ޑީސަލާއި ޕެޓްރޯލް މިހާރު ރާއްޖޭގެ ބާޒާރުގައި ހުރީ ލިޓަރެއް 10 ރުފޔާއަށްވުރެ ދަށުގައެވެ. ރާއްޖޭގެ ބާޒާރުގައި ތެލުގެ އަގު މިހާ ދަށަށްދިޔައިރުވެސް ޓެކްސީ ދަތުރުތަކުގެ އަގަށް ބަދަލެއް އަންނަމުން ނުދާކަން ފާހަގަކޮށްލެވެއެވެ.ޓެކްސީގެ ޚިދުމަތަކީ ޢާންމުކޮށް ބޭނުންކުރަންޖެހޭ ޚިދުމަތެއް ނަމަވެސް އެ ޚިދުމަތް ދެމުން އަނަންނީ ވިޔަފާރި އުޞޫލުން، ޓެކްސީ ދަތުރަކަށް ހެނދުނު 06:00 ން ރޭގަނޑު 00:00 އާ ދެމެދު 25 ރުފިޔާގެ ރޭޓުންނެވެ. މިރޭޓަށް ޓެކްސީ ދަތުރަށް ފީނަގަން ފެށި 2008 ވަނަ ދުނިޔޭގެ ބާޒާރުގައި ތެޔޮ ފީފާއެއްގެ އަގުހުރީ 140 ޑޮލަރަށްވުރެ މަތީގައެވެ. އަދި ރާއްޖޭގެ ބާޒާރުގައި ތެޔޮލީޓަރެއް އޭރު ވިއްކަމުން ދިޔައީ ގާތްގަނޑަކަށް 16 ރުފިޔާއަށެވެ. އެ ދުވަސްވަރު މާލޭގައި ޓެކްސީގެ ޚިދުމަތްދިން ގިނަ ފަރާތްތަކަކުން ތެލުގެ އަގު ބޮޑުވެގެން ޓެކްސީދަތުރުގެ ފީ ބޮޑުކުރުމަޑް ސަރުކާރަށް ގިނަ ޑިމާންޑްތަކެއް ކުރަމުން ގެންދިޔައެވެ. ނަތީޖާއެއްގެ ގޮތުން ސަރުކާރުން އޭރު ޓެކްސީ ކުރެވޭނެ އެންމެ މަތީ ބޭންޑެއްކަމަށް 25 ރުފިޔާ ކަނޑައެޅިއެވެ.ރާއްޖޭގެ ބާޒާރަށް ހަމައެކަނި ބަލާލާއިރުވެސް ބާޒާރުގައި ތެލުގެ އަގު މިވަނީ ވަރަށް ބޮޑުތަނުން އަގުހެޔޮވެފައެވެ. އެގޮތުން މިހާރު ރާއްޖޭގެ ބާޒާރުގައި ޑިސަލާއި ޕެޓްރޯލް ލީޓަރެއް ވިއްކަން ހުރީ 10 ރުފިޔާއަށްވުރެ އަގުހެޔޮކޮށްކަން ފާހަގަކޮށްލެވެއެވެ. ބާޒާރުގައި ތެލަށް އަންނަމުންދާ ހެޔޮ ބަދަލު ޓެކްސީ ޚިދުމަތް ފޯރުކޮށްދޭ ފަރާތްތަކުންވެސް ރައްޔިތުންނަށް ފޯރުކޮށްދިނުމަކީ ސަރުކާރުގެ އެދުމެކަމަށް ޓްރާންސްޕޯޓް އޮތޯރިޓީން ވިދާޅުވެއެވެ.ޕީއެސްއެމަށް މަޢުލޫމާތުދެއްވަމުން، އެއޮތޯރިޓީގެ ޗެއަމަން ޢަބްދުއްރަޝީދު ނާފިޒު ވިދާޅުވީ ތެލުގެ އަގަށް އައިސްވާ ބަދަލާއެއްގޮތަށް އެފަރާތްތަކުން ރައްޔިތުންނަށް ދޭ ޓެކްސީގެ އަގާދޭތެރޭގައި ވިސްނާވަޑައިގަތުމަށް އެދި، ޓްރާންސްޕޯޓް އޮތޯރިޓީގައި ރަޖިސްޓްރީ ކޮށްފައިވާ ޓެކްސީ ސެންޓަރުތަކަށް އެ އޮތޯރިޓީން ސިޓީއެއް ފޮނުއްވާފައިވާކަމަށެވެ. ނަމަވެސް ޓެކްސީ ދުއްވާ ފަރާތްތަކުން ބުނަމުންދަނީ މިހާރުގެ ޙާލަތަށް ބަލައި ތެލުގެ އަގަށް ބަދަލުއައިނަމަވެސް ޓެކްސީ ދަތުރުގެ އަގުކުޑަ ނުކުރެވޭނެކަމަށެވެ.ބާޒާރުގައި ތެލުގެ އަގަށް އަންނަމުންދާ ބަދަލުގެ މަންފާ ރައްޔިތުންނަށް ލިބެންޖެހޭއިރު އެފަދަ ބަދަލުތައް ޓެކްސީ ސެންޓަރުތަކުން ކުރައްވަމުން ނުދާނަމަ ކަމާގުޅޭ ފަރާތްތަކާއެކު މަޝްވަރާ ކުރުމަށްފަހު އަގަށް ބަދަލެއް ސަރުކާރުން ގެންނަވާނެކަމަށް ޓްރާންސްޕޯޓް އޮތޯރިޓީން ވިދާޅުވެއެވެ.