ދިވެހިރާއްޖޭގެ ޤައުމީ ވޯޓުލާ މީހުންގެ ދުވަހަކީ ކޮންމެ އަހަރެއްގެ އޯގަސްޓު މަހުގެ 7 ވަނަ ދުވަސްކަމުގައިކަމުގައި އިލެކްޝަންސް ކޮމިޝަނުން ކަނޑައަޅުއްވައިފިއެވެ.މި ދުވަސް ފާހަގަކުރާ ގޮތަށް އިލެކްޝަންސް ކޮމިޝަނުން ހަމަޖެއްސެވީ ތިލަދުންމަތީ އުތުރުބުރީ ހޯރަފުށީގައި ރޭ ބޭއްވެވި ޑިމޮކްރަސީ ދުވަހުގެ ޚާއްސަ ހަފްލާގައެވެ. މި ހަފްލާގައި ވަނީ އިލެކްޝަންސް ކޮމިޝަންގެ އަހަރީދުވަހަކީ 25 އޯގަސްޓުކަމުގައި ވެސް ހަމަޖައްސަވާފައެވެ.ޑިމޮކްރަސީ ދުވަހުގެ ރަސްމީ ހަފްލާ ޝަރަފްވެރިކޮށްދެއްވީ ދެކުނު ކޮރެއާގެ އިލެކްޝަންސް ކޮމިޝަންގެ ސެކްރެޓްރީ ޖެނެރަލް މިސްޓަރ ކިމް ޔޮންގ ހައިއެވެ. ހަފްލާގައި ވާހަކަ ދައްކަވަމުން ކިމް ވަނީ ދެކުނު ކޮރެއާއިން ރާއްޖޭގެ އިލެކްޝަންސް ކޮމިޝނަށް އެހީތެރިކަން ފޯރުކޮށްދެއްވާޏެކަމުގެ ޔަޤީންކަން ދެއްވާފައެވެ.މި ހަފްލާގައި ވާހަކަފުޅު ދައްކަވަމުން ޒުވާނުންނާއި ކުޅިވަރާއި ބެހޭ ވަޒީރު އަޙްމަދު ޒުހޫރު ވިދާޅުވީ، ރާއްޖޭގައި މިވަގުތު އޮތީ ފުރިހަމަ ޑިމޮކްރަސީއެއްކަމަށެވެ. ސަބަބަކީ ރާއްޖޭގެ ރައްޔިތުން ތިބީ ވަކި އާދަކާދަތަކެއްގެ މަތީ، އިސްލާމްދީނުގެ އަޙުލުވެރިންގެ ގޮތުގައި ތިބުންކަމުގައި ވަޒީރު ވިދާޅުވިއެވެ. ވަޒީރުވަނީ ޑިމޮކްރަސީގެ ރިވެތި އުޞޫލު ޒުވާނުންގެ ކިބައިގައި އަށަގަތުމުގެ މުހިންކަމުގެ މައްޗަށް އަލިއަޅުއްވާލައްވާފައެވެ.މި ރަސްމިއްޔާތުގައި އިލެކްޝަންސް ކޮމިޝަންގެ ރައީސް އަޙްމަދު ސުލައިމާން ދެއްކެވި ވާހަކަފުޅުގައި، ރާއްޖެއަށް ޑިމޮކްރަސީ އައިގޮތުގެ މައްޗަށް އަލިއަޅުއްވާލެއްވިއެވެ. އެމަނިކުފާނުގެ ވާހަކަފުޅުގައި ޒަމާނީ ޑިމޮކްރަސީއަކީ ސިޔާސީ ޕާޓީތަކުގެ މައްޗަށް އެކުލެވިގެންވާ ޑިިމޮކްރަސީއެއްކަމަށް ވިދާޅުވިއެވެ. އަދި ޒަމާނީ ޑިމޮކްރަސީގައި ހަރުކަށ ިޢަަމަލުތަކާއި ނާޖާއިޒް ފައިދާ ވަކި ސިޔާސީ ޕާޓީއަކަށް