ސަރުކާރުގެ ގިނަ އޮފީސްތަކެއް ހިންގަމުން އަންނަ ވެލާނާގެ ކައިރީގައި އޮތް ޕާކިން ޒޯން ބަންދުކުރީ އެސަރަހައްދުގައި ހުރި މެކޭނިކަލް ޕާކިންގ ސިސްޓަމް ނަގައި، ގިނަ އުޅަނދުތަކަށް ޕާކް ކުރެވޭނެ އިންތިޒާމް ހަމަޖައްސަން ކަމަށް ޕްލޭނިން މިނިސްޓްރީން ވިދާޅުވެއްޖެއެވެ.
ވެލާނާގެ ހުންނަ އަމީރު އަޙްމަދު މަގުގައި ޕާކް ކުރުމަކީ މަނާކަމެކެވެ. ނަމަވެސް ގިނަ ސައިކަލްތަކަށް ޕާކް ކުރެވޭނެގޮތަށް ކުރީގެ ހުރަވީ ބިލްޑިންގ ހުރި ތަނުގައި ވަނީ ބޮޑު ޕާކިން ޒޯނެއް ހަދާފައެވެ. ނަމަވެސް އެ ސަރަހައްދުގައި ގިނަ އޮފީސްތަކެއް ހިންގަމުން އަންނާތީ، ޕާކް ކުރުމަށް ޖާގަ ނުލިބުމުގެ ޝަކުވާ އަދިވެސް ވަރަށް ބޮޑެވެ.
އެ ސަރަހައްދުގެ އިތުރުން، ވެލާނާގެއާއި، ދަރުމަވަންތަ ސްކޫލާ އިންވެގެން ހުރި މެކޭނިކަލް ޕާކިން ސިސްޓަމް ހުރި ބިމުގައިވެސް ގިނަ ޢަދަދެއްގެ އުޅަނދު ޕާކްކުރެއެވެ. ނަމަވެސް އެ ސަރަހައްދު މިހާރު ވަނީ ފެންސު ޖަހައި ބަންދުކޮށްފައެވެ. މިއާއެކު ވެލާނާގޭ އޮފީސް ޢިމާރާތުގައި ހިމެނޭ ބައެއް އޮފީސްތަކުގެ މުވައްޒަފުން ވަނީ ޕާކް ކުރާނެ ތަނެއްނެތްކަމަށް ބުނެ އެ ސަރަހައްދުގައި އިޙްތިޖާޖުކޮށްފައެވެ.
ޕީއެސްއެމް ނިއުސްއާއި ވާހަކަފުޅު ދައްކަވަމުން ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ވެލާނާގޭ ކައިރީގައި އޮތް ޕާކިން ޒޯން ބަންދުކުރީ އެސަރަހައްދުގައި ހުރި މެކޭނިކަލް ޕާކިން ސިސްޓަމް ނެގުމަށްކަމަށެވެ. ކުރީގެ ސަރުކާރުގައި ޤާއިމްކުރި އެ މެކޭނިކަލް ޕާކިން ސިސްޓަމް ބޭނުމެއް ނުކުރެއެވެ.
އަކްރަމް ވިދާޅުވީ، އެ ސަރަހައްދުގައި ހުރި މެކޭނިކަލް ޕާކިން ސިސްޓަމް ނެގޭނީ ކްރެއިން އެ ސަރަހައްދަށް ވައްދައިގެންކަމަށެވެ. އެހެންކަމުން އެ ސިސްޓަމް އެތަނުން ނަގާތީ އެ ސަރަހައްދު ބަންދުކުރީ ރައްކާތެރިކަމުގެ ފިޔަވަޅެއްގެ ގޮތުންކަމަށް އޭނާ ވިދާޅުވިއެވެ. އަދި އެ ސިސްޓަމް ނެގުމަށްފަހު، ވީހާވެސް އަވަހަށް ޕާކިންއަށް އެތަން ހުޅުވާލާނެކަމަށާއި، އެއިރުން ގިނަ އުޅަނދުތަކަށް ޕާކް ކުރެވޭނެކަން އަކްރަމް ފާހަގަކުރެއްވިއެވެ.
ވެލާނާގެ ކައިރި ޕާކިން ޒޯން ބަންދުކޮށްފައި ހުރުމުން، އެ ސަރަހައްދުގައި ޒޯނުން ބޭރުގައި ޕާކް ކޮށްފައިވާ އުޅަނދުތަކުގައި ސްޓިކާ ނުޖަހާނެކަން ފުލުހުން އަންގާފައިވާކަމަށް ޕްލޭނިން މިނިސްޓްރީން ވިދާޅުވިއެވެ.
މިކަމާއި ގުޅޭގޮތުން ފުލުހުން ވިދާޅުވީ، އެ ސަރަހައްދުގައި މަސައްކަތް ހިނގަމުންދާ ވަގުތު ޒޯނުން ބޭރުގައި ޕާކް ކޮށްފައިވާ އުޅަނދުތަކުގައި ސްޓިކާ ނުޖަހާނެކަމަށެވެ. ފުލުހުން ވަނީ މެދުޒިޔާރަތާއި މުލިއާގެއާއި، އެ ސަރަހައްދުން ދުއްވާ އުޅަނދުތަކަށް ނުރައްކާނުވާގޮތަށް ޕާކްކުރުމަށް އިލްތިމާސްކުރައްވާފައެވެ.
"އެ ސަރަހައްދުގައި މަސައްކަތް ކުރާކަން ދެނެގެން ޒޯނުން ބޭރުގައި އުޅަނދު ޕާކްކުރުމަކުން ސްޓިކާ ނުޖަހާނެ. އެހެނަސް އެއްވެސް ދުއްވާ އެއްޗަކަށް ނުރައްކާ ނުވާނެގޮތަށް ހުންނަންވާނީ.." ފުލުހުން ވިދާޅުވިއެވެ.
ވެލާނާގެ ކައިރި އަމީރު އަޙްމަދު މަގުގައި ޕާކް ކޮށްފައިވާ ގިނަ ސައިކަލުތަކެއްގައި ދާދިފަހުން ސްޓިކާ ޖަހައިގެން ގިނަބަޔަކު އެކަމުގެ ކަންބޮޑުވުން ފާޅުކޮށްފައިވެސްވެއެވެ.