އަހަރުގެ މިހާތަނަށް ރާއްޖެއަށް 555000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %21.6 އިތުރު އަދަދެކެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިހާރު ރާއްޖެ އަންނަ ފަތުރުވެރިންގެ އަދަދު ހުރީ ކޯވިޑްގެ ކުރިން 2019 ވަނަ އަހަރު ރާއްޖެ އައިސްފައިވާ ފަތުރުވެރިންގެ ނަންބަރުތަކަށްވުރެވެސް މަތީގައެވެ. އެގޮތުން އަހަރުގެ ފުރަތަމަ 3 މަސްދުވަހު ރާއްޖެ އައި ފަތުރުވެރިންގެ އަދަދުވެސް ވަނީ 2019 ވަނަ އަހަރުގެ ނަންބަރުތަކަށްވުރެ އިތުރުވެފައެވެ.
އޭޕްރީލް މަހުގެ 5 ވަނަ ދުވަހާއި ހަމައަށް ރާއްޖެއަށް 555537 ފަތުރުވެރިން ވަނީ އައިސްފައެވެ. މިއީ 2022 ވަނަ އަހަރާއި އަޅާބަލާއިރު %21.6 އިތުރު އަދަދެކެވެ. 2022 ވަަނަ އަހަރުގެ މިމުއްދަތުގައި ރާއްޖެ އައިސްފައިވަނީ 457005 ފަތުރުވެރިންނެވެ.
ރާއްޖެއަށް މިހާރު އެވްރެޖްކޮށް ދުވާލެއްގެ މައްޗަށް 5848 ފަތުރުވެރިން އާދެއެވެ. އަދި ރާއްޖެ އަންނަ ފަތުރުވެރިން އެވްރެޖްކޮށް 8 ދުވަހުގެ ޗުއްޓީއެއް ރާއްޖޭގައި ހޭދަކުރެއެވެ.
ރާއްޖެއަށް އެންމެ ގިނައިން ފަތުރުވެރިން އައިސްފައިވާ 5 ޤައުމު:
* ރަޝިއާ: 68،102 ފަތުރުވެރިން
* އިންޑިއާ: 58،859 ފަތުރުވެރިން
* އިނގިރޭސިވިލާތް: 55،093 ފަތުރުވެރިން
* އިޓަލީ: 48،137 ފަތުރުވެރިން
* ޖަރުމަނުވިލާތް: 41،489 ފަތުރުވެރިން
ތަފާސްހިސާބުތައް ދައްކާގޮތުން ފަތުރުވެރިންނަށް ޚިދުމަތް ދިނުމަށް ރާއްޖޭގައި މިހާރު 1232 ތަނެއް ވަނީ ހުޅުވާފައެވެ. އެއީ މުޅި ޖުމްލަ 60،510 އެނދެވެ. މީގެތެރޭގައި ރިސޯޓްތަކާއި، ހޮޓެލްތަކާއި، ގެސްޓްހައުސްތައް އަދި ސަފާރީތައް ހިމެނެއެވެ.
ރާއްޖެއަށް މިއަހަރު ގެނައުމަށް އަމާޒުހިފާފައިވަނީ 1.9 މިލިއަން ފަތުރުވެރިންނެވެ. މިދިޔަ އަހަރުވެސް ރާއްޖެ ގެނައުމަށް އަމާޒުހިފާފައިވާ އަދަދުކަމަށްވާ 1.6 މިލިއަންގެ އަމާޒު ވަނީ އަހަރު ނިމުމުގެ ކުރިން ހާސިލްވެފައެވެ.