މިރުހަކީ ދިވެހިންގެ ކެއުމުގައި ވަރަށް ގިނައިން ބޭނުންކުރާ ބާވަތެކެވެ. ވަކިން ޚާއްސަކޮށް ރަމަޟާންމަހު ތައްޔާރުކުރާ ކާނާގެ ގިނަ ބާވަތްތަކަށް މިރުސް ބޭނުންވެއެވެ. މިއާއިއެކު ކޮންމެ އަހަރެއްގެ ރަމަޟާންމަހުވެސް މިރުހުގެ ޑިމާންޑް އިތުރުވެއެވެ.
ރާއްޖޭގައި އެންމެ ފުޅާދާއިރާއެއްގައި މިރުސް ހައްދާ އެއްރަށަކީ ތ.ކަނޑޫދޫއެވެ. "ކަނޑޫދޫ މިރުހުގައި ހުންނަ ކުޅިކަމުގެ ސަބަބުން އެ މިރުސް ގަންނަ މީހުންގެ އަދަދު އިތުރެވެ. ކަނޑޫދޫ މިރުސް" މިހާރު ވަނީ ބްރޭންޑަކަށްވެސް ވެފައެވެ.
ކޮންމެ އަހަރެއްގެ ރަމަޟާންމަހަކުވެސް ކަނޑޫދޫއިން ބާޒާރަށް ހުސްނުވެ މިރުސް ފޯރުކޮށްދިނުމަށް އެ ރަށުގެ ދަނޑުވެރިން ދުރާލާ މަސައްކަތް ފަށައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ކަނޑޫދޫ ކައުންސިލުން ވިދާޅުވީ، މި ރަމަޟާންމަހު ބާޒާރުން ކަނޑޫދޫ މިރުސް ހުސްނުވެ ލިބޭނެކަމަށެވެ. ކޮންމެ ހަފްތާއަކުވެސް ކަނޑުމަގުންނާއި، ވައިގެ މަގުންވެސް ކަނޑޫދޫއިން މާލެއަށް މިރުސް ގެންނާނެކަން ކައުންސިލުން ފާހަގަކުރެއްވިއެވެ.
ކައުންސިލުން ވިދާޅުވީ، މިހާރު ހަފްތާއަކު 3 ފަހަރު ކަނޑޫދޫއިން ބާޒާރަށް މިރުސް ނެރޭކަމަށެވެ. އެގޮތުން ހަފްތާއަކު 3 ޓަނުގެ މިރުސް އެ ރަށުން ބޭރުކުރާކަމަށް ކައުންސިލުން ވިދާޅުވިއެވެ. އެހެންކަމުން މިއަހަރުގެ ރަމަޟާން މަހު ކަނޑޫދޫއިން 12 ވަރަކަށް ޓަނުގެ މިރުސް ނެރެވޭނެކަމަށް އުންމީދުކުރާކަމަށް ކައުންސިލުން ވިދާޅުވިއެވެ.
މިދިޔަ އަހަރުގެ ރަމަޟާން މަހު ބާޒާރުގައި މިރުހުގެ އަގު ވަނީ ވަރަށް ބޮޑަށް އުފުލިފައެވެ. އެގޮތުން ކިލޯއެއް 1200 އަށްވެސް އަރައިގެން ގޮސްފައިވެއެވެ. ކަނޑޫދޫ ކައުންސިލުން ވިދާޅުވީ މިއަހަރު ރޯދަމަހު މިރުހުގެ އަގު ބޮޑުނުވާނެކަމަށެވެ. އެގޮތުން މިރުސް ކިލޯއެއްގެ އަގު ހުންނާނީ 250 ރުފިޔާއާއި 300 ރުފިޔާގައިކަމަށް ކައުންސިލުން ވިދާޅުވިއެވެ.
މި ރަމަޟާން މަހަށް މިރުހުގެ އިތުރުން ދެން ކަނޑޫދޫގައި ހެއްދީ ކަރައެވެ. އެގޮތުން ހަފްތާއަކު ގާތްގަނޑަކަށް 10 ޓަނުގެ ކަރާ އަންނަނީ ކަނޑޫދޫއިން ބާޒާރަށް ނެރެމުންނެވެ.
ދަނޑުވެރިކަމުގައި މަޝްހޫރު ކަނޑޫދޫގައި 300 އެއްހައި ދަނޑުވެރިން އަންނަނީ މި މަސައްކަތް ކުރަމުންނެވެ.