ވެހިކަލް ފީއާއި ޖޫރިމަނާތައް މިއަދުން ފެށިގެން ބަލައިގަންނަމުން ދާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ތައްޔާރުކޮށްފައިވާ "ސަވާރީ ޕޭ" ޕޯޓަލުންކަމަށް އެ މިނިސްޓްރީން ވިދާޅުވެއްޖެއެވެ.
ކުރިން މި ފީތައް ބަލައިގަންނަމުން ދިޔައީ މޯލްޑިވްސް އިންލެންޑް ރެވެނިއު އޮޓޯރިޓީ މީރާ މެދުވެރިކޮށެވެ. ނަމަވެސް ސަރުކާރުގެ ލާމަރުކަޒީ ސިޔާސަތުގެ ދަށުން އުޅަނދުތަކުގެ އަހަރީ ފީ ކައުންސިލްތަކަށް ޖަމާވާގޮތަށް ފިނޭންސް މިނިސްޓްރީން ވަނީ ނިންމާފައެވެ.
އެހެންކަމުން ޖަނަވަރީ 1 އިން ފެށިގެން މީރާ މެދުވެރިކޮށް މި ފީތައް ބަލައިގަތުން ވަނީ ހުއްޓާލާފައެވެ.
އެއްގަމާއި ކަނޑުއުޅަނދުގެ އަހަރީ ފީ @MIRAmaldives އިން ބަލައިގަންނާނީ 31 ޑިސެންބަރު 2022 ގެ ނިޔަލަށް. އަދި 01 ޖަނަވަރީ 2023 އިން ފެށިގެން މި ފީ ބަލައިގަންނާނީ @MoTCAmv އިން ތައްޔާރުކޮށްފައިވާ ސިސްޓަމް މެދުވެރިކޮށް އެ ފީ ނިސްބަތްވާ ކައުންސިލަކަށް.https://t.co/KI0hfeuqKV
— Ministry of Finance (@MoFmv) December 13, 2022
ޓްރާންސްޕޯޓް މިނިސްޓްރީން ވިދާޅުވީ، މީރާއަށް ބަލައިގަންނަމުން ގެންދިޔަ އެއްގަމު އުޅަނދު ފީއާއި، ކަނޑުގައި ދުއްވާ އުޅަނދުގެ ފީއާއި، ޓްރެފިކް އަދި ޕާކިންގ ވަޔަލޭޝަން ޖޫރިމަނާ 1 ޖަނަވަރީ އިން ފެށިގެން ބަލައިގަންނާނީ އެ މިނިސްޓްރީން ތައްޔާރުކޮށްފައިވާ އޮންލައިން ޕޭމަންޓް ޕޯޓަލް "ސަވާރީ ޕޭ"، ޔޫއާރުއެލް (pay.transport.gov.mv ) މެދުވެރި ކޮށްކަމަށެވެ.
ލާމަރުކަޒީ ސިޔާސަތުގެ ދަށުން ކައުންސިލްތަކަށް އާމްދަނީ ލިބޭނެ މަގު ފަހިކޮށްދިނުމަކީ ސަރުކާރުގެ އަމާޒެކެވެ. މި ސިޔާސަތުގެ ދަށުން އަހަރީ ފީ ކައުންސިލްތަކުން ބަލައިގަންނައިރު، ކައުންސިލްތަކަށް އިތުރު އާމްދަނީއެއް ލިބުމުގެ ފުރުޞަތު ފަހިވެގެން ދާނެއެވެ.