އޯޕަން ޑޭޓާ ޕޮލިސީއެއް އޮތުމަކީ އިޤްތިޞާދަށް މުހިންމު ކަމެއްކަމަށް އިކޮނޮމިކް މިނިސްޓަރ އަލްއުސްތާޛު ފައްޔާޞު އިސްމާއިލް ވިދާޅުވެއްޖެއެވެ.
މިނިސްޓަރ ފައްޔާޞު މިހެން ވިދާޅުވީ، ރާއްޖޭގައި ތައްޔާރުކުރާ ހުރިހާ ދިރާސާތަކެއް އެއްތަނަކުން ލިބޭނެ ފުރަތަމަ ޕްލެޓްފޯމް "އިކޮނޮމިކް ރިސަރޗް ޕްލެޓްފޯމް" ލޯންޗްކުރުމުގެ ރަސްމިއްޔާތުގައެވެ.
މި ޕްލެޓްފޯމް ޤާއިމްކޮށްފައިވަނީ އިކޮނޮމިކް މިނިސްޓްރީއާއި ޔޫއެންޑީޕީ މޯލްޑިވްސް ގުޅިގެންނެވެ.
ހޮޓެލް ޖެންގައި ބޭއްވި ރަސްމިއްޔާތެއްގައި މި ޕްލެޓްފޯމް ލޯންޗްކޮށްދެއްވީ މިނިސްޓަރ އޮފް ނޭޝަނަލް ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއެވެ.
މި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ އަލްއުސްތާޛު ފައްޔާޞު އިސްމާއިލް ވިދާޅުވީ، މިއީ ސަރުކާރުގެ އޯޕަން ޑޭޓާ ސިޔާސަތުގެ ދަށުން އިކޮނޮމިކް މިނިސްޓްރީން ކުރި ވަރަށް މުހިންމު މަސައްކަތެއްކަމަށެވެ.
ސަރުކާރުގެ މުވައްސަސާތަކުގައި ވަރަށް ގިނަ ޑޭޓާ އެބަހުރިކަމަށާއި ނަމަވެސް މި މައުލޫމާތުތައް މިހާތަނަށް ހުރީ ފަސޭހައިން ލިބޭނެ ފަދަ ފަސޭހަގޮތަކަށް ނޫންކަމަށެވެ. ކޯވިޑް19ގެ ހާލަތުގައި ކުއްލި ނިންމުންތައް ނިންމައި އެ ހާލަތުގައި އަޅަންޖެހުނު ފިޔަވަޅުތައް އެޅުމަށްވެސް އެންމެބޮޑު އުނދަގުލަކަށް ވެގެންދިޔައީވެސް ޑާޓާ ފަސޭހައިން ލިބޭނެމަގެއް ނެތުންކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ، އޯޕަން ޑޭޓާ ޕޮލިސީއެއް އޮތުމަކީ ރާއްޖޭގެ ކުރިއެރުމަށްވެސް ވަރަށް މުހިންމު ކަމަކަށް ވެގެންދާނެކަމަށެވެ. އެގޮތުން ހުރިހާ ޑޭޓާއެއް ޕްރައިވެޓް ސެކްޓަރ، އެކަޑެމިކް މީހުންގެ އިތުރުން ވިޔަފާރިތަކަށްވެސް ލިބޭނެ އިންތިޒާމްތަކެއް އޮންނަންޖެހޭކަން މިނިސްޓަރ ފާހަގަކުރެއްވިއެވެ.
“ޕޮލިސީ ލެބްގެ އަމާޒަކީ އިޤްތިސާދީގޮތުން ގިނަ ކަންކަމެއް ދިރާސާކުރުން. ފަސޭހައިން އެއްތަނަކުން މައުލޫމާތު ސަރުކާރުގެ އަދި ދައުލަތުގެ ސިޔާސަތުތައް ހަދާ ފަރާތްތަކަށް ލިބެންހުރުން. އަދި މި ދިރާސާތަކުގެ މަޝްވަރާގައި ކަމާބެހޭ އެކިއެކި މުވައްސަސާތަކާއި ފަރުދުންނާއި ޖަމިއްޔާތައް ޝާމިލްވެގެން މިކަންކަން ކުރުން” މިނިސްޓަރ ވިދާޅުވިއެވެ.
ޔޫއެންޑީޕީ މޯލްޑިވްސްއާއި އިކޮނޮމިކް މިނިސްޓްރީ ގުޅިގެން "އިކޮނޮމިކް ރިސަރޗް ޕްލެޓްފޯމް" ޤާއިމްކުރުމުގެ މަސައްކަތް ފަށާފައިވަނީ 2019 ވަނަ އަހަރުގެ ތެރޭގައެވެ.
މި ޕްލެޓްފޯމް މިހާރު ލޯންޗްކޮށްފައިވާއިރު މި ވެބްސައިޓުން ކޮންމެ މީހަކަށްވެސް ދިރާސާތައް ބަލާލެވޭނެއެވެ. އެގޮތުން މިހާރުވެސް މި ވެބްސައިޓްގައި ބައެއް ދިރާސާތައް ވަނީ ޕަބްލިޝްކޮށްފައެވެ.