ރާއްޖޭގައި ހުންނަ އެކި ޤައުމުތަކުގެ އެމްބަސީތަކާއި ހައިކޮމިޝަންތަކުގައި ހަރަކާތްތެރިވަމުން އަންނަ ޑިޕްލޮމެޓުން އެއްވެސް ނުރައްކަލަކަށް ހުށަހެޅުމުގެ ފުރުސަތު ނުދެއްވާނެ ކަމުގެ ޔަގީންކަން ސަރުކާރުން ދެއްވައިފިއެވެ.
ސަރުކާރުން މިހެން ބުނެފައި މިވަނީ އިންޑިއާ އެމްބަސީގައި ހުޅުޖަހަން ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރު އައްބާސް އާދިލް ރިޒާ ގޮވާލާފައިވާތީ އެކަމާ ގުޅިގެން ނެރުނު ބަޔާނެއްގައެވެ.
އިދިކޮޅުގެ ބައެއް ފަރާތްތަކުން މީގެ ކުރިން ވެސްވަނީ އިންޑިއަން އެމްބަސީއާ ގުޅިގެން މިފަދަ ވާހަކަ ދައްކާފައެވެ.
މިކަމާ ގުޅިގެން ފޮރިން މިނިސްޓްރީން ނެރުނު ބަޔާނުގައިވަނީ މިއިންޒާރުދިން މައްސަލަ ސަރުކާރުން ސީރިއަސްކޮށް ތަހުގީގު ކުރަމުން އަންނަ ކަމަށެވެ. އަދި އެކަމާ ގުޅިގެން ނަގަން ޖެހޭ ސަލާމަތީ ފިޔަވަޅުތައް ކަމާ ގުޅޭ އިދާރާތަކުން ނަގާފައިވާ ކަމަށްވެސް ފޮރިން މިނިސްޓްރީން ނެރުނު ބަޔާނުގައި ވަނީ ހާމަކޮށްފައެވެ.
އަދި މިފަދަ އިންޒާރުތައް މެދުވެރިކޮށް ރާއްޖޭގައި އުޅޭ ޑިޕްލޮމެޓުން ނުރައްކަލަކަށް ހުށަހަޅައި އާންމުންގެ ސަލާމަތާއި ރައްކާތެރިކަމަށް ހުރަސް އެޅުމަށް އެއްވެސް ފުރުސަތެއް ނުދޭނެ ކަމުގެ ޔަގީންކަންވެސްވަނީ އަރުވާފައެވެ.
އައްބާސްގެ މި އިންޒާރު ޑިފެންސް މިނިސްޓަރ މާރިޔާ އަހުމަދު ދީދީ ވެސް ކުށްވެރިކުރައްވާފައިވާއިރު، މިނިސްޓަރ މާރިޔާ ވެސް ވަނީ މިފަދަ ޓެރަރިޒަމްގެ އަމަލުތަކަށް ގޮވާލާމީހުންނާއި މެދު ހަރުކަށި ފިޔަވަޅު އެޅުމަށް ގޮވާލައްވާފައެވެ. އަދި ވަކިން ޚާއްސަކޮށް އިންޑިއާއަށް ދޭ މިފަދަ އިންޒާރުތައް ބަލައި ނުގަނެވޭނެ ކަމަށް މާރިޔާ ވިދާޅުވިއެވެ.
Calls for arson on @HCIMaldives is an act of terror and is strongly condemned. Kindly be assured that HEP @ibusolih’s Zero Tolerance on Terror will be enforced. India is our closest development partner & attempts to stop development for the people of ??will not be tolerated.????
— Mariya Didi ? (@MariyaDidi) December 24, 2022
މި މައްސަލަ ސަމާލުކަމަށް އައިސް ފުލުހުން މިކަން ބަލަމުން އަންނަ ކަމަށް ފުލުހުން އިއްޔެ ވިދާޅުވެފައިވާއިރު ކޮމިޝަނަރ އޮފް ޕޮލިސް މުހައްމަދު ހަމީދު މިއަދު ކުރެއްވި ޓުވީޓުގައި ވަނީ މިކަމަކީ ޓެރަރިޒަމްގެ އަމަލެއްގެ ގޮތުގައި ސިފަކުރައްވާފައެވެ. އަދި ވިދާޅުވީ ޓެރަރިޒަމަށް ގޮވާލާ މިފަދަ މައްސަލަތަކަކީ ސީރިއަސް މައްސަލަތަކެއްގެ ގޮތުގައި ފުލުހުން ތަހުގީގުކުރާނެ މައްސަލަތަކެއް ކަމަށެވެ.
ސީޕީ ހަމީދު ވިދާޅުވީ، ސޯޝަލް މީޑިއާގައި ހަސަދަވެރިކަން ފެތުރުމުގެ މައްސަލަތައް ރާއްޖޭގައި އިތުރުވަމުން އަންނަ ކަމަށާއި، އެކަންކަން ހުއްޓުވަން ކަމާ ގުޅުންހުރި އިދާރާތަކާއެކު މަސައްކަތް ކުރަމުން އަންނަ ކަމަށެވެ.
Any incitement of violence or encouragement of acts of terrorism will be taken seriously and investigated with due process by @PoliceMv. The spread of hate on social media is seemingly growing in Maldives. We are working with all stakeholders to effectively tackle the problem.
— Mohamed Hameed (@M_Hameedh) December 24, 2022
އައްބާސްގެ މި މައްސަލަ ސަރުކާރުން ކުށްވެރިކޮށް، ފުލުހުން އެކަން ބަލާނެ ކަމުގެ ޔަގީންކަން އަރުވާފައިވާއިރު މި މައްސަލަ ބެލުމަށް ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީ އާއި ސަރުކާރު ކޯލިޝަނުގައި ހިމެނޭ އަދާލަތު ޕާޓީ އާއި މޯލްޑިވްސް ރިފޯމް މޫވްމަންޓުން ވެސް ވަނީ ގޮވާލާފައެވެ.