މާލެ އަތޮޅުގައި ތަރައްޤީކޮށްފައިވާ ”އޯގާ އާރޓް ރިސޯޓް“ ހުޅުވައިފިއެވެ.
މި ރިސޯޓް ހުޅުވާފައިވަނީ އައު އަހަރާއި ދިމާކޮށެވެ.
ރާއްޖޭގެ އެހެން ރިސޯޓްތަކާއި ޚިލާފަށް މި ރިސޯޓް ފަރުމާކޮށްފައިވަނީ އަދި ރިސޯޓުން އިސްކަންދޭނީ ދިވެހި އާޓިސްޓުންނާއި ހުނަރުވެރިންގެ ހުނަރުތައް ކުރިއަރުވަންކަމަށް އެ ރިސޯޓުން ބުނެއެވެ. މީގެއިތުރުން ދިވެހި ސަގާފަތާއި ތާރީހު ދިރުވައި އާލާކުރުމަކީވެސް މި ރިސޯޓްގެ މަޤްސަދެކެވެ.
ރިސޯޓް ފަރުމާކޮށްފައިވާ ގޮތުން ރިސޯޓްގެ ކޮންމެ ސަރަހައްދަކުންވެސް ދިވެހި އާޓިސްޓުންގެ ހުނަރުވެރިކަން ވަރަށް ރަނގަޅަށް ދައްކުވައިދެއެވެ. ރިސޯޓުން މައުލޫމާތުދޭ ގޮތުގައި ރާއްޖޭގެ އެހެން ރިސޯޓަކުން މީގެކުރިން ނުފެންނަ ފަދަ ދިވެހި ސަޤާފަތާއި ދިވެހި ދިރިއުޅުން މި ރިސޯޓުން ފެނިގެންދާނެއެވެ. އެގޮތުން ރިސޯޓްގެ މެއިން ރެސްޓޯރަންޓަށް ދީފައިވާ ނަމަކީ "ކާކަޑަ" އެވެ. ރިސޯޓްގެ ސްޕެޝިއަލިޓީ ރެސްޓޯރަންޓަށް ދީފައިވާ ނަމަކީ "ސަމާސާ" އެވެ.
ރިސޯޓްގައި 60 ވިލާ ހުރެއެވެ. މީގެތެރޭގައި ބީޗް ވިލާއާއި އޯވަރ ވޯޓަރ ވިލާތައް ހިމެނެއެވެ. ވެލާނާ އިންޓަނޭޝަނަލް އެއަރޕޯޓުން ފުރައިގެން މި ރިސޯޓަށް 45 މިނެޓުން ދެވޭނެއެވެ.
ރިސޯޓުން ލިބޭ އެހެނިހެން ޙިދުމަތްތަކުގެ ތެރޭގައި އާރޓް ކްލާސްތަކާއި، މިއުޒިކް ސެޝަންތަކާއި، ފްލޯޓިން މީލްއާއި، އެކްސްކާޝަންގެ ހަރަކާތްތަކާއި، މޫދުކުޅިވަރުގެ ހަރަކާތްތައް ހިމެނެއެވެ. މި ރިސޯޓްގައި މުޅިންހެން މަސައްކަތް ކުރަމުން ދަނީ ދިވެހިންނެވެ. އޭގެތެރޭގައި ރިސޯޓްގެ މަތީ މަގާމުތައް ހިމެނެއެވެ.