އެމް.އެމް.ޕީ.އާރު.ސީގެ ކޮރަޕްޝަނާ ގުޅިގެން އިދިކޮޅު އެމްޑީޕީން މަޖިލީހަށް ހުށައެޅުއްވި ކުއްލި މައްސަލަ މަޖިލީހަށް ބަލައިނުގަންނަވައި ބޭރުކޮށްލައްވައިފިއެވެ.
ހިތަދޫ މެދުދާއިރާގެ މެމްބަރު އިބްރާހީމް މުޙައްމަދު ދީދީ ހުށަހެޅުއްވި މި މައްސަލަ މަޖިލީހަށް ބަލައިގަންނަވަން ފެނިވަޑައިގަންނަވާކަމަށް ވޯޓުދެއްވީ، 48 މެމްބަރުންގެ ތެރެއިން 22 މެމްބަރުންނެވެ. މިމައްސަލަ މަޖިލީހަށް ބަލައިގަތުމަށް ފެނިވަޑައިނުގަންނަވާ ކަމަށް 26 މެމްބަރުން ވޯޓު ދެއްވިއެވެ. މި ކުއްލި މައްސަލަ މަޖިލީހަށް ބަލައިގަންނަވަން ފާސްކުރެއްވުމަށް 25 ވޯޓު ބޭނުންވާނެއެވެ. މަޖިލީހުގެ ޤަވާޢިދުގައިވާގޮތުން ކުއްލި މައްސަލައަށް ބަޙުސްކުރުމަށް ފާސްވެއްޖެނަމަ، އެ ދުވަހުގެ ޖަލްސާގައި ދެން ކުރިއަށްދާނީ އެ މައްސަލައަށް ބަޙުސްކުރެއްވުމެވެ.
މިއަދުގެ ޖަލްސާގައި ކުރިއަށް ގެންދެވި މަސައްކަތްތަކުގެ ތެރޭގައި ނޭޝަނަލް އިންޓެގްރިޓީ ކޮމިޝަން (އެންއައިސީ)ގެ މެމްބަރުކަމަށް ޢައްޔަން ކުރެއްވުމަށް ރައީސުލްޖުމްހޫރިއްޔާ މަޖިލީހަށް ފޮނުއްވާފައިވާ ސ. ހިތަދޫ ކަރަންކާވިލާ، އަޙުމަދު އަމީނުގެ ނަންފުޅު ދިރާސާކުރުމަށް ވަނީ މިނިވަން މުއައްސަސާތަކާބެހޭ ކޮމިޓީއަށް ފޮނުއްވާފައެވެ. އެންއައިސީގައި 5 މެމްބަރުން ތިއްބަވާއިރު މިހާރު އެ ކޮމިޝަނުގައި ތިއްބަވަނީ 4 މެމްބަރުންނެވެ. ނޭޝަނަލް އިންޓެގްރިޓީ ކޮމިޝަނުގެ މަސްއޫލިއްޔަތުތަކުގެ ތެރޭގައި ޤާނޫނު ތަންފީޒުކުރާ އިދާރާތަކާއި އެ އިދާރާތަކުގެ މުވައްޒަފުން ކުރާ ޤާނޫނާ ޚިލާފު އަމަލުތައް ބަލައި ތަހުގީޤުކުރުން ހިމެނެއެވެ.
މިއަދުގެ ޖަލްސާއަށް ތަޢާރަފްކުރައްވާފައިވާ ބިލްތަކުގެ ތެރޭގައި، ޖެންޑަރ އީކުއަލިޓީ ބިލާއި ވަޒީފާއާބެހޭ ޤާނޫނަށް ހުށައަޅުއްވާފައިވާ އިޞްލާޙުގެ ބިލާއި، ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާބެހޭ ޤާނޫނަށް އިޞްލާޙު ހުށައެޅުމުގެ ބިލް ހިމެނެއެވެ. އަދި ޕްރޮސެކިއުޓަރ ޖެނެރަލަކު ޢައްޔަންކުރުމަށް ޕްރޮސެކިއުޓަރ ޖެނެރަލްގެ ޤާނޫނަށް ހުށައަޅުއްވާފައިވާ އިޞްލާޙު ހިމެނެއެވެ. މީގެ އިތުރުން ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނަށް ހުށައަޅުއްވާފައިވާ އިޞްލާޙާއި، ޕޭމަންޓް ސިސްޓަމްގެ ބިލްގެ އިތުރުން ދައުލަތުގެ މުސާރައިގެ ސިޔާސަތުގެ ބިލްވެސް ވަނީ މިއަދުގެ ޖަލްސާއަށް ތަޢާރަފްކުރައްވާފައެވެ.