ވައުޗަރ އެބަ ހިމެނޭ. ސައިކަލަކަށް ވެއްޖިއްޔާ 3 ލީޓަރުގެ ޕެޓްރޯލް އަދި ކާރަކަށް ވެއްޖިއްޔާ 7 ލީޓަރުގެ ޕެޓްރޯލް އަޅުގަނޑުމެން އެބަ ދޫކުރަން.”ޒާހިދު ވިދާޅުވިއެވެ.
މި ޕްރޮގްރާމަށް ޕެޓްރޯލް އަދި ވެހިކަލް ދޮވުމުގެ ޚިދުމަތް ފޯރުކޮށްދެނީ ދަ ހޮކްސް ޕްރައިވެޓް ލިމިޓެޑްގެ ފަރާތުންނެވެ. އަދި ހެލްމެޓް ހަދިޔާކޮށްފައިވަނީ އެލައިޑް އިންޝުއަރެންސްގެ އެހީތެރިކަމާއިއެކުގައި ކަަމަށް ފުލުހުން ވިދާޅުވެއެވެ.
މި ކެންޕެއިން ކުރިއަށްދާނީ ރޯދަމަހުގެ ނިޔަލަށެވެ. ސަބް އިންސްޕެކްޓަރ އޮފް ޕޮލިސް އިބްރާހިމް ޒާހިދު ވިދާޅުވީ، ދުވާލެއްގެ މައްޗަށް 150 އެއްހާ ވެހިކަލް ޗެކްކުރެވޭކަމަށެވެ. މިގޮތަށް ޗެކްކުރާއިރުވެސް ގިނަ އުޅަނދުތައް ހުންނަނީ ޤާނޫނާއި ގަވައިދާ އެއްގޮތައްކަން ފާހަގަވާކަމަށް އޭނާ ވިދާޅުވިއެވެ.
“އެވްރެޖްކޮށް ދުވާލެއްގެ މައްޗަށް އެބަ ޗެކްކުރެވޭ ގާތްގަނޑަކަށް 150 އެއްހާ ވެހިކަލް. މީގެތެރޭގައި އަޅުގަނޑުމެންނަށް ވައުޗަރ އެބަ ދޫކުރެވޭ %50 އަށްވުރެ ގިނަ ވެހިކަލްތަކަށް. އޭގެ މާނައަކީ އަސްލު ގިނަ ބަޔަކު އެބައުޅެއޭ ޤަވާއިދާ އެއްގޮތަށް. ޤަވާއިދާ އެއްގޮތަށް ނުހުންނަ ވެހިކަލްތަކުގައިވެސް އަޅުގަނޑުމެންނަށް ފާހަގަކުރެވޭ ކަމަކީ ކޮންމެހެން ޤަވާއިދާ ޚިލާފަށް ބަހައްޓާކަށެއްނޫން. އެކަމަކުވެސް އަޅުގަނޑުމެންގެ މި ބިޒީ ޝެޑިއުލްގެ ތެރެއިން އެކަންކަމަށް ސަމާލުކަން ނުދެވުމުގެ ސަބަބުން ރަނގަޅު ނުކޮށްލެވި ހުރީ. އެބަހުރި ހަމަ ހަފްތާއެއްވަރު ސްޓިކާތައް އެކްސްޕަޔަރވެފައި.” ޒާހިދު ވިދާޅުވިއެވެ.
މި ޕްރޮގްރާމްގެ ތެރެއިން އުޅަނދުގައި ޤަވާއިދާ އެއްގޮތަށް ކަންކަން ފުރިހަމަ ވެފައި ނެތްނަމަވެސް ފުލުހުން ފިޔަވަޅެއް ނާޅާނެއެވެ. ނަމަވެސް އެކަންކަން ރަނގަޅުކުރުމަށް ނަސޭހަތްތެރިވާނެއެވެ.
މި ކެންޕެއިނާއި ގުޅޭގޮތުން އާންމުން ބުނީ މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް މިއީ ވަރަށް ރަނގަޅު ކެންޕެއިނެއްކަމަށެވެ. ވަކިން ޚާއްސަކޮށް ރައްޔިތުންނާއި ގާތުން ރަހުމަތްތެރި މާހައުލެއްގައި މިފަދަ ކެންޕެއިނެއް ކުރިއަށްގެންދާތީ މިއީ ރަނގަޅު ކަމެއްގެ ގޮތުގައި އާންމުން ފާހަގަކުރިއެވެ.
ފުލުހުން ވިދާޅުވީ، މަގުމަތީގައި އުޅަނދު ދުއްވާއިރު އެ އުޅަނދަކީ މަގުމަތީގައި ދުއްވަން ރައްކާތެރި އުޅަނދެއްތޯ ފަރުދީ ލެވެލްގައި ބަލާ ޔަޤީންކުރަން ޖެހޭކަމަށެވެ. އެކްސިޑެންޓްތައް ހިނގާ މިންވަރު އިތުރުވާއިރު ބައެއް ފަހަރު އުޅަނދުގައި ހުންނަ މެކޭނިކަލް ފޯލްޓްއެއްގެ ސަބަބުންވެސް އެކްސިޑެންޓް ހިނގަން މެދުވެރިވެއެވެ.
މި ކެންޕެއިންގެ ތެރެއިން އުޅަނދުގެ ސިގްނަލް ލައިޓް، ބުރެކި ރަނގަޅަށް މަސައްކަތް ކުރޭތޯ ފުލުހުން ބަލާނެއެވެ. އަދި ހެޑްލައިޓް، ވެހިކަލް ރަޖިސްޓްރޭޝަން ނަންބަރު ބޯޑު ހުރީ ރަނގަޅަށްތޯވެސް ބަލާނެއެވެ. މުޅި ކެންޕެއިންގެ އެންމެ މުހިންމު ބޭނުމަކީ އުޅަނދުތައް ޤަވައިދާ އެއްގޮތައް ފައްތައި އެކްސިޑެންޓްތައް މަދުކުރުމެވެ.