ދިވެހި ސަރުކާރުގެ ދަޢުވަތަކަށް އޯލް ޕާޓީ ބްރިޓިޝް-މޯލްޑިވްސް ޕާލިމެންޓްރީ ގްރޫޕުގެ ވަފްދެއް ރާއްޖެ އަތުވެއްޖެއެވެ. އިނގިރޭސިވިލާތުގެ ޕާލިމަންޓްގައި ހިމެނޭ ހުރިހާ ޕާޓީއެއްގެ މެމްބަރުންގެ ބައިވެރިވުން އޮންނަ ގޮތަށް އެކުލަވާލާފައިވާ އޯލް ޕާޓީ ބްރިޓިޝް-މޯލްޑިވްސް ޕާލިމެންޓްރީ ގްރޫޕުގެ މިވަފުދުގެ އިސްބޭފުޅަކީ ސަރ ޑޭވިޑް އޭމްސްއެވެ. މިވަފްދަށް އިބްރާހީމް ނާސިރު އިންޓަރނޭޝަނަލް އެއަރޕޯޓުން މަރުޙަބާ ވިދާޅުވީ ޚާރިޖީ ވުޒާރާގެ އެޑިޝަނަލް ސެކްރެޓަރީ އިބްރާހީމް ޝަހީބެވެ.މިވަފްދުގެ ދަތުރުފުޅުގައި ރާއްޖެއާއި އިނގިރޭސިވިލާތާއި ދެމެދު އޮންނަ ގުޅުން އިތުރަށް ހަރުދަނާކުރުމަށް ރާއްޖޭގެ ކަމާބެހޭ އިސްފަރާތްތަކާއެކު ބައްދަލުކުރައްވައި މަޝްވަރާކުރެއްވުމަށް ވަނީ ހަމަޖެހިފައެވެ. އޯލް-ޕާޓީ ބްރިޓިޝް-މޯލްޑިވްސް ޕާރލިމަންޓްރީ ގްރޫޕަކީ ތިމާވެއްޓާއި ތަޢުލީމީ ދާއިރާއާއި ސިޔާސީ އަދި އިޖްތިމާޢީ ދާއިރާއިން އެއްބާރުލުން އިތުރު ކުރުމުގެ މަޤުޞަދުގައި 1999 ވަނައަހަރު އެކުލަވާލެވުނު ގްރޫޕެކެވެ. މިއީ އިނގިރޭސިވިލާތުގެ ހައުސް އޮފް ކޮމަންސް އަދި ހައުސް އޮފް ލޯޑްސްގެ 20 މެންބަރުން ހިމެނޭ ގޮތަށް އެކުލަވާލެވިފައިވާ ގްރޫޕެކެވެ.