ހޯދައިދިނުމުގެ މަސައްކަތް ކުރެވިގެން ނުވާނެކަމަށް ވެސް ވިދާޅުވިއެވެ. މީގެ އިތުރުން ޒަމާނީ ޑިމޮކްރަސީގައި އިދިކޮޅު ޕާޓީ ޒިންމާދާރުވަންޖެހޭނެކަމަށާއި، ވެރިކަންކުރާ ފަރާތާމެދު ކަންކަން ރާވައި، ޤައުމު އިނދަޖައްސާލަން މަސައްކަތްކުރާ ބަޔަކަށް ވެގެންނުވާނެކަމަށްވެސް ވިދާޅުވިއެވެ.މިރަސްމިއްޔާތުގައި ހޯރަފުށީ ދާއިރާގެ މެމްބަރު މުޙައްމަދު އިސްމާޢީލް ވިދާޅުވީ، ޒަމާނީ ޑިމޮކްރަސީ ރާއްޖެއަށް އަންނަމުންދާއިރު، ހުޅަނގުގެ ޑިމޮކްރަސީ ޢުޞޫލު އޮވެގެން ނުވާނެކަމަށެވެ. ޑިމޮކްރަސީގައި މީހުންގެ އަބުރުކަތިލެވިގެން ނުވާނެކަން ފާހަގކުރައްވަމުން މެމްބަރު މުޙައްމަދު އިސްމާޢިލް ވިދާޅުވީ، ޑިމޮކްރަސީގެ ނާޖާއިޒް ފައިދާ ބައެއް ނޫސްވެރިންނާއި އަމިއްލަ ފަރުދުން ނަގަމުން ގެންދާކަމަށެވެ. ނަމަވެސް އެފަދަ ކަންކަން ހުއްޓުވުވައި، އިސްލާމީ އުސޫލުތައް ނެގެހެއްޓުމަށް ރައީސް ޢަބްދުﷲ ޔާމީން ކުރައްވާ މަސައްކަތްޕުޅު ފާހަގަކުރެއްވިއެވެ.ޑިމޮކްރަސީ ހަފްތާ ފާހަގަކުރުމަށް ބޭއްވެވި ހަފްލާގައި ވަނީ ރާއްޖޭގެ ޑިމޮކްރައީ ހަރުދަނާ ކުރުމަށާއި، އިލެކްޝަންސް ކޮމިޝަނަށް އެއްބާރުލުމާއި އެހީތެރިކަން ފޯރުކޮށްދިނުމަށްޓަކައި އޭޝިޔާގެ އިންތިޚާބް ތަކާއި ބެހޭ އިދާރާތަކުގެ ޖަމްޢިއްޔާ، " އޭވެބް"އާއި ރާއްޖޭގެ އިލެކްޝަންސް ކޮމިޝަނާއި ދެމެދު އެއްބަސްވުމެއްގައި ސޮއިކޮށްފައެވެ.ރާއްޖޭގައި ފުރަތަމަ ފަހަރަށް ބާއްވާ ޑިމޮކްރަސީ ހަފްތާގައި ބައިވެރިވެވަޑައިގަތުމަށް މިނިވަން ބައެއް މުވައްސަސާތަކުގެ ވެރިން ބައިވެރިވެ ވަޑައިގެންނެވިއެވެ. މިމަހުގެ ސާދައިން ވިއްސަށް ހޯރަފުށީގައި ކުރިއަށްދާ ޑިމޮކްރަސީ ހަފްތާގެ ހަރަކާތްތަކުގައި ރާއްޖޭހެ ހުރިހާ މިނިވަން މުއައްސަސާތަކުން ދަނި ބައިވެރިވަމުންނެވެ. ރޭގެ ހަފްލާގައި ވަނީ ޑިމޮކްރަސީ އަށް ޚާއްސަ ލަވައެއްވެސް އިފްތިތާހްކޮށްފައެވެ.