ހދ އަތޮޅުގެ 6 ރަށަކަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ގަސް ހަދިޔާކޮށްފިއެވެ.
އެގްރިކަލްޗަރ މިނިސްޓްރީން ވިދާޅުވީ، މިއީ ފުޑް ސެކިއުރިޓީ ޕްރޮޤްރާމުގެ ދަށުން ހަދިޔާކުރެވުނު ގަސްތަކެއްކަމަށެވެ.
މި ޕްރޮޤްރާމްގެ ދަށުން ހަދިޔާކޮށްފައިވަނީ ދިވެހިން އާންމުކޮށް ކެއުމަށް ބޭނުންކުރާ މުހިންމު ބާވަތްތަކުގެ ގަސްތަކެކެވެ. އޭގެތެރޭގައި ޖަނބުރޯލު، ފަތްކެޔޮ، ބަބުކެޔޮ، އަލަ، އަދި މުރަނގަ ގަހުގެ މުޑުވަތް އެކުލެވޭކަމަށް އެގްރިކަލްޗަރ މިނިސްޓްރީން ވިދާޅުވެއެވެ.
ފުޑް ސެކިއުރިޓީ ޕްރޮގްރާމްގެ ދަށުން މިއަހަރު މުޑުވަތް ދިނުމަށް ހަމަޖެހިފައިވާ ރަށްތަކުގެ ތެރޭގައި ހިމެނެނީ ނޮޅިވަރަމް، ކުމުންދޫ، ނޭކުރެންދޫ، ކުޅުދުއްފުށި، ވައިކަރަދޫ، އަދި ނެއްލައިދޫއެވެ. މި ޕްރޮގްރާމްގައި މި 6 ރަށަށް މުޅި ޖުމްލަ 2525 މުޑުވަތް ދެވޭނެކަމަށް މިނިސްޓްރީން ބުނެއެވެ.
މި ރަށްތަކަށް މުޑުވައްދެނީ ރަށުގެ ހުރިހާ ގޭބީސީތަކެއް ހިމެނޭގޮތައް ކައުންސިލްތައް މެދުވެރިކޮށެވެ. ފުޑް ސެކިއުރިޓީ ޕްރޮގްރާމްގެ ދަށުން އެގްރިކަލްޗަރ މިނިސްޓްރީން އަންނަނީ ރާއްޖޭގެ އެކި ރަށްތަކަށް ކެއުމަށް ބޭނުންވާ ތަކެތި އަޅާ ގަސްތައް ހަދިޔާކުރަމުންނެވެ.