ރައްޔިތުންގެ މަޖިލީހުން އަލުން ވިސްނާވަޑައިގަތުމަށް
ރައީސުލްޖުމްހޫރިއްޔާ ފޮނުއްވާފައިވާ ދިވެހިރާއްޖޭގެ ފަތުރުވެރިކަން ބޮއިކޮޓްކުރުމާއި
ރާއްޖެއަށް ދަތިކުރުމަށް ގޮވާލާ ފަރާތްތަކާމެދު ފިޔަވަޅު އެޅުމުގެ ބިލް މަޖިލީހަށް
ބަލައިގަންނަވައިފިއެވެ.
މިބިލް މަޖިލީހަށް ބަލައިގަތުމަށް ފާސްކުރެއްވީ 38 މެމްބަރުންގެ
އަޣްލަބިއްޔަތުންނެވެ. މިބިލް މަޖިލީހަށް ބަލައިގަންނަވަން ފެނިވަޑައިނުގަންނަވާކަމަށް
11މެމްބަރުން ވޯޓު ދެއްވާފައިވެއެވެ. މިބިލް އަލުން ދިރާސާކުރެއްވުމަށް ވަނީ 7
މެމްބަރުންގެ ވަގުތީ ކޮމިޓީއަކަށް ފޮނުއްވަވާފައެވެ.
ދިވެހިރާއްޖޭގެ
ފަތުރުވެރިކަން ބޮއިކޮޓްކުރުމާއި، ރާއްޖެއަށް ދަތިކުރުމުގެ ފިޔަވަޅު އެޅުމަށް
ގޮވާލާ ފަރާތްތަކާމެދު ފިޔަވަޅުއެޅުމުގެ ބިލް ތަސްދީޤްނުކުރައްވައި
ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވީ މި ބިލުގެ ސަބަބުން ޤާނޫނު އަސާސީން
ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ
މިނިވަންކަން ފަދަ އަސާސީ ހައްޤުތައް ވަރަށް ފުޅާކޮށް ހިފެހެއްޓިފައިވާ ކަމަށް ރައީސުލްޖުމްހޫރިއްޔާއަށް ޤަބޫލުފުޅުކުރެއްވީތީކަމަށް
އެމަނިކުފާނު މަޖިލީހުގެ ރައީސަށް ފޮނުއްވި ސިޓީގައި ވިދާޅުވެފައިވެއެވެ. މިނޫންވެސް
ޤާނޫނު އަސާސީން ކަށަވަރުކޮށްދޭ ގިނަ ޙައްޤުތަކެއް ހިފެހެއްޓޭކަން މިސިޓީގައި
ރައީސް ވިދާޅުވެފައިވެއެވެ.
މިބިލަށް ވާހަކަ ދެއްކެވި މެމްބަރުންވަނީ، ސިޔާސީ
މަޤްޞަދެއް ޙާސިލްކުރުމަށްޓަކައި ކެނޑިނޭޅި ބައެއް ފަރާތްތަކުން މަސައްކަތްކުރަމުންދާކަމަށް
ތުހުމަތުކުރައްވައި މިފަދަ ދަނޑިވަޅެއްގައި މިފަދަ ޤާނޫނެއް އޮތުމުގެ މުހިންމުކަން
ފާހަގަކުރައްވާފައެވެ.
ޓޫރިޒަމް ބޮއިކޮޓްކުރުމަށް ގޮވައިލުމާއި ރާއްޖެއަށް ދަތިކުރުމުގެ ފިޔަވަޅުއެޅުމަށް
ގޮވައިލުމާއި ހިތްވަރު ދޭ މީހެއްގެ އަދަބަކީ، އެ މީހަކު އެކަމުގައި ބައިވެރިވި
މިންވަރަށް ބަލައި، 2 އަހަރާއި 10 އަހަރުގެ މުއްދަތަކަށް ޖަލަށްލުން ނުވަތަ ގޭ
ބަންދުކުރުން ނުވަތަ ބައިވެރިވި މިންވަރަށް ބަލައި، 500 ރުފިޔާއާއި 5 މިލިއަން
ރުފިޔާއަށްވުރެ މަދު ނޫން ޢަދަދަކުން ޖޫރިމަނާ ކުރުންކަމަށް ބިލުގައިވެއެވެ.