ރާއްޖޭގެ ޑައިވް ހަރަކާތްތަކާއި ކަނޑުއަޑީގެ ރީތިކަން އެޑެކްސް އޯޝަން މިޝަންގައި އިޝްތިހާރުކޮށްފިއެވެ.
މި އެކްސްޕޯގައި ރާއްޖެ އިޝްތިހާރުކޮށްފައިވަނީ އެމްއެމްޕީއާރުސީއާއި އަދި އިންޑަސްޓްރީގެ ފަރާތްތައް ގުޅިގެންނެވެ.
މި އެކްސްޕޯ ކުރިއަށްގޮސްފައި ވަނީ 3 ދުވަހުގެ މުއްދަތަކަށް ސިންގަޕޫރުގެ ސޭންޑްސް އެކްސްޕޯ އެންޑް ކޮންވެންޝަން ސެންޓަރުގައެވެ.
އެޑެކްސްއަކީ އޭޝިއާގައި ބާއްވާ އެންމެ ބޮޑު އަދި އެންމެ ދިގު މުއްދަތަކަށް ކުރިއަށް ގެންގޮސްފައިވާ ޑައިވް އެކްސްޕޯއެވެ. މިއީ މި އެކްސްޕޯ ކުރިއަށްގެންދާ 26 ވަނަ އަހަރެވެ.
މި އެކްސްޕޯގައި ދުނިޔޭގެ އެކި ކަންކޮޅުތަކުން ފާހަގަކޮށްލެވޭ މި ދާއިރާގެ މުހިންމު ފަރާތްތަކާއި، ސައިންސްވެރިންނާއި، ކަނޑުއަޑީގެ ފޮޓޯ އަދި ވީޑިއޯ ގްރަފަރުން ބައިވެރިވެއެވެ. އަދި މިއީ ޑައިވް އޮޕަރޭޓަރުންނާއި، އިކުއިޕްމަންޓް އުފައްދާ ފަރާތްތަކާއި، މި ސިނާއަތުގައި ހަރަކާތްތެރިވާ ފަރާތްތަކުން ބައިވެރިވެ ބައްދަލުވާން ލިބޭ ފުރުސަތެކެވެ.
އެމްއެމްޕީއާރުސީން ވަނީ މި އިވެންޓުގެ ޒަރިއްޔާއިން ޑައިވްކުރުމަށް ޝައުގުވެރިވާ ފަރާތްތަކަށް ރާއްޖޭގެ އެންމެ ފަހުގެ މައުލޫމާތު ފޯރުކޮށްދީ ރާއްޖެއަކީ ޑައިވްކުރުމަށް އިސްކަންދޭ މަންޒިލެއްކަން ބުނެދީފައެވެ.
މި އިވެންޓުގައި ބައިވެރިވުމުގެ މަގުސަދަކީ ރާއްޖެއިން ލިބޭ ޑައިވިން އަދި ކަނޑުއަޑީގެ ތަޖުރިބާތައް ދައްކާލުމަށް އެމްއެމްޕީއާރުސީއިން ކުރާ މަސައްކަތުގެ ދަށުން، ދެކުނު އިރުމަތީ އޭޝިއާގެ އަދި ވަކިން ހާއްސަކޮށް ސިންގަޕޫރުގެ ފަތުރުވެރިންގެ މެދުގައި މަޤްބޫލު މަންޒިލެއްގެ ގޮތުގައި ރާއްޖެ އިޝްތިހާރުކުރުމެވެ.
މި އެކްސްޕޯގައި ވިޒިޓް މޯލްޑިވްސްގެ ސްޓޭންޑްގައި ކުރިއަށްދިޔަ ހަރަކާތްތަކުގެ ތެރޭގައި ފޮޓޯބޫތަކާއި، ރާއްޖޭގެ ކަނޑުއަޑީގެ ދިރުންތަކާބެހޭ މައުލޫމާތު އެކުލެވޭ ފްލެޝް ކާޑުތަކާއި، ރާއްޖޭގެ އެކި ޑައިވް ލޮކޭޝަންތައް ވަނީ ދައްކާލާފައެވެ.
2022 ވަނަ އަހަރު ނިމުނުއިރު ދެކުނުއިރުމަތީ އޭޝިއާ މާކެޓުން ޖުމްލަ 23،080 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. އަދި މިއަހަރުގެ ފެބްރުއަރީގެ ނިޔަލަށް މި މާކެޓުން 5897 ފަތުރުވެރިންނަށް ރާއްޖެއިން ވަނީ މަރުހަބާ ކިޔާފައެވެ.