ކުރިއަށް އޮތް ޝާހުރުކް ޚާންގެ އާ ފިލްމު "ޕަތާން" ގެ މައްސަލަގަނޑު ފުރަތަމަ ފެންމަތިވީ އެ ފިލްމު ލަވައެއް ކަމަށްވާ "ބޭޝަރަމް ރަންގް" އާންމުކުރި ހިސާބުންނެވެ.
އެގޮތުން ވީރު ޝިވާޖީ ކިޔާ ގްރޫޕަކުން ބުނާ ގޮތުގައި މިހާރު އާންމުކޮށްފައިވާ އެ ފިލްމުގެ ލަވަ "ބޭޝަރަމް ރަންގް" އަކީ އެމީހުންގެ މުޖުތަމައު އަށް ފެތޭ ލަވައެއް ނޫނެވެ. އެ ފިލްމާ ދެކޮޅަށް އިންޑިއާގެ ބައެއް އެހެން ހިސާބުތަކުގެ ވާތު ފިޔައިގެ ގްރޫޕްތަކުން ވެސް މަގުތަކަށް ނުކުމެ ޝާހްރުކާއި ދީޕިކާގެ ފޮޓޯތަކެއް އަންދައި "ޕަތާން" ބޮއިކޮޓްކުރަން އަންނަނީ ގޮވައިލަމުންނެވެ.
އޭގެފަހުން މިހާރު އަނެއްކާވެސް މި ވަނީ ޝާހު އަންދާލައި "ޕަތާން" އަޅުވާ ސިނަމާތަކުގައި ރޯކޮށްލާނެކަމުގެ އިންޒާރު އިންޑިއާގެ ހަރުކަށި ހިންދޫންގެ މީހަކު ދީފައެވެ.
އަޔޯދިއާ އަށް ނިސްބަތްވާ މަހަންތު ޕަރަމްހަންސް އަޗާރިއާ ބުނީ އަންނަ މަހުގެ 25 ގައި ރިލީޒްކުރަން ހަމަޖެހިފައިވާ ޝާހުރުކާއި ދީޕިކާ ޕަދްކޯންގެ ފިލްމުން އާންމުކުރި ލަވަ "ބޭޝަރަމް ރަންގް" ގައި ބޭނުންކޮށްފައިވާ ކޮސްޓިއުމަކުން އިންޑިއާގެ ދިދައިގައި އެކުލެވޭ ކުލައެއްގެ ހުރުމަތް ވެސް ކަނޑާފައިވާ ކަމަށެވެ.
އަޗާރިއާ ބުނީ އެ ލަވައިގައި ދީޕިކާ ބޭނުންކޮށްފައިވާ ކޮސްޓިއުމްތަކުގެ ތެރެއިން ގަދަ އޮރެންޖް ކުލައިގެ ހެދުމާއި އަދި އެ ހެދުމާއި އެކީ ދައްކުވައި ދީފައިވާ ގައިގޯޅި މަންޒަރަކީ ގައުމީ ދިދައިގެ ކުލައެއްގެ ހުރުމަތް ކަނޑާލުމެވެ.
"ބޭޝަރަމް ރަންގް" ލަވަ އާންމުކުރި ފަހުން އިންޑިއާގެ އެކި ހިސާބުތަކުގައި އެ ލަވައާ ގުޅިގެން "ޕަތާން" އާ ދެކޮޅަށް އެތައް ހަރަކާތެއް ހިންގައި، ފިލްމު އަޅުވަން ހުރަސް އަޅާނެކަމުގެ އިންޒާރު ދަނީ ދެމުންނެވެ.
ނަމަވެސް ފިލްމާ ދެކޮޅަށް ހިންގާ ހަރަކާތްތަކަށް އޭގެ ތަރިންނާއި އެ އުފެއްދި ޓީމުން މާ ބޮޑު ސަމާލުކަމެއް ނުދެއެވެ. "ޕަތާން" އަކީ އަދިތިޔާ ޗޯޕްޅާގެ ޔާޝްރާޖް ފިލްމްސް، ވައިއާރްއެފް އަށް ސިދާތު އާނަންދު ޑައިރެކްޓްކޮށްފައިވާ އެކްޝަން ތުރިލާއެކެވެ.
ފިލްމުގެ ޓީމުން މިހާރު ވަނީ މި ފިލްމުގެ ދެވަނަ ލަވައެއް އާންމުކޮށްފައެވެ. އެއީ "ޖޫމޭ ޖޯ ޕަތާން" އެވެ.