އަޙުމަދިއްޔާ އިންޓަނޭޝަނަލް ސްކޫލްގެ އައު އިމާރާތުގެ ބިންގާ އަޅައިފިއެވެ. އަޙުމަދިއްޔާ ސްކޫލަކީ މާލޭގައި ބޭބީ ނާސަރީއިން ފެށިގެން ގްރޭޑް 12އާއި ހަމައަށް ކިޔަވައިދޭ ހަމައެކަނި ސްކޫލެވެ.
އަހުމަދިއްޔާ ސްކޫލްގެ އާ އިމާރާތް އަޅަނީ އެ ސްކޫލުގައި ކުރިން އޮފީސް އިމާރާތް ހިންގި ބިމުގައި، ސްކޫލްގެ ގޯތިތެރެއިން ބައެއްގައެވެ. މި އިމާރާތް ހަދަނީ 10 ފަންގިފިލާއަށެވެ.
އަޙްމަދިއްޔާ ސްކޫލަކީ މާލޭގައި އެންމެ ގިނަ ދަރިވަރުން ތަޢުލީމު ޙާސިއްކުރާ، އަދި އެއް ސްކޫލެއްގައި އެންމެ ގިނަ މުދައްރިސުންވެސް ކިޔަވައިދޭ ސްކޫލެވެ. އެ ސްކޫލްގައި 2000އަށްވުރެ ގިނަ ދަރިވަރުން ތަޢުލީމު ޙާސިލްކުރަމުންއާދެއެވެ.
އަވަށު ސްކޫލެއްގެ ގޮތުގައި އަޙުމަދިއްޔާ ހިންގަން ފެށީ 1982ވަނަ އަހަރުއެވެ. އަދި އަޙުމަދިއްޔާ އިންޓަނޭޝަން ސްކޫލަށް ބަދަލުކޮށް، ސްކޫލްގެ ކިޔެވުމުގެ އޮނިގަނޑަށް ބޮޑު ބަދަލެއް ގެނައީ 2014ވަނަ އަހަރުއެވެ. އަޙުމަދިއްޔާ ސްކޫލްގައި ކިޔަވައިދޭންފެށިތާ މިއަހަރަށްވަނީ 40 އަހަރު ފުރިފައެވެ.
އެ ސްކޫލްގައި ކިޔަވައިދިނުމަށް ބޭނުންކުރަމުން އަންނަނީ 4ފަންގިފިލާގެ އިމާރާތަކާއި، 5 ފަންގިފިލާގެ 2 އިމާރާތެވެ. އެއީ 37 ކްލާސްރޫމެވެ.
އާ އިމާރާތާއެކު ސްކޫލްގެ ޖާގައިގެ މައްސަލައަށް ބޮޑު ޙައްލެއް ލިބޭނެއެވެ. އަޙުމަދިއްޔާ ސްކޫލަކީ ތަޢުލީމީ ދާއިރާއިން ބޮޑެތި ކާމިޔާބީތަކެއް ހޯދަމުން އަންނަ ސްކޫލެކެވެ